Ռուսական կողմը շատ է ափսոսում, որ Հայաստանը մասնակցել է Վաշինգտոնում ՆԱՏՕ-ի գագաթնաժողովին, «ՌԻԱ Նովոստի»-ին հայտնել է ՌԴ փոխարտգործնախարար Միխայիլ Գալուզինը։
Խոսելով անվտանգության ոլորտի մասին՝ Գալուզինն ընդգծել է, որ Հայաստանը մնում է ՀԱՊԿ անդամ, հանդես է գալիս որպես մասնակից ռազմական և ռազմատեխնիկական ոլորտներում բազմաթիվ երկկողմ պայմանագրերի։ Բայց Երևանի մտահոգությունները քննարկելու կառուցողական մոտեցման փոխարեն, ցավոք, նրանք այլ ճանապարհ են ընտրել, ասել է ՌԴ ԱԳՆ ղեկավարի տեղակալը։
«Հայաստանը նախընտրում է մեծացնել փոխգործակցությունը ՆԱՏՕ-ի կամ դաշինքի առանձին անդամների հետ, հատկապես ՆԱՏՕ-ի չափանիշների ներդրման, սպառազինության գնման կամ համատեղ մարտական պատրաստականության միջոցառումներ իրականացնելու առումով, էլ չխոսելով Վաշինգտոնում ընթացող այս ռազմաքաղաքական դաշինքի գագաթնաժողովին մասնակցելու մասին։ Այս ամենը կարող է առաջացնել ոչ այլ ինչ, քան ծայրահեղ ափսոսանք»,- ասել է նա:
Դիվանագետի տեսանկյունից, «համագործակցությունը այդպիսի տեմպերով խորացնելով նրանց հետ, որոնց նպատակը Ռուսաստանի «ռազմավարական պարտությունն» է, Երևանն իր ձեռքով ռիսկի է դիմում լրջորեն ապակայունացնել իրավիճակը Հարավային Կովկասում, այդ թվում՝ ի վնաս սեփական անվտանգության»։
Նրա խոսքով՝ Հայաստանում բանիմաց մասնագետներն ու քաղաքական գործիչները հասկանում են նման անշրջահայաց քայլերի հնարավոր վնասնրը։
«Իմ կարծիքով, «երկու աթոռի վրա նստելու» փորձերի անիրատեսական լինելու մասին, թեկուզ և մյուսը՝ տնտեսական ոլորտում, շատ հստակ արտահայտվել է Ռուսաստանի փոխվարչապետ Ալեքսեյ Օվերչուկը՝ ելույթ ունենալով Մոսկվայում «Պրիմակովյան ընթերցումներ» ֆորումում անցյալ ամսվա վերջին՝ խոսելով Երևանի եվրաձգտումների մասին՝ կապված ԵԱՏՄ-ում ստանձնած նրա պարտավորությունների հետ»,- նշել է Գալուզինը։
Հավելենք, որ Վաշինգտոնում ընթացող ՆԱՏՕ-ի գագաթնաժողովին մասնակցում է ոչ միայն ՀՀ ԱԳ նախարար Արարատ Միրզոյանը, այլև Ադրբեջանի արտգործնախարար Ջեյհուն Բայրամովը, Թուրքիայի նախագահ Ռեջեփ Էրդողանը: