Դատախազությունը հայտնվել է փակուղու մեջ և փորձում է մեղադրանքի փոփոխման երրորդ ռեժիմը նվաճել՝ ՍԴ-ի միջոցով։ Այս մասին ՀՀ երկրորդ նախագահ Ռոբերտ Քոչարյանի և մյուսների նկատմամբ քրեական հետապնդումը ՀՀ ՔՕ 300.1-րդ հոդվածով դադարեցնելու որոշման դեմ բողոքի քննության ընթացքում ասաց ՀՀ նախկին փոխվարչապետ Արմեն Գևորգյանի պաշտպան Էրիկ Ալեքսանյանը։
Ալեքսանյանի դիտարկմամբ՝ ՀՀ երկրորդ նախագահ Ռոբերտ Քոչարյանի և մյուսների նկատմամբ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և քրեական գործով վարույթը կարճելու մասին դատարանի որոշումը հիմնավոր է, օրինական և պատճառաբանված, պահպանվել են օրենսդրության պահանջները։
Ինչ վերաբերում է արարքը վերաորակելու անհրաժեշտության մասին դատախազության պնդումներին,Ալեքսանյանը հիշեցրեց դեռևս 2020թ փետրվար ամսին կայացած դատական նիստը, որի ընթացքում ինքը բարձրացրել էր ՀՀ քրեական օրենսգրքի 300.1-րդ հոդվածի որոշակիության խնդրի և այդ հիմքով քրեական հետապնդումը դադարեցնելու հարցը, ապա հետաքրքրվել, թե ինչու արարքը չի որակվել ՀՀ ՔՕ 309-րդ հոդվածով, ինչին ի պատասխան դատախազ Գևորգ Բաղդասարյանը բացառել էր ՀՀ ՔՕ 309-րդ հոդվածով արարքի որակումը՝ նշելով, որ ընդհանուր և հատուկ նորմերի մրցակցության տեսությունը կիրառելի չէ, ինչի հետ, Ալեքսանյանը համաձայն է։ Նրա դիտարկմամբ՝ մեղադրանքը փոփոխելու տեսանկյունից անհրաժեշտության մասին դատախազի պնդումները հիմնավոր չեն ու հակասում են իր դիրքորոշմանը։ Ըստ Ալեքսանյանի՝ կա մեղադրանքի փոփոխման երկու ռեժիմ՝ քննչական գործողությունների՝ նոր ի հայտ եկած փաստական հանգամանքների արդյունքում և ապացույցների հետազոտման հետ կապված, սակայն երկու ռեժիմն էլ նշված դեպքում կիրառելի չեն, հետևաբար, դատախազությունը, հայտնվելով փակուղու մեջ, փորձում է մեղադրանքի փոփոխման երրորդ ռեժիմը նվաճել՝ ՍԴ-ի միջոցով։
ՀՀ ԶՈՒ ԳՇ նախկին պետ Յուրի Խաչատուրովի փաստաբան Միհրան Պողոսյանն էլ նշեց, որ որոշ բողոքների (նկատի ունի Սեդա Սաֆարյանի կողմից բերված բողոքին) ինքը չի անդրադառնա, քանի որ տպավորություն է, թե Գրիմ եղբայրների ստեղծագործությունից մեջբերում է և նույնիսկ դատախազությունը չէր հասկանում, թե ինչ բողոք է ներկայացվել; Ինչ վերաբերում է ՀՀ քրեական օրենսգրքի 300,1-րդ հոդվածին, ապա Պողոսյանը նշեց, որ այդ հոդվածի՝ հակասահմանադրական ճանաչվելուց հետո այլ որոշում պարզապես չէր կարող կայացվել։ Փաստաբանը նկատեց՝ այլ գործի շրջանակներում դատարանը, վարույթը բացառող հանգամանքի դեպքում, անմիջապես որոշում է կայացրել քրեական հետապնդումը դադարեցնելու մասին՝ նույնիսկ առանց դատական նիստի, իսկ այն, որ այս գործով վերաքննիչ բողոք է ներկայացվել, բարձրացվում է մեղադրանքի փոփոխման հարցը, խոսում է այն մասին, որ այս գործը բացառիկ է և ցանկացած միջոց պետք է կիրառվի, որ գործի ընթացքը շարունակի պահպանվել։
