«Արարատ Միրզոյանի ասուլիսում հնչեցրած հայտարարությունները նման էին իշխանության քաղաքականության ձախողման ու դրա հետևանքով նոր էսկալացիայի ռիսկերի մեծացման մասին ինքնախոստովանական ցուցմունքի»,-Panorama.am-ի հետ զրույցում անման գնահատական տվեց քաղաքագետ Սուրեն Սուրենյանցը։
Նրա խոսքով, երբ արտաքին գործերի նախարարը խոստովանում է, որ Ալիևի հայտարարություններից, Ադրբեջանի 7-րդ խմբագրման առաջարկներից հետո եկել է եզրակացության, որ խաղաղության գործընթացը վտանգված է կամ հետընթաց է ապրում, այլ գնահատական տալ հնարավոր չէ։
«Պետք է արձանագրենք, որ Ալիևի ագրեսիվ քաղաքականության ու Նիկոլ Փաշինյանի դիվանագիտական ձախողման հետևանքով գործընթացը հասել է մի հանգրվանի, որտեղ հայկական կողմը կամ պետք է գնա միակողմանի զիջումների կամ էսկալացիայի վտանգ կա, ինչի մասին Արարատ Միրզոյանը բաց տեքստով հայտարարեց»,-ասաց պատմաբան-քաղաքագետ Սուրենյանցը։
Նրա խոսքով, ասուլիսում հնչեցրած տարբեր հայտարարություններ խնդրահարույց էին, ինչպես օրինակ ականապատման քարտեզների մասին դրվագը. Նիկոլ Փաշինյանը երկու տարի առաջ հայտարարել էր, որ այլևս ականապատ տարածքների քարտեզներ չկան, երեկ ասում է՝ մեկն էլ կարող են տալ, ընդ որում ոչ մի խոսք չկա Բաքվում պահվող պատանդների մասին։
«Ես ակնկալում եմ, որ իշխանությունը քաջություն կունենա ու կհայտարարի, որ սա իր դիվանագիտական ձախողումն է։ Ինչի՞ պրոցեսը հասավ այս կետին։ Դա մեկ օրում, մեկ ամսում չեղավ։ 2022-ի սկզբից Հայաստանի իշխանությունն առաջնորդվում էր Նիկոլ Փաշինյանի գլխում ծնված մի տեսլականով, որ իբր Հայաստանն ու Ադրբեջանն ընդհանուր շահ ունեն Ռուսաստանին այս տարածաշրջանից հեռացնելու հարցում, այդ տեսլականով էլ պատկերացնում էր խաղաղության պայմանագիրը։ Նիկոլ Փաշինյանի բոլոր հաշվարկները սխալ են դուրս եկել, փակուղին, որի առաջ կանգնած է մեր դիվանագիտությունը, դրա հետևանքն է, քանի որ պատկերավոր ասած Պրահայի փաստաթուղթը Ալիևը վաճառեց ռուսների վրա, և մենք ունեցանք մի իրավիճակ, երբ գոյություն ունի նոյեմբերի 9-ի փաստաթուղթ բայց առանց Լեռնային Ղարաբաղի»,-ասաց նա։
Ստեղծված իրավիճակում քաղաքագետն ընդգծում է արտաքին քաղաքականության դիվերսիֆիկացման անհրաժեշտությունը, մինչդեռ այն, ինչ անում է Նիկոլ Փաշինյանի իշխանությունը, դասական դիվերսիֆիկացիայի հետ։
«Նա փորձում է արևմուտքում փրկիչներ փնտրել, Ռուսաստանի հետ թշնամական հարաբերություններ հաստատելու գնով։ Փոխարենը, փրկիչները չեն գտնվելու, իսկ հայ-ռուսական հարաբերությունները հայտնվելու են կամ արդեն հայտնվել են շատ ծանր վիճակում»,-ասաց նա՝ կարևորելով հայ-ռուսական հարաբերություններից տոքսիկ բաղադրիչը հեռացնելը, Թուրքիայի հետ երկխոսությունը, Իրանի հետ արդյունավետ աշխատանքը։
Մանրամասները՝ ձայնագրությամբ։