PrimeNews.am-ի հարցազրույցը Արցախի նախագհի խորհրդական, քաղաքագետ Տիգրան Աբրահամյանի հետ բանակցությունների շուրջ վերջին զարգացումների վերաբերյալ
Պ-ն Աբրահամյան, Բրատիսլավայում Ադրբեջանի և Հայաստանի արտգործնախարարների հանդիպումն ավարտվեց, ի՞նչ տպավորություններ ունեք:
– Իմ տպավորությամբ, սա հանդիպում էր հաջորդ հանդիպման մասին պայմանավորվելու համար, որի նպատակն է ցույց տալ, որ ամեն դեպքում բանակցություններ ընթանում են: Մյուս կողմից նկատելի է, որ միջնորդները գերագնահատում են լրագրողների փոխայցերի նշանակությունը և փորձում են երկխոսությունը դրա վրա կառուցել, նպատակը՝ հանդիպումների շարունակականություն ապահովելն է:
Մինչև հանդիպումը Բաքվի կողմից շրջանառության մեջ էր դրվել ԼՂ հակամարտության կարգավորման վերաբերյալ իր տեսլականը, որը ավելի շատ նման էր ուլտիմատումի: Ի՞նչ եք կարծում, ինչ նպատակ էր հետապնդում Ադրբեջանը նման նման փաստաթուղթ հրապարակելով հանդիպումից առաջ:
– Ինչ վերաբերվում է շրջանառված փաստաթղթին, ապա դա Ադրբեջանի ամփոփ դիրքորոշումն էր հակամարտության կարգավորման վերաբերյալ, որը չի բխում ներկայումս ընթացող գործընթացի սկզբունքներից: Միշտ չէ, որ իրադարձությունների հրապարակային փուլում խոսվում է այն ամենի մասին, ինչ խոսվել կամ քննարկվել է փակ դռների հետևում: Կողմերը 3 ժամ փակ հանդիպում են անցկացնում, իսկ դրանց հետևող մամլո հաղորդագրությունները հիմնականում քիչ բան են ասում դրանում քննարկված օրակարգի շուրջ: Մի կողմից, դա բխում է այդ գործընթացին հատուկ կոնֆիդենցիալ կոմպոնենտից, մյուս կողմից՝ Ադրբեջանի տեղեկատվական ակտիվությունը շատ դեպքերում մեր դաշտում հակասական լուրերի շրջանառության հիմք է տալիս, որը պետք է ժամանակին «ծածկել»: Ծածկել ասելով նկատի չունեմ ծածկադմփոց անելը, այլ ժամանակին տեղեկատվությամբ ապահովել:
Փաստաթղթում ադրբեջանական կողմը գրեթե ուլտիմատիվ կերպով պահանջել էր՝ «հայկական զինված ուժերը պետք է դուրս բերվեն գրավյալ տարածքներից, բռնի տեղահանվածները վերադառնան, իսկ Ղարաբաղը պետք է լինի Ադրբեջանի կազմում»: Հայկական կողմը կարծես մեղմ արձագանքեց այդ փաստաթղթին: Ի՞նչ կարծիքի եք:
– Ադրբեջանի նմանօրինակ հայտարարություններին բազմիցս առիթ եղել է արձագանքելու: Ադրբեջանի մոտեցումները անթույլատրելի ծայրահեղ բնույթ են կրում, որոնք ավելի շատ իրավիճակը հրում են փակուղի: Այլ բան է, որ Ադրբեջանն առիթ է փնտրում դուրս գալու բանակցություններից, բայց ամեն ինչ անում է, որպեսզի այդ քայլին գնան հայկական կողմերը: Վերադարձ անցյալին ոչ մի դեպքում չի լինելու, որքան էլ Ադրբեջանը պնդի կամ բողոքի միջազգային տարբեր կառույցներում: Արցախում ապրող մարդիկ իրենց ասելիքն ու անելիքն արել են, հիմա այդ նույն մարդիկ գնում են Արցախի միջազգային ճանաչման ու երկրի շենացման ճանապարհով:
Որոշ շրջանակներ պնդում են, որ հայկական կողմը պետք է բոյկոտեր այս բանակցությունները այդ փաստաթղթի հրապարակումից հետո: Դուք ի՞նչ կասեք, արդյոք պետք էր ավելի կոշտ լինել:
– Բանակցությունների մանրամասներին չեն տիրապետում, կարգավիճակս էլ թույլ չի տալիս զուտ փորձագիտական գնահատականներ հնչեցնելու համար: Կոշտացման հետ կապված էլ պետք է նշեմ, որ Ադրբեջանի առավելապաշտական դիրքորոշումը ինքնաբերաբար բերում է մեր դիրքորոշումների կոշտացմանը:
Դուք պարբերաբար լինում եք առաջնագծում, ի՞նչ կասեք, ինչպիսի՞ իրավիճակ է այնտեղ: Կա՞ լարվածություն:
– Իրավիճակն ընդհանուր առմամբ համեմատաբար հանգիստ է: Լինում են շաբաթներ, երբ հրադադարի ռեժիմի խախտումները նվազում կամ ավելանում են, սակայն ընդհանուր առմամբ, վերահսկելի վիճակ է:
