Անընդունելի է ՀՀ-ում ՌԴ-ի հասցեին հնչող մեղադրանքները. Զախարովա
Այս մասին Երևանում ընթացող ռուս-հայկական մեդիա ֆորումի մասնակիցներին ուղղված ողջույնի խոսքում հայտարարել է ՌԴ ԱԳՆ տեղեկատվության և մամուլի դեպարտամենտի տնօրեն Մարիա Զախարովան։
Նրա խոսքով՝ Մոսկվան և Երևանը տասնամյակներ շարունակ արդյունավետ համագործակցել են:
«Ամենադժվար պահերին մենք օգնել ենք եղբայրական հայ ժողովրդին։ ՌԴ նախագահ Վլադիմիր Պուտինի անձնական մասնակցության շնորհիվ 2020թ.-ին պատերազմը դադարեցվեց: Ռուսաստանի նախագահը գործադրեց բոլոր ջանքերը, որպեսզի ստորագրվի 2020 թվականի նոյեմբերի 9-ի եռակողմ հայտարարությունը, որը ամուր հիմք դարձավ խաղաղության հասնելու և Բաքվի և Երևանի միջև հարաբերությունների կարգավորման ուղղությամբ հետագա աշխատանքի համար։ Ռուսաստանի Դաշնության ղեկավարությունը մշտական և անկեղծ հետաքրքրություն է ցուցաբերում ՀԱՊԿ իր դաշնակցի ճակատագրի նկատմամբ», – ասել է Զախարովան։
Նա հիշեցրել է, որ Ռուսաստանը Հայաստանի տնտեսության հիմնական օտարերկրյա ներդրողն է և էներգառեսուրսներ է տրամադրում արտոնյալ գներով։
«Մեր սահմանապահներն իրենց հայ գործընկերների հետ պաշտպանում են երկրի՝ Թուրքիայի, Իրանի և Ադրբեջանի հետ սահմանները։ Այս ամենը պահպանելու համար անհրաժեշտ է պահպանել ռուս-հայկական հարաբերությունների առողջ տեղեկատվական ֆոն։ Այս խնդիրը դրված է ինչպես պետական իշխանությունների, այնպես էլ լրատվամիջոցների ուսերին։ Կարծում եմ, որ ո՛չ ձեզ, ո՛չ մեզ չի կարող բավարարել այն հստակ միտումը, որը վերջին շրջանում տիրում է Հայաստանի տեղեկատվական դաշտում՝ Ռուսաստանի և հայ-ռուսական հարաբերությունների մասին միակողմանի, բացասական, հաճախ պարզապես իրականությանը չհամապատասխանող տեղեկատվության տարածման ուղղությամբ։
Սա, անշուշտ, հակասում է երկու ժողովուրդների միջև ավանդական բարեկամական բնույթին։ Եկեք բաց խոսենք խնդիրների մասին։
Մենք անընդունելի ենք համարում մեր ժողովուրդների միջև թշնամություն և ատելություն սերմանելու փորձերը՝ Ռուսաստանին մեղադրելով հայ ժողովրդի բոլոր դժբախտությունների համար։ Օդիոզային նախադեպ է Պետդումայի ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահի առաջին տեղակալ Կոնստանտին Զատուլինին, Russia Today և RT հեռուստաալիքի գլխավոր խմբագիր Մարգարիտա Սիմոնյանին, միջազգային հարցերի փորձագետ Անդրանիկ Միհրանյանին, մեդիամենեջեր Արամ Գաբրելյանովին «սև ցուցակում» ընդգրկելը, ինչպես նաև այս տարվա օգոստոսին երկիր մուտք գործելու մերժումը Ռուսաստանի և Հայաստանի միջև բարեկամության և համագործակցության ընկերության նախագահ, ՀՀ-ում գիտության և մշակույթի ռուսական կենտրոնի նախկին ղեկավար Վիկտոր Կրիվոպուսկովին:
Երեկ թե՛ Ռուսաստանի, թե՛ Հայաստանի տեղեկատվական դաշտը բառացիորեն ցնցեց «Sputnik Արմենիա» ռադիոյի վերլուծաբան Աշոտ Գևորգյանի և բլոգեր Միկա Բադալյանի ձերբակալումը։ Ռուս-հայկական այս մեդիա ֆորումի ժամանակ ուղղակիորեն կատարված սադրանքը, ըստ ամենայնի, նպատակ ուներ խաթարելու երկկողմ հարաբերությունների և մեր ընթացիկ օրակարգի համար այս կարևոր իրադարձությունը։
Ակնհայտ է, որ այս սադրանքի հետևում կանգնած են հենց այն ուժերը, որոնք շահագրգռված չեն մեր երկրների և նրանց ժողովուրդների մերձեցմամբ, այլ շահագրգռված են հակառակով՝ մարդկանց իրարից հեռվացնել, ատելություն, վախ, անվստահություն սերմանել։
Մեզ մտահոգում է, որ Հայաստանում ավելանում են արևմտամետ կողմնակալությամբ զբաղվող լրատվամիջոցները, որոնք նպատակ ունեն վարկաբեկել մեր երկիրը և մեր հարաբերությունները։
Ցավոք, Հայաստանում կան նաև տեղեկատվական ռեսուրսներ, որոնք բացահայտ ցեխ են շպրտում, ոչ թե քննադատում, այլ ցեխ են շպրտում փոխգործակցության մեր ընդհանուր միջպետական մեխանիզմների, այդ թվում՝ ՀԱՊԿ-ի և ԵԱՏՄ-ի վրա։
Ուզում եմ ընդգծել՝ այս քարոզչությունը ոչ միայն սոսկ խրախուսվում է «հավաքական Արևմուտքի» կողմից, այլ խթանվում է առատաձեռնորեն ֆինանսավորվող բազմաթիվ, այսպես կոչված, ՀԿ-ների, «փորձագետների» և դրամաշնորհների միջոցով: Դատելով նրանց հեռարձակման ինտենսիվությունից և հաղորդումների որակից, ամերիկյան տարբեր հոսթինգային կայքերում և սոցցանցերում նյութերի լայն տարածումից՝ նրանք ֆինանսական միջոցների պակաս չունեն։ Այս, այսպես կոչված, տեղեկատվական ակցիայի հիմնական թիրախային լսարանը երիտասարդությունն է: Արևմտականները հարձակվում են ամենահրատապ խնդիրների վրա՝ նպատակ ունենալով հանրապետությունում հասարակական տրամադրությունների վեկտորը տեղափոխել հակառուսականի։ Ավելին, նրանց ընդհանրապես չի մտահոգում տարածաշրջանի ապագան, վերջնական նպատակը գեղեցիկ խոսքերի քողի տակ եղբայրական ժողովուրդների միջև տարաձայնություններ առաջացնելն է, անվտանգությունն ու կայունությունը խաթարելը միայն մեկ նպատակով՝ թուլացնել Ռուսաստանի ազդեցությունը և ընդհանուր քաոս սերմանել այս տարածաշրջանում: Եվ, իհարկե, այս առումով մեր աչքի առաջ Ուկրաինայի օրինակն է», – ասել է Զախարովան։