Կարծում եմ՝ չարժե այսքան թեժ քննարկել Նիկոլ Փաշինյանի առաջարկը, ըստ որի՝ պետք է հաշվել և նույնականացնել Հայոց Ցեղասպանության զոհերին։ Այս մասին այսօր Աժ-ում լրագրողների հետ զրույցում ասաց ՔՊ-ական եզդի պատգամավոր Ռուստամ Բաքոյանը։
«Առնվազն իշխանության կողմից որևէ գործընթաց չկա և որևէ պրոցես չկա, եթե առանձին մեր գործընկերներ խոսել են դրա մասին՝ ես դրանից տեղյակ չեմ, գիտեմ, որ քաղաքական որևէ որոշում չկա, հետևաբար՝ դրա մասին խոսելու կարիք չկա»,- նշել է պատգամավորը։ Վերջինս խորհրդարանում ներկայացնում եզդի ժողովրդին, որը նույնպես ենթարկվել է ցեղասպանության։
Հարցին, թե հնարավո՞ր է հաշվել ցեղասպանության զոհերին՝ Բաքոյանն ասաց, որ ինքը պատմաբան չէ և կարծում է, որ ցանկացած նման խոսակցություն ճիշտ կլինի այդ ոլորտում գտնվող մասնագետների, ինստիտուտների հետ խոսելուց հետո բացել։
«Ես նման անհրաժեշտություն չեմ տեսնում, և դրա մասին տեղեկություններ չունեմ։ Այդ հարցը կթողնեմ իմ հայ գործընկերներին և համապատասխան ինստիտուտներին։ Խնդրում եմ, այն թեզերը որոնք վնասելու են ՀՀ շահերը՝ չտարածել»,- արձանագրել է պատգամավորը, որը այն նույն խմբակցության կազմում է, որի առաջնորդը՝ Նիկոլ Փաշինյանը, շրջանառության մեջ է դրել այդ վտանգավոր թեզերը։