«Հայաստանի քաղաքական, պետական կառավարման համակարգը, ինստիտուցիոնալ հիմքերը պատրաստ չեն արտահերթ խորհրդարանական ընտրություններ անցկացնելու համար»,- ասուլիսում ասաց «Մեկ Հայաստան» կուսակցության նախագահ Արթուր Ղազինյանը:
Նրա խոսքով, հասարակության մեջ դեռևս գերիշխում է հուզական ֆոնը, չափից դուրս հուզականությունը, զգացմունքայնությունը հնարավորություն չի տալիս իրական քաղաքական գործընթաց սկսելու համար:
«Տարբեր ճամբարների բաժանում, այդ ճամբարների հակադրում, հնի ու նորի, սևի ու սպիտակի բաժանում, ատելության խոսք, թշնամանք, որը տարածված է, չի նպաստում ընտրական գործընթացին: Անհրաժեշտ է ձևավորել կայուն քաղաքական համակարգ, կատարելագործել և էֆեկտիվության բարձր աստիճանի բարձրացնել պետական ինստիտուտների աշխատանքը, որից հետո նոր հնարավորություն կունենանք մտածելու արտահերթ խորհրդարանական ընտրությունների մասին: Այն, որ այսօրվա խորհրդարանն այսօրվա դրությամբ չի արտահայտում, չի արտացոլում հասարակական, քաղաքական տրամադրությունները, փաստ է, այդ 70 և ավելի տոկոսն այլևս գոյություն չունի, հուզական մանդատ էր, հուզական վարկանիշ էր առանց քաղաքական ամրապնդման: Չի ներկայացվել որևէ քաղաքական ծրագիր՝ ինչ է պետք անել, հետևաբար այսօրվա իշխանությունից պահանջել կառուցել ինչ-որ մի բան, ստեղծագործել ինչ-որ մի հարցում, գտնել և առաջարկել լուծումներ առկա խնդիրներին, ուղղակի անիմաստ զբաղմունք է, նրանք նման խոստում չեն տվել»,- ասաց Ա. Ղազինյանը:
Նա նշեց, որ քաղաքական իշխանության մոտ գործում է քաղաքական անհանդուրժողականության մթնոլորտ ցանկացած այլախոհության և այլակարծության դեմ:
«Յուրաքանչյուր քաղաքական ուժի կողմից իշխանության հասցեին հնչող քննադատությունն անմիջապես պիտակավորվում, որակվում է, այսօրվա քաղաքական ուժը, որը կարելի է քաղաքական համարել շատ մեծ պայմանականությամբ, ձգտում է ամբողջատիրության: Այսինքն նրանք գտնում են, որ իրենցից առաջ ոչինչ չի եղել, և կյանքը սկսվում է բացառապես իրենցից, այսինքն մինչ մեզ ամեն ինչ եղել է շատ վատ, այսուհետև ամեն ինչ շատ լավ է լինելու: Սա խորը մոլորություն է, որովհետև կյանքն ոչ իրենցով սկսվել է ու ոչ իրենցով ավարտվելու է, մի փոքր փուլ է, շատ փոքր էպիզոդ է իրենց անուններով, իրենց մարդկանցով հայկական պետականության և հայ ժողովրդի մեծ, երկար պատմության ընթացքում: Թող մոլորության մեջ չընկեն, խորհուրդ կտամ կանգնել գետնին, իրականությունը ճիշտ պատկերացնել, իրենց հորինած հեղափոխությամբ շատ չտարվել: Եկել է աշխատելու ժամանակը: Թողեք հեղափոխությունը, զբաղվեք ձեր գործով, եթե, իհարկե, կարող եք զբաղվել գործով,- ասաց Ա. Ղազինյանը:
Ինչ վերաբերում է քաղաքական ուժերի հետ համագործակցությանը, նա նշեց, որ «Մեկ Հայաստան» կուսակցությունը, լինելով կենտրոնամետ քաղաքական ուժ, համագործակցում է քաղաքական բոլոր բևեռների հետ, այսինքն իրենք չեն բացառում որևէ համագործակցություն:
«Օրինակ, նախաձեռնելով Արցախը ճանաչելու մասին Հայաստանի օրենքի մշակումը, յուրօրինակ ձեռք է մեկնած իշխանություններին՝ օգնելու Արցախի հարցում հայանպաստ դիրք և առավել ամուր դիրքերից բանակցային գործընթացում հանդես գալու համար: Այսինքն՝ ընդդիմությունն իշխանության դեմ չի գործում որպես կանոն, այլ օգնում է»,- ասաց «Մեկ Հայաստան» կուսակցության նախագահը:
