Մամուլը սկսել է գրականությանն ավելի քիչ անդրադառնալ: Այսօր «Տեսակետ» մամուլի ակումբում նման կարծիք հայտնեցին գրականագետ-գրաքննադատներ Հասմիկ Հակոբյանն ու Արքմենիկ Նիկողոսյանը՝ անդրադառնալով հայ գրականության այսօրվա խնդիրներին, ընթերցող-գրող կապին, երիտասարդ գրողներին, գրքերի պահանջարկին ու թեմայի շուրջ հարակից այլ հարցերի:
Նրանք խոսեցին նաև փետրվարի 19-ին՝ Հովհաննես Թումանյանի ծննդյան օրը, սպասվող Գիրք նվիրելու օրվա մասին և ուրախությամբ նշեցին, որ օրն իսկապես տոն է դարձել:
Ինչ վերաբերում է գիրք տպագրելու հետ կապված խնդիրներին՝ Արքմենիկ Նիկողոսյանն ասաց. «Գիրք տպագրելու խնդիր այսօր լավ գրողները չունեն: Լավ գրելը միակ ճանապարհն է, որ գիրքը տպագրվի»:
Նա նշեց նաև, որ այսօր մենք թարգմանական ռեսուրսների պակաս ունենք, ինչպես նաև գրական մթնոլորտի վերականգնման խնդիր կա. քաղաքականից զատ պիտի կարողանանք նաև մշակութային կյանքով ապրել:
Թարգմանական գրականության խնդիրներին անդրադարձավ նաև Հասմիկ Հակոբյանը: «Այսօր թարգմանիչները հրաշալի լեզվական իմացություն ունեն, բայց նրանց որպես թարգմանիչ չեն պատրաստում: Այս առումով կրթական հաստատությունները մտահոգություն ունեն»,-ասաց նա:
Բանախոսներն անդրադարձան նաև այսօր առավել պահանջված գրքերին: Այս առնչությամբ Նիկողոսյանը նշեց. «Ավելի շատ կարևորում եմ այն, որ մարդիկ կարդում են, քան այն, թե ի՛նչ են կարդում, որովհետև կարդալն այպես թե այնպես կբարձրացնի, կտանի նրանց դեպի ավելի լավ գրականություն»: