Ամերիկյան The Washington Post պարբերականը ներկայացրել է, իր վարկածով, 2019 թվականի 5 ամենաթերագնահատված քաղաքական իրադարձությունները:
«Եվ վերջապես եկավ Հայոց ցեղասպանության հարցը: Թուրքիայի կողմից ԱՄՆ-ի դաշնակից քրդերի վրա հարձակումներից և Ռուսաստանի հետ մերձեցումից հետո, Սենատն առաջին անգամ ցանկություն հայտնեց հարյուրամյակ առաջ տեղի ունեցածը բնորոշելու որպես «ցեղասպանություն»: Դա տեղի ունեցավ տասնամյակներ շարունակվող մերժումից հետո: Այն տեղի ունեցավ այն բանից հետո, երբ Սպիտակ տունը շարունակաբար ձգձգում էր այս հարցը՝ ամենայն հավանականությամբ Դոնալդ Թրամփի ցանկության պատճառով՝ պահպանել լավ հարաբերությունները Թուրքիայի նախագահ Ռեջեփ Թայիփ Էրդողանի հետ: Եվ հիմա էլ նախագահական աշխատակազմը նշում է, որ Սենատի բանաձևը չի արտահայտում իրենց դիրքորոշումը:
Մարդու իրավունքներին վերաբերող կետից բացի՝ 5 ամենաթերագնահատված քաղաքական իրադարձությունների շարքում նշվել են նաև ԱՄՆ դատական համակարգի վերափոխումը, Վիրջինիա նահանգի նահանգային ներկայացուցիչների սկանդալները, մի քանի երկկուսակցական բանաձևերի ընդունումը և փախստականների հարցում ԱՄՆ վարած քաղաքականությունը:
Հիշեցնենք, որ ԱՄՆ Կոնգրեսի վերին պալատը՝ Սենատը, միաձայն ընդունել է Հայոց ցեղասպանությունը ճանաչող բանաձևը՝ մերժելով Թուրքիայի քաղաքականությունը: Բանաձևի նախաձեռնությունը պատկանում է սենատորներ Ռոբերտ Մենենդեսին և Թեդ Քրուզին: Ցեղասպանությունը ճանաչող բանաձևն առաջին անգամ է ընդունվում ԱՄՆ Սենատում:
Նշենք, որ բանաձևն օրենքի պարտադիր ուժ չունի, այն արձանագրում է, որ Միացյալ Նահանգների կառավարությունը պետք է պաշտոնապես ճանաչի և ոգեկոչի Հայոց ցեղասպանությունը, չմասնակցի այդ փաստի ժխտմանը և խրախուսի Հայոց ցեղասպանության հանրային ընկալմանը։
Մինչ այդ՝ ԱՄՆ Կոնգրեսի Ներկայացուցիչների պալատում հոկտեմբերի 29-ին կայացած քվեարկության արդյունքում ձայների մեծամասնությամբ ընդունվել է Հայոց ցեղասպանությունը ճանաչող բանաձևը։ Քվեարկությանը մասնակցած կոնգրեսականներից կողմ է քվեարկել 405-ը, դեմ՝ 10-ը, ձեռնպահ՝ 3-ը, իսկ 14 կոնգրեսական չի քվեարկել։