Հայաստանը ռեգիոնալ ու աշխարհաքաղաքական տարբեր կենտրոնների բախումների կիզակետում է այս պահին, այս մասին ԱԺ ճեպազրույցների ժամանակ ասաց «Պատիվ ունեմ» խմբակցության քարտուղար Տիգրան Աբրահամյանը։
Դրանում, ըստ նրա, իր գործուն ազդեցությունն ունի հայաստանյան իշխանությունը։
Աբրահամյանի խոսքով՝ այն երկրները, որոնք խնդիր ունեն ՀՀ իշխանության հետ, չպետք է վարեն այնպիսի քաղաքականություն, որի հետևանքով տուժի հայ ժողովուրդը։
«Ունեք խնդիրներ Հայաստանի իշխանության հետ, ձեր խնդիրները լուծեք նրանց հետ, հայ ժողովուրդը չպետք է դառնա ձեր խնդիրների զոհն ու չպետք է դրա ծանր հետևանքները զգա»,- ասաց նա։
Պատգամավորի դիտարկմամբ՝ այն ուղղությունը, որը վերցրել է Հայաստանի իշխանությունը, բերել, հասցրել է այն իրավիճակին, երբ ՀՀ-ն տարբեր կենտրոնների համար դիտարկվում է որպես «պալիգոն»։
«Դրա հետևանքով անընդհատ ունենք լայնամասշտաբ գործողություններ, Հայաստանն անընդհատ ենթարկվում է տարբեր ագրեսիաների, Արցախը մի քանի անգամ ագրեսիաների ենթարկվեց, որի ծանր ու ողբերգական հետևանքը արձանագրվեց սեպտեմբերին»,- ընդգծեց «Պատիվ ունեմ» խմբակցության քարտուղարը։
Վերջին շրջանում Ադրբեջանը խուսափում է բանակցային գործընթացում առարկայական քայլերի գանլուց։
Այս պահին, ըստ նրա, Ադրբեջանը հետապնդում է մեկ նպատակ՝ որոշակի հաշվարկ ու ուժերի բալանսի վերագնահատում է տեղի ունենում։
«Ակնհայտորեն Ադրբեջանն այսօր տարածքային հավակնություններ ունի Հայաստանի տարբեր բնակավայրերի նկատմամբ, վերջին շրջանում ակտիվ խոսում են 8 գյուղերի պահանջների մասին ու, միգուցե, Ադրբեջանն այս փուլում փորձում է ժամանակ շահել, գնահատել իրավիճակը՝ իր նպատակներին հասնելու համար կոնկրետ ուղղություններով դիմի՞ ռազմական գործողությունների, թե՞ չէ»,- նշեց Աբրահամյանը։
Պատգամավորն ասաց, թե չունի տեղեկություններ այն մասին, որ սահմանագծի տարբեր հատվածներում կան որոշակի վտանգավոր տեղաշարժեր կամ զորքերի կենտրոնացում։
«Ադրբեջանը վերջին տարիներին հսկայական աշխատանք է իրականացրել, որ դեպի առաջնագիծ իր կոմունիկացիաները ոչ միայն ուժեղացնի, այլև դրանք հնարավորինս քողարկված դարձնի, շատ ժամանակ հնարավոր չի լինում ամբողջությամբ կամ ողջ ծավալով հասկանալ, թե կոնկրետ ուղղությամբ երբ ու ինչ տեղի կունենա։ Եթե նույնիսկ այս պահին օպերատիվ իրավիճակը գնահատվում է հարաբերական կայուն, դա կարող է մեկ կամ կես օրվա ընթացքում փոփոխվել ու 24 ժամվա ընթացքում տեղաշարժերը Հայաստանի անվտանգության տեսանկյունց դառնան խիստ սպառնալից», – ընդգծեց Տիգրան Աբրահամյանը։