ԱԱԾ նախկին տնօրեն Արթուր Վանեցյանի հետ հանդիպման ու հնարավոր համագործակցության մասին հարցին՝ Ա. Ղազինյանը պատասխանեց. «Եթե ձեզ հետաքրքրում է առհասարակ քաղաքական փոխգործակցության վերաբերյալ առաջարակություն եղել է, թե ոչ: Ոչ, նման առաջարկություն չի եղել: Նման առաջարկության համար ստեղծվում են բարենպստ միջավայր, մթնոլորոտ, զրույց, համընկնումներ, գաղափարական ընդհանրություններ, անելիքի հետ կապված ընդհանուր պատկերացումներ: Այստեղ ամենակարևոր հարցը հետևյալն է՝ պարոն Վանեցյանն առհասարակ քաղաքական գործընթացների մեջ ակտիվորեն ներգրավելու ցանկություն ունի՞, թե՞ ոչ: Ճշտեք իրենից: Ես նրան նման հարց չեմ տվել: Պատահական հանդիպել ենք ինքնաթիռում, նույն ինքնաթիռով եկել ենք Երևան: Ընդամենը եղել է զրույց, մտքերի փոխանակություն, համատեղ գործելու որևէ պայմանավորվածություն չենք ունեցել: «Մեկ Հայաստան» կուսակցության օրակագում որևէ մեկին միանալու հարց դրված չէ, բայց մենք բաց ենք համագործակցության, փոխգործակցության համար»:
Խոսելով կոնկրետ կրթության, գիտության, մշակույթի, սպորտի նախարարության վարած քաղաքականության մասին, մասնավորապես բուհերում հայագիտական առարկաները ոչ պարտադիր դարձնելուն, տարբեր ֆիլմեր ու ներկայացումներ ֆինանսավորելուն, արդյո՞ք այդ ամենը զուգադիպություն է, թե՞ ուղղորդված է, նա ասաց. «Կրթության գիտության, մշակույթի և սպորտի նախարարությունն այսօր ղեկավարվում է գաղափարական գլոբալիստներից կողմից, որոնց համար ազգային բառն առաջացնում է զայրույթ, թիրախ է, որը պետք է ոչնչացնել»:
Ինչ վերաբերում է իշխանության հայտարարած տնտեսական հեղափոխությանը, Ա. Ղազինյանն ասաց, որ առհասարակ «տնտեսական հեղափոխություն» տերմինն արդեն իսկ կազուսային է, տնտեսությունն ու հեղափոխությունը անհամատեղելի երևույթներ են:
«Տնտեսությունը ենթադրում է կայունություն, կանխատեսելիություն, խաղի կանոնների որոշակիություն, նորմատիվ, իրավական դաշտի կայունություն, քաղաքական դաշտի կանխատեսելիություն: Հեղափոխությունը մերժում է այդ ամեն ինչը»:
Նրա խոսքով, տնտեսական հեղափոխության ամբողջ թեզը հիմվում է հսկիչ դրամարկային մեքենաների կտորների վրա, կառավարության կողմից որևէ այլ ռազմավարական ուղղություն ներկայացված չի եղել, ռազմավարություն չկա, թե տնտեսությունն ինչպես պետք է զարգանա: «Ի՞նչ հեղափոխության մասին ենք մենք խոսում, առհասարակ, ի՞նչն է հեղափոխություն»,- հարցադրում արեց նա:
Ա.Ղազինյանն ասաց, որ 2020 թվականի պետական բյուջեի հետ կապված կանխատեսված 4,9 տոկոս տնտեսական աճը խոսում է կառավարության անգործության մասին, որովհետև միջնաժամկետ ծախսերի մեջ դրված ցուցանիշը, որ տնտեսությունն ինքն իրենով, իներցիոն զարգացմամբ, եթե ոչինչ չանի կառավարությունը, 4,5 տոկոս կաճի, այսինքն կառավարության բոլոր ջանքերն ուղղված են 0,4 տոկոս տնտեսական աճի ապահովմանը. «Եթե սա կհամարեք տնտեսական հեղափոխություն, եկեք դա համարենք տնտեսական հեղափոխութուն»:
«Մեկ Հայաստան» կուսակցության նախագահն ընդգծեց, որ 2020 թվականին սպասվում է ծանր տնտեսական տարի՝ հաշվի առնելով ներդրումների բացակայությունը:
«Այսօր ինչ տեղի է ունենում Հայաստանում, ամեն ինչի համար մեկ պատասխանատուն իշխանությունն է: Մեղավորներ կարող են նշանակել, մեղավորներ կարող են կարգել, բայց իշխանությունը կրում է պատասխանատվություն բոլոր հարցերում: Իսկ քանի որ իշխանությունը ներկայացված է մեկ անձի դեմքով, իշխանության մեջ այլ լեգիտիմ մարմին չկա, բացի Նիկոլ Փաշինյանից, հետևաբար հետևանքների համար ամբողջական պատասխանատվությունը կրելու է Նիկոլ Փաշինյանն անձամբ»,- ասաց Արթուր Ղազինյանը: