Քաղաքագետ Ստյոպա Սաֆարյանը գրում է․
2000-ականներին Երևան քաղաքում Գետառը գետնի տակ էինք մտցնում, որ դրա վրա կառուցված օբյեկտներում տրնգի պարենք, հեռուն չմտածելով, որ բնությունը ի սկզբանե բնական հեղեղատարներ է ստեղծել ու քաղաքի կենտրոնում լիքը փողոցների հեղեղատարներ կարող էին միացվել այդ գետակին՝ նման հետևանքներից խուսափելու համար։ Հիմա եթե անգամ կենտրոնի մի հատվածում ասենք թե հեղեղատար կառուցվի, գնա ո՞ւր լցվի․․․ Արքայաձո՞ր, Գոլդեն ջի՞մ, Թեքեյան Կենտրո՞ն ու այսպես շարունակ․․․
Մի քննարկման ներքո կարդացի՝ նախկինների մի երկրպագու նախկինների դիրքերից հեգնել էր ներկաներին․ «դե լավ ա, հասնում ա, ապագա կա»։ Չուզեցա գրեմ՝ այսօրվա ներկան ապագա էր հենց երեկ, երբ Գետառի վրա տրնգի պարելն ու փորոտիքը քյաբաբով լցնելն ավելի կարևոր էր համարվում, քան վաղվա ապագան, որն այսօր է։ Ու մենք և այլոք դրան դեմ էինք, իսկ այսօր ապագա հեգնողները՝ լուռ։ Գրվածն, անշուշտ, ամենևին չի նվազեցնում ներկայիս իշխանության /կենտրոնական թե քաղաքային/ պատասխանատվությունը կամ արդարացնում նրանց անգործությունը։
Ուղղակի այդպես է․ միշտ ընդունված ու շահավետ չէ երկարաժամկետ հեռանկարների ու հիմնարար խնդիրների լուծումների մասին խոսելը։ Իշխանությունները, բիզնեսը, մարդիկ միշտ նախընտրել են կարճաժամկետ էֆեկտները, օգուտները, քվեն․․․ Հո՞ Ալեքսանդր Թամանյանի նման անշնորհակալ կերպով քաղաքի հեռավոր ու հարմարավետ ապագայի մասին չէին մտածելու․․․ Միշտ մտածել ենք կարճի, նաղդի, այսօրվա, քեշի մասին, այդ պահին աչք շոյողի, կամ վարչապետի վերլուծած «որտեղ հաց, այնտեղ կաց»-ի մասին․․․ Ասենք, օրինակ, ապրի Կարեն Կարապետյանը՝ շենքերի ֆասադ է ներկել, ապրի Տարոն Մարգարյանը՝ պուրակում ծաղիկ է տնկել ու ֆլամինգոներ դրել, ապրի Ավինյանը՝ կիլոմետրով ասֆայլտ է արել․․․ Ոչինչ որ քաղաքի բնակֆոնդի սեյմակայունության ու ամրացման հարց լուծված չէ, որ լիքը բակեր փակ են հրդեհային մեքենաների մուտքի համար, փողոցների հեղեղատարներ չկան ու դժվար թե լուծում գտնվի․․․․Ոչինչ որ երկրաշարժի, հրդեհների, փլուզումների, հեղեղումների ու այլ բաների որևէ կերպ պատրաստված չենք, մեր դժբախտությունների վրա չենք սովորում ու նույնիսկ սարսափում ես պատկերացնել պատկերանող վնասները․․․
Իսկ քաղաքը սարսափելի խոցելի է մնում բնական ու անթրոպոգեն /մարդածին/ ֆորս մաժորներին դեմ հանդիման․․․