Երբեք չենք կարող ասել՝ ամեն ինչ արել ենք, հողի տակից դուրս կգան. Րաֆֆի Քորթոշյան (տեսանյութ)

Երբեք չենք կարող ասել՝ ամեն ինչ արել ենք, հողի տակից դուրս կգան… Այս մասին այսօր ՛՛Տեսակետ՛՛ ակումբում հրավիրված մամուլի ասուլիսի ժամանակ ասաց Հայկական ճարտարապետությունն ուսումնասիրող հիմնադրամի փոխտնօրեն Րաֆֆի Քորթոշյանը՝ խոսելով Արցախի՝ թշնամուն հանձնված տարածքներում իրենց կատարած աշխատանքների մասին:

Նա նշեց, որ հանձնելուց մի քանի օր առաջ չորս օրով եղել է Բերձորում, իսկ դրանից առաջ՝ դեռ 2018-ին, ՀՃՈւ հիմնադրամի աշխատակիցներն այցելել են Քարվաճառ, կարևոր լրացումներ արել Արցախյան առաջին պատերազմից հետո այնտեղ հուշարձանագետ, հիմնադրամի՝ Հայաստանում հիմնադիր-տնօրեն Սամվել Կարապետյանի կատարած աշխատանքներին:

Բանախոսը նշեց, որ Սամվել Կարապետյանը Բերձորում վերջին անգամ եղել էր 1993-94 թթ., մինչդեռ վերջին չորսօրյա այցի ժամանակ թուրքերի տներում հայտնաբերվում էին խաչքարերի բեկորներ: ՛՛Նոր հայտնություններ կային…՛՛,-ասաց Քորթոշյանը և հավելեց, որ նշյալ տարածքներում որքան էլ շատ հուշարձաններ ուսումնասիրած լինեն, այնուամենայնիվ, չեն կարող ասել, թե ամեն ինչ արված է:

Րաֆֆի Քորթոշյանն ամփոփեց նաև հիմնադրամի անցյալ տարվա աշխատանքները: Նա նշեց, որ իրենց հրատարակչական ու նախահրատարակչական աշխատանքները խաթարվեցին երեք պատճառներով՝ Սամվել Կարապետյանի անժամանակ մահը, համավարակն ու պատերազմը: ՛՛Սամվել Կարապետյանը մեր բոլոր ծրագրերի շարժիչ ուժն էր՛՛,-ցավով նշեց Քորթոշյանը:

Նա պատմեց, որ ամեն դեպքում անցյալ տարի կարողացել են այցելել Կոստանդնուպոլիս ու Թեհրան, որտեղ արված լուսանկարներով ու չափագրություններով հարստացրել են իրենց նյութերը:

Խոսելով արդեն այս տարի արված աշխատանքների մասին՝ Քորթոշյանն ասաց, որ լույս են տեսել ՛՛Վարձք՛՛ ամսագրի երկու համարներ, որոնցից մեկն ամբողջությամբ նվիրված է Սամվել Կարապետյանին, իսկ երկրորդն ամփոփում է հոդվածներ Արցախի, Սփյուռքի ու Արևմտյան Հայաստանի հուշարձանների մասին: Դրանցից ամենաարժեքավորը, ըստ բանախոսի, Սամվել Կարապետյանի մինչ այս անտիպ հոդվածն է՝ ամենահին թվագրված խաչքարի մասին՝ 866 թ., հայտնաբերված Արցախի Վաղուհաս գյուղում:

Այս տարվա ևս մեկ արժեքավոր հրատարակություն է ՛՛Հայ արվեստի նմուշներ Սիրիայում՛՛-ը, որը ներառում է լուսանկարներ ու տեղեկություններ 77 նմուշների մասին՝ ստեղծված հիմնականում 17-20-րդ դարերում:

Րաֆֆի Քորթոշյանն անդրադարձավ նաև ՛՛Հայաստանի պատմություն՛՛ գրքաշարին և բոլոր բաժանորդներին ուրախացրեց՝ տեղեկացնելով, որ առաջիկա մի քանի ամսվա ընթացքում լույս կտեսնեն միանգամից երկու հատոր՝ ՛՛Խնուսը՛՛-ը, որը պատրաստում է հենց Քորթոշյանը, և ՛՛Ղարադաղը՛՛, որը սկսել էր Սամվել Կարապետյանը, սակայն չհասցրեց ավարտին հասցնել:

Մանրամասները՝ տեսանյութում.