Եթե խոսքը ապաշրջափակման մասին է, ապա մենք ունենք ճանապարհներ, որոնք հենց այսօր էլ կարող են շահագործվել: Այս մասին այսօր ՛՛Տեսակետ՛՛ մամուլի ակումբում կայացած ասուլիսի ժամանակ ասաց ՛՛Ապավեն՛՛ բեռնափոխադրող ընկերության ղեկավար Գագիկ Աղաջանյանը՝ անդրադառնալով ճանապարհների ապաշրջափակմանը, մասնավորապես՝ Մեղրիի միջանցքին:
՛՛Մեղրիի ճանապարհը տալը նշանակում է Հայաստանը շրջանցող ճանապարհ կառուցել՛՛,-նշեց նա՝ հավելելով, որ Ադրբեջանը ցանկանում է, որ կառուցվի Հայաստանի տարածքով Հայաստանը շրջանցող ճանապարհ: ՛՛Այդ դեպքում Մեղրիի ճանապարհը կդառնա միջազգային պայմանագրի օբյեկտ և դուրս կգա մեր վերահսկողությունից, դա աղետ է՛՛,-պարզաբանեց բեռնափոխադրող ընկերության ղեկավարը: Նրա խոսքով՝ ճանապարհների ապաշրջափակման ուղղությամբ որևէ կոնկրետ քայլ չպիտի արվի, մինչև չկատարվի Հայաստան-Ադրբեջան-Ռուսաստան եռակողմ համաձայնագրի 8-րդ կետը, սակայն քննարկումներ, խորհրդակցություններ և նախապատրաստական աշխատանքներ, անշուշտ, պիտի իրականացվեն:
՛՛Մեղրիի միջանցքը՝ 38-44 կմ, Ադրբեջանի համար ավելի շատ քաղաքական նշանակություն ունի, քան տնտեսական, հետևաբար՝ մենք պիտի հնարավորինս ճկուն լինենք, մինչդեռ Ադրբեջանը պնդելու է, որ հենց Մեղրիի միջանցքը բացվի՛՛,- ասուլիսի ժամանակ նման տեսակետ հայտնեց Հանրային խորհրդի Ֆինանսատնտեսական և բյուջետային հարցերի հանձնաժողովի նախագահ, Հայրենական ապրանք արտադրողների միության նախագահ Վազգեն Սաֆարյանը:
Ինչ վերաբերում է անվտանգայինն հարցերին, ապա դրանց վերաբերյալ ԱԺ Տնտեսական հարցերի մշտական հանձնաժողովի նախագահի տեղակալ Հովիկ Աղազարյանն ասաց, որ նման հարցերը կապված չեն լինի մարդկային կյանքերի հետ:
՛՛Երբ հարցերին համալիր լուծում տրվի, ամենակարևոր կետերից մեկը կլինի անվտանգային խնդիրը, որին ևս լուծում կտրվի՛՛,-նշեց ԱԺ ՛՛Իմ քայլը՛՛ խմբակցության պատգամավորը՝ ընդգծելով, որ ուղևորների փոխադրման մասին դեռ վաղ է խոսելը, իսկ բեռների փոխադրման անվտանգության հարցերով կարող են զբաղվել ապահովագրական ընկերությունները, կամ կողմերից յուրաքանչյուրն իր վրա պարտավորություն կվերցնի ապահովել անվտանգությունը:
՛՛Անվտանգային խնդիրները, բարեբախտաբար, կապված չեն լինի մարդկային կյանքերի հետ, այլ կապված կլինեն բեռների հետ, իսկ այդ մասով լուծումներ գտնելը, կարծում եմ, դժվար չէ՛՛,-նշեց Հովիկ Աղազարյանը:
Մանրամասները՝ տեսանյութում.