«Կրոկուս սիթի հոլի» ահաբեկչությունից երկու շաբաթ առաջ՝ մարտի 6-ին, ԱՄՆ իշխանությունները նախազգուշացրել են Ռուսաստանին, որ հենց այդ հարթակը կարող է դառնալ գրոհի պոտենցիալ թիրախ, գրել է The Washington Post-ը՝ հղում կատարելով անանուն ամերիկացի պաշտոնյաներին, որոնք ծանոթ են քննարկվող հարցին։
Պարբերականը նշել է, որ «կոնկրետության բարձր մակարդակը» ընդգծում է, որ Վաշինգտոնը վստահ է, որ ահաբեկչությունը պատրաստում է «Իսլամական պետությունը»։ Սա հակասում է Մոսկվայի այն հավաստիացումներին, որ ԱՄՆ նախազգուշացումները խիստ ընդհանուր էին, եւ «բարձրացնում է այն հարցը, թե ինչու ՌԴ իշխանությունները ավելի ընդարձակ միջոցառումներ չեն ձեռնարկել» մարդկանց պաշտպանելու համար, գրել է թերթը։
Վաշինգտոնը մշտապես տեղեկություն է տրամադրում հնարավոր ահաբեկչությունների մասին այլ երկրների։ Մոսկվայում ահաբեկչության պատրաստման մասին տեղեկությունը նշել է Ռուսաստանում ամերիկացիների համար պոտենցիալ վտանգի մասին։
Ինչպես գրել է WP-ն, եղել են նշաններ, որ Ռուսաստանի իշխանությունները համենայն դեպս սկզբում լուրջ են վերաբերվել նախազգուշացմանը։ Պարբերականի զրուցակիցներից մեկի խոսքով՝ ԱՄՆ հաղորդումը ներառել է այդ թվում տեղեկություն սինագոգում ահաբեկչության պատրաստման մասին։ Հաջորդ օրը ԱԴԾ-ն նշել է, որ կանխել է ԻՊ հարձակումը Մոսկվայի սինագոգի վրա։
Ազգային անվտանգության խորհրդի ներկայացուցիչը հրաժարվել է մեկնաբանություններից։ ՌԴ նախագահի մամուլի քարտուղար Դմիտրի Պեսկովը չի պատասխանել լրագրողների հարցերին։
Մարտի 7-ին Ռուսաստանում ԱՄՆ դեսպանությունը տեղեկացրել է, որ «ծայրահեղականները նախատեսում են առաջիկայում գրոհել մարդկանց խոշոր կուտակումների վայրերը Մոսկվայում, ներառյալ համերգասրահները»։ Ահաբեկչությունից երեք օր առաջ՝ մարտի 19-ին, Վլադիմիր Պուտինը արեւմտյան իշխանությունների «սադրիչ հայտարարություններն» անվանել է «բացահայտ շանտաժ» եւ հասարակությանն ապակայունացնելու մտադրություն։
Ահաբեկչությունից մի քանի օր հետո ԱԴԾ տնօրեն Ալեքսանդր Բորտնիկովը խոստովանել է, որ ԱՄՆ հատուկ ծառայությունները Մոսկվային նախազգուշացրել են հարձակման պատրաստման մասին, բայց այդ տեղեկությունը կրել է ընդհանուր բնույթ։ Այս մասին ապրիլի 2-ին հայտարարել է նաեւ ՌԴ Արտաքին հետախուզության ծառայության տնօրեն Սերգեյ Նարիշկինը։
Ահաբեկչության պատասխանատվությունը անմիջապես ստանձնել է ԻՊ «Վիլայաթ Խորասան» աֆղանական խմբավորումը։ Բայց Ռուսաստանի իշխանությունները ահաբեկչության մեջ «ուկրաինական հետք» են տեսել։