«Ա1+»-ը դատական հայց է ներկայացրել ՀՀ կառավարության դեմ կորցրած իրավունքները վերականգնելու համար. «Ա1+»-ը զրկվել էր եթերից, 2003-ից 7 անգամ մասնակցել ՀՌԱՀ-ի մրցույթների և պարտվել, և այսօր փորձում է հասնել նրան, որ դրանց վերաբերյալ դատարանների որոշումները դատական կարգով անօրինական ճանաչվեն։ Լրագրողների հետ հանդիպմանը պաշտպան Դավիթ Ասատրյանն ասաց, որ հայցը վերաբերում է «Ա1+»-ին հեռուստաեթերից զրկելուն, քանի որ այժմ փաստաթղթերն ուսումնասիրելով տեսնում են, որ իրավական որոշումները կայացված են կամայական, առանց հիմնավորման ու պատճառաբանությունների:
«Առկա հիմքերը թույլ են տալիս պնդելու, որ կայացված որոշումներն առոչինչ են, այսինքն պարունակում են առերևույթ խախտումներ, որոնց հիման վրա պնդում ենք՝ առկա է իրավունքի խախտում, այն պետք է վերացվի ու այդ իրավունքի խախտումը պետք է ճանաչվի: Ի՞նչ կտա դա մեզ: Կարծում ենք՝ այդ իրավունքի պաշտպանությամբ դիմելով՝ առաջին հերթին խախտված իրավունքը կհռչակենք ներպետական դատարաններում, որպեսզի այդ ժամանակաշրջանին տանք իրավական գնահատական»,- ասաց նա:
Պաշտպաններից Արա Ղազարյանի խոսքով, ուզում են վերականգնել պատմական արդարությունը, ներպետական դատարաններից հայցել ազգային օրենքների խախտումով ընդունված վարչական ակտերի արդյունքում «Ա1+»-ի լիզենցիան կորցնելը:
««Ա1+»-ը դարձել է խտրականության զոհ, բայց մինչև հիմա արդարացի փոխհատուցում չի ստացել: Նույնիսկ եթե հենց այսօր լիցեզիա տան, արդարացի փոխհատուցում չի լինի, քանի որ կրել է մեծ վնասներ, նյութական, նաև գործարար համբավը, որը նույնպես կապիտալ է: Մեր նպատակն է հենց այդ վնասների հետևից գնալ: Այսինքն՝ 2003, 2004, 2010 թվականներին կայացվել են վարչական ակտեր, որոնք առոչինչ են, անարդարացի են, ուզում ենք, որ մեր դատարաններն արձանագրեն, որ ոչ թե խախտվել է Եվրոպական կոնվենցիան, այլ ազգային այս, այս օրենքը»,- ասաց փաստաբանը:
Ա1+» հեռուստաընկերության հիմնադիր տնօրեն Մեսրոպ Մովսիսյանն ասաց, որ 17 տարի այս նույն գործընթացի մեջ էին, իսկ 3 տարի դադար վերցնելը չէր նշանակում, որ մտադրություն չունեին շարունակել:
«Ինչո՞ւ հիմա: Առջևում սպասվում է հեռուստակապուղու մրցույթ, մտադիր ենք մասնակցել, բայց մասնակցելուց առաջ կուզեինք բոլոր հարցերի պատասխանները ստանայինք ու նոր գնայինք մրցույթի: Մասնակցել ենք շուրջ 7 մրցույթի, միշտ մի որոշում է եղել՝ մերժում, և այդ մերժումը եղել է անհիմն, կարգադրանքի ներքո:
Ինչո՞ւ հիմա: Որովհետև զգում եմ, որ դաշտը բավականին մաքուր է, այդ մարքության մեջ ուզում ենք սկզբից մաքրել մեր անունը»,- նշեց նա:
Հիշեցնենք, որ դեռևս 2008-ին Մարդու իրավունքների եվրոպական դատարանը որոշել էր, որ Հայաստանում խախտվել է «Ա1+» –ի սեփականատեր«Մելտեքս» ՍՊԸ-ի իրավունքները, մասնավորապես Մարդու իրավունքների եվրոպական կոնվենցիայի` խոսքի ազատությանը վերաբերող 10-րդ հոդվածը` այն պատճառով, որ Հեռուստատեսության և ռադիոյի ազգային հանձնաժողովը (ՀՌԱՀ) պատշաճ կարգով չէր հիմնավորել լիցենզիայի տրամադրումը մերժելու մասին որոշումը: ՄԻԵԴ ՀՀ–ին պարտավորեցրել էր «Մելտեքս» ՍՊԸ-ին վճարել 30 000 եվրո` որպես ոչ նյութական վնասի ու դատական ծախսերի փոխհատուցում։