Պողոսյանի խոսքով՝ ՍԴ որոշումից հետո Խաչատուրովը ՀՀ քրեական օրենսգրքի 300,1-րդ հոդվածով կարող էր այնքանով ենթարկվեր քրեական հետապնդման, ինչպես, օրինակ՝ ՀՀ ՔՕ 1500-րդ հոդվածով կամ մեկ այլ հոդվածով, քանի որ չկա քրեական հոդված, որով Խաչատուրովը հանդիսանում է ամբաստանյալ։
Հիշեցնենք, որ մարտի 26-ին ՍԴ-ն ՀՀ քրեական օրենսգրքի 300.1-րդ հոդվածը ճանաչել է Սահմանադրության 78-րդ և 79-րդ հոդվածներին հակասող և անվավեր՝ բավարարելով ՀՀ երկրորդ նախագահ Ռոբերտ Քոչարյանի և Երևանի ընդհանուր իրավասության դատարանի դատավոր Դավիթ Գրիգորյանի դիմումները։
ՍԴ որոշումից հետո ՀՀ գլխավոր դատախազ Արթուր Դավթյանն այս գործով դիմել է ՍԴ, իսկ ՀՀ երկրորդ նախագահի և մյուսների գործով մեղադրանքը պաշտպանող դատախազները միջնորդություն են ներկայացրել՝ քրեական գործի վարույթը կասեցնելու մասին, իսկ պաշտպանական կողմը միջնորդություն էր ներկայացրել՝ քրեական հետապնդումը ՀՀ քրեական օրենսգրքի 300.1-րդ հոդվածով դադարեցնելու և այդ մասով քրեական գործի վարույթը կարճելու մասին։
Բացի այդ՝ Ռոբերտ Քոչարյանի պաշտպանները նաև միջնորդություն էին ներկայացրել՝ Ռոբերտ Քոչարյանի նկատմամբ ընտրված խափանման միջոց գրավի չափը նվազեցնելու կամ անազատության հետ կապ չունեցող այլ խափանման միջոցով փոխարինելու մասին։
Ապրիլի 6-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, արդարացման հիմքով դադարեցրել է Ռոբերտ Քոչարյանի, Յուրի Խաչատուրովի, Արմեն Գևորգյանի, Սեյրան Օհանյանի նկատմամբ քրեական հետապնդումն ՝ ՀՀ քրեական օրենսգրքի 300.1-րդ հոդվածի հատկանիշներով։ Միևնույն ժամանակ դատարանը մերժել է Ռոբերտ Քոչարյանի պաշտպանների՝ խափանման միջոցի վերաբերյալ միջնորդությունը։
Դատախազ Գևորգ Բաղդասարյանը վերաքննիչ բողոք է ներկայացրել՝ պահանջելով բեկանել առաջին ատյանի դատարանի որոշումը, Ռոբերտ Քոչարյանի և մյուսների նկատմամբ քրեական հետապնդումը դադարեցնելու մասին դատարանի որոշումը բողոքարկել է նաև տուժող կողմը։ Բացի դա՝ պաշտպանության կողմը ևս վերաքննիչ բողոք է ներկայացրել՝ վիճարկելով Ռոբերտ Քոչարյանի խափանման միջոցը փոխելու կամ գրավի չափը նվազեցնելու միջնորդությունը մերժելու մասին որոշման մասով։
Վերաքննիչ բողոքները կքննվեն համատեղ՝ Վերաքննիչ քրեական դատարանի դատավոր Նարինե Հովակիմյանի նախագահությամբ, կազմով՝ դատավորներ Սևակ Համբարձումյանի և Կարեն Մարդանյանի։
Հեղինակ՝ Իզաբել Սահակյան
Աղբյուր` Փաստինֆո