Սևանը դարձյալ ծաղկել է՝ անհանգստություն պատճառելով բազմաթիվ մտահոգ քաղաքացիների: Այս անգամ Սևանի փրկության խնդրին ՛՛Տեսակետ՛՛ մամուլի ակումբում անդրադարձան ՛՛Քիմմաստեր՛՛ ընկերության հիմնադիր, ՛՛Մեդիսար՛՛ ընկերության հիմնադիր տնօրեն Մանվել Գաբրիելյանը և ԵՊՀ Էկոլոգիական անվտանգության կենտրոնի ավագ գիտաշխատող, քիմիական գիտությունների դոկտոր Սերգեյ Հայրապետյանը:
Բանախոսները նշեցին, որ ունեն փորձնական ծրագիր, որը ցանկանում են իրականացնել՝ Սևանում կառուցելով կեղտաջրերի մաքրման կայաններ, սակայն, նախ և առաջ, Սևանի մաքրման հարցում ամենակարևորը Մարտունի, Գավառ ու Վարդենիս քաղաքներում մաքրման կայանների կառուցումն է:
Ըստ Գաբրիելյանի՝ նշված քաղաքներում կան մեխանիկական մաքրման կայաններ, որոնք ընդամենը կոշտ աղբն են մաքրում՝ լուծելով խնդրի միայն 10 տոկոսը:
՛՛Բավականին լուրջ մարտահրավերների ենք հանդիպում, երբ փորձում ենք պատկան մարմինների հետ քննարկել Սևանի մաքրման հարցերը, ամեն տեղ որևէ լուրջ քայլ չի արվում՝ բացի խոսակցությունից՛՛,-ասաց Մանվել Գաբրիելյանը:
Նա նաև հավելեց, որ անհրաժեշտ է կառուցել կենսաբանական մաքրման կայաններ, ինչի վերաբերյալ իրենց առաջարկությունները հաջողություն չեն ունեցել. ՛՛Մենք մի քանի անհաջող փորձ արեցինք՝ առաջարկություն անել՝ կենսաբանական մաքրման կայաններ կառուցելու: Այդ կայանները հանձնվել են ՛՛Վեոլիա ջրի՛՛ կառավարմանը, մենք դիմել ենք Ջրպետկոմի միջնորդությանը, ունենք պատասխանները, որ ՛՛Վեոլիա ջուրը՛՛ հետաքրքրված չէ Սևան թափվող կոյուղաջրերի հարցով, սա նրա համար լրացուցիչ ծախս է, իրենց պայմանագրում այդպիսի կետ չկա, որ ջրերը պիտի մաքրվեն, նոր ուղարկվեն Սևան:
Մենք Ջրպետկոմի նախագահի միջնորդությամբ մտանք այդ կայանները, ջրի նմուշ վերցրեցինք, լաբորատոր հետազոտություն արեցինք, որից հետո պատրաստ ենք կառուցել պիլոտային կայան, որից հետո՝ մեկ ամսից, կարող ենք պատկան մարմիններին առաջարկ անել, թե ինչ կարժենա այդ կայանը՝ ամբողջական տեխնիկական առաջադրանքը՛՛:
Գաբրիելյանը նշեց նաև, որ գոյություն ունի կառավարության համապատասխան որոշում՝ կառուցել պիլոտային մաքրման կայան՝ ֆինանսավորման դեպքում, մինչդեռ իրենք առաջարկում են կայանը կառուցել բացառապես իրենց սեփական միջոցներով: ՛՛Այս մասին էլ ենք Ջրպետկոմին առաջարկել, բայց որևէ ռեակցիա չկա, քար լռություն է, ՛՛Վեոլիա ջուրը՛՛ կարծում է՝ իր համար դա լրացուցիչ ծախս է՛՛,-ասաց նա՝ հավելելով, որ չպիտի հասցնենք այն սահմանին, որ Սևանը մահանա:
ԵՊՀ Էկոլոգիական անվտանգության կենտրոնի ավագ գիտաշխատող, քիմիական գիտությունների դոկտոր Սերգեյ Հայրապետյանն էլ նշեց, որ Սևանի խնդրին պետք է մոտենալ ՛՛մի վնասիր՛՛ սկզբունքով:
՛՛Մենք եկել ենք մի ծրագրով, որտեղ վնասելու խնդիրը նվազագույնի է հասցված, մենք ուզում ենք համապարփակ խնդրի մի հանգույցը լուծել, այսինքն՝ Սևան լցվող աղտոտող նյութերի կանխում իրականացնել, մենք չենք ասում՝ Սևանի համապարփակ լուծման պանացեա ենք առաջարկում, մենք ուզում ենք արգելել աղտոտող նյութերի մուտքը Սևան՛՛,-ասաց նա:
Ըստ բանախոսի՝ այս դեպքում, սակայն, առանց քիմիայի անհնար կլինի լուծել խնդիրը և առհասարակ՝ պատկերացնել մաքրման աշխատանքները: ՛՛Ինչ-որ մինիմալ դոզայով պիտի քիմիա կիրառենք, մեր նախնական փորձարկումները ցույց են տվել, որ խնդրահարույցը ֆոսֆորի հարցն է, ազոտը կարող է ցնդել, իսկ ֆոսֆորը մնայուն է, մեր նախնական փորաձարկումները ցույց են տվել, որ քանակը կարելի է կրճատել՛՛,-հավելեց Հայրապետյանը՝ ընդգծելով, որ իրենց գլխավոր սկզբունքն ու նշանաբանն է՝ առաջին հերթին չվնասել Սևանը. ՛՛Մենք առաջին հերթին չենք վնասելու Սևանը, դա մեր կրեդոն է, մինիմալ չափով կարող է քիմիկատներ օգտագործենք, որը կլինի անվնաս՛՛:
Գաբրիելյանի խոսքով, սակայն, անգամ եթե այսօր կամ վաղը կառուցենք ջրի մաքրման կայանները, միևնույն է, Սևանը դեռ 2-3 տարի շարունակելու է կանաչել, որովհետև ֆոսֆորի կոնցենտրացիան այնքան է, որ շուտ չի վերանա:
Բանախոսները հավելեցին, որ իրենց առաջարկած պիլոտային երեք կայանները մինչև Նոր տարի կարող են կառուցել, ընդ որում՝ մեկ կայանի կառուցումը մոտավոր գնահատել են 2.5 մլն եվրո:
Մանվել Գաբրիելյանը նշեց, որ իրենք հույս են կապում շրջակա միջավայրի նորանշանակ նախարարի՝ Ռոմանոս Պետրոսյանի հետ, որը, նրա խոսքով, Սևանի հարցում միշտ էլ ակտիվություն է դրսևորել: ՛՛Հույս ունենք՝ նրա նշանակումից հետո կտրուկ կփոխվի վիճակը՛՛,-ամփոփեց Գաբրիելյանը:
Մանրամասները՝ տեսանյութերում.
