Հոկտեմբերի 27-ին Ազգային ժողովում սպանված ԱԺ նախագահի տեղակալ Յուրի Բախշյանի այրին՝ Անահիտ Բախշյանը, փետրվարի 2-ին դիմել է դատական դեպարտամենտի ղեկավար Կարեն Փոլադյանին՝ տրամադրելու Հոկտեմբերի 27-ի գործով դատական նիստերի տեսագրությունները, ձայնագրությունները և սղագրությունները։ Կարեն Փոլադյանը, սակայն, չորս օր առաջ խոսել է նրա հետ, ներկայացրել խնդիրը. պարզվում է՝ VHS-ի վրա արված տեսագրությունները և ձայնագրությունները պետք է թվայնացնեն, գրում է 1in.am,-ը։
«Իրենք չունեն թվայնացնելու հնարավորություն։ Ես փորձեցի իմ ծառայություններն առաջարկել, չնայած ինձ ասացին, որ դա պետության պարտականությունն է»,- ասաց Անահիտ Բախշյանը՝ հավելելով. «Ենթադրենք, մարդուն ցմահ են դատապարտել, բայց նոր հանգամանքներ են եղել, և պետք է այդ դատավարության ընթացքը նորից վերանայվի, ինչո՞ւ չեն նախապատրաստվել, պետությունը դրա համար միջոցներ չի տրամադրել՝ չեմ հասկանում։ Կարծում եմ՝ գործը կարճելուց հետո այն գցել են մեկի դարակը, դեպարտամենտի աշխատակիցների մտքով չէր անցել, որ այն կվերաբացվի, և դրանք շատ կարևոր են նախաքննության համար»։
Բախշյանը նշեց, որ մեկ ամսվա ընթացքում իրեն դեպարտամենտից չեն տվել գրավոր պատասխան. «Հեռախոսով, այն էլ միայն իմ նախաձեռնությամբ եմ կապ հաստատել Կարեն Փոլադյանի հետ։ Խառնաշփոթ է, ինչպես ասում են, չգիտեն՝ ինչպես թվայնացնեն այդ քանակի տեսաերիզները»։
Բախշյանի խոսքով՝ կարևոր դատական նիստերի տեսաերիզներ են, որտեղ հանցագործների, հատկապես գլխավոր ահաբեկչի հարցաքննություններն են։ «Հարցաքննությունները շատ կարևոր են, և վերջապես ես ուզում եմ տեսնել՝ ի՞նչ հարցեր եմ տվել նրան, արդյոք այդ ամենը այնպե՞ս է պահպանված, ինչպես ես գրել եմ օրագրում»։
Հոկտեմբերի 27-ի գործի վերաբացումից չափազանց մեծ սպասումներ ունի. «Չեմ կարող ո՛չ դրականը ասել, ո՛չ բացասականը, գործընթացը գնում է փակ դռների հետևում, և ես տեղյակ չեմ, բայց հուսամ, որ այնտեղ գործ անում են, ուղղակի չեն կարող չանել, որովհետև ի վեջո պարբերաբար հրապարակայնորեն խոստացել են ասել, թե ինչ ընթացք ունի, ուր հասան և այլն։ Կա քաղաքական կամք բացահայտելու, ուղղակի ես այդ կամքի արագության ընթացքը մի արագությամբ եմ տեսնում, իրենք այլ արագությամբ են տեսնում։ Բնականաբար կարող եմ սուբյետիվ լինել, բայց այն, որ իրենք խոստացել են, ասել են թե դատախազը, թե դատախազության վերահսկող երեք դատախազները, որոնց հանդիպել եմ, հանդիպել եմ Կարեն Փանոսյանի հետ, իրենք բոլորը ասում են, որ հնարավորինս ամեն ինչ պետք է անեն, որ գործը բացահայտվի, խոստացել են»:
«Քննչական խմբի հետ հանդիպման մասին հրապարակավ արդեն ասել եմ, դրանից հետո ուղղակի հասկանում ենք, որ ժամանակ է պետք, որ թե՛ դատախազները, թե՛ քննչական խումբը նյութերին լիարժեք տիրապետեն։ Ժամանակ է պետք, թե որքան՝ ես չգիտեմ»,- հավելեց նա։
Բախշյանը վստահ է՝ քանի դեռ մարտի մեկի էջը չի բացահայտվել, մյուս բոլորը գործերը չեն բացահայտվելու, քանի որ սա այն հանգուցալուծում տվող գործն է, որի կծիկը քանդելուց հետո շատ այլ կծիկներ կբացահայտվեն, որից հաստատ կուժեղանան պետությունը և հասարակության մեջ պետության նկատմամբ վստահության մակարդակը, որը շատ կարևոր է մեր պետության համար այս բախտորոշ ժամանակաշրջանում։
Բախշյանը կարծում է, որ Հոկտեմբերի 27-ի հետ կապված խորհրդարանական լսումների անհրաժեշտություն կա. «2018-ի փետրվարին ԱԺ-ում մարտի մեկի հետ կապված լսումներ եղան, և այդ օրը ես իմ խոսքում ասացի՝ շատ կարևոր է, որ մարտի մեկի գործի ընթացքի վերաբերյալ ԱԺ-ն լսումներ կազմակերպեց, և ասացի, որ պետք է նաև Հոկտեմբերի 27-ի հետ կապված այդպիսի լսումներ կազմակերպել, բայց դա դեռ չի երևում։ Լսումներ չարեցին, մարտի մեկի առաջնայնությունը հետևանք է հոկտեմբերի 27-ի. եթե ես լինեի այնտեղ՝ վերևներում, Հոկտեմբերի 27-ի թեմայով էլ լսումներ կանեի, բայց ես այնտեղ չեմ, Հոկտեմբերի 27-ին սպանված հարազատներից ոչ մեկը վերևներում չէ, դրա համար էլ երկրորդային պլանում ենք։ Բայց այն, որ գործը վերաբացվեց, սա արդեն լավ է, սա արդեն նշանակում է, որ կա քաղաքական կամք այդ գործը վերաբացելու իր բոլոր խութերով, թաքնված, մտահոգող ուղղություններով, բայց չխոսել ներքին թշնամիների մասին, արտաքին ուղղությունների մասին՝ նշանակում է կոծկել այդ ամենը և հնարավորություն տալ նորից կրկնվելու։ Պետք է հնարավորինս բոլոր ուղղությունների մասին խոսել։ Արամ Զավենի Սարգսյանը խոսում էր վերջերս և ասում՝ որպեսզի այլևս չկրկնվեն նման ահաբեկչությունները, պետք է խոսել այդ մասին և դրանով քոքը կտրել»։