ՀՀ ԳԱԱ Երկրաբանական գիտությունների ինստիտուտի տնօրեն Խաչատուր Մելիքսեթյանն ու կրթության փորձագետ Սերոբ Խաչատրյանը ցանկանում են, որ Գիտությունների ազգային ակադեմիայի շուրջ տեղի ունեցող գործընթացներում հստակություն մտցվի: Այս մասին նրանք ասացին այսօր «Տեսակետ» մամուլի ակումբում կայացած ասուլիսի ժամանակ՝ անդրադառնալով «Բուհական կրթության և գիտության մասին օրենքի» նախագծին, որը լայնորեն քննարկվում է այս օրերին:
Մելիքսեթյանի խոսքով՝ ամիսներ առաջ իրենք ստացել են նախագիծը, քննարկել և առաջարկություններ արել: «Երկու կանխադրույթ կա այս նախագծում, մեկն այն է, որ Ակադեմիայի մասին օրենքն ուժը կորցրած համարվի, մյուսն էլ՝ որ դոկտորական երկրորդ կոչում այլևս չլին»ի,-նշեց ինստիտուտի տնօրենը և հավելեց, որ նման քննարկումներ եղել են և՛ 90-ականներին, և՛ 2000-ականներին՝ պայմանավորված արտասահմանյան օրենքներում համապատասխան կետերի բացակայությամբ:
«Արտասահմանում գիտահետազոտական ցանցեր գոյություն ունեն, հաբիլիթեյշն գոյություն ունի, որն այնտեղ երկրորդ դոկտորական կոչումն է»,-ասաց բանախոսը՝ նշելով, որ իրենք առաջարկել են մեզանում ևս դոկտորական երկրորդ կոչումն այդպիսի փոփոխությունների ենթարկել, սակայն իրենց առաջարկները չընդունվեցին, քննարկում տեղի չունեցավ, ինչն էլ, նրա խոսքով, զարմանալի է:
«Մյուս կետն այն է, որ ասպիրանտական կրթությունը լինի միայն բուհերում, բայց ինչու՞ միայն բուհերում ասպիրանտ պատրաստվի»,-տարակուսեց բանախոսը:
Սերոբ Խաչատրյանն էլ նշեց, որ տարիների ընթացքում կրթության ու գիտության ոլորտում բազմաթիվ խնդիրներ են կուտակվել, և ինքը կարծում էր, թե պիտի դրանք լուծվեն. «Բայց կաբինետային միջավայրում օրենքի նախագիծ ստեղծվեց, որի համաձայն՝ բարձրագույն կրթությունը միանում է գիտությանը: Ամենամեծ սխալներից մեկն այն է, որ մենք չենք հասկանում, որ մարդկային գործոնն այս ոլորտում շատ կարևոր է: Դա պիտի մարդկանց որոշակիություն տա, մինչդեռ անորոշությունը շարունակվում է»:
Կրթության փորձագետի խոսքով՝ պիտի տեղի ունենան քննարկումներ, և լինեն ողջամիտ որոշումներ, իսկ միավորումը պետք է զգույշ արվի: «Բուհերը դժվարությունների են բախվում՝ իրենց կրթական ֆունկցիան իրականացնելու համար, դրան էլ գումարած՝ ինստիտուտները միավորվեն բուհերին՝ կառավարման խնդիրներ կստեղծվեն: Միակ հույսն այն է, որ ԿԳՄՍ նախարարն ասել է, որ ամեն դեպք առանձին կքննարկվի: Ամեն դեպքում՝ այս ձևով համակարգը չենք կարող զարգացնել: Կապկելու ժամանակն անցել է, բարեփոխումների ներմուծումը չարդաչացնող բան է, դու պիտի մտածեց ու քո երկրի համար աշխատող մոդել գտնես»,-ասաց նա և նշեց, որ ցանկանում ենք արտասահմանից օրենքներ ներմուծել, սակայն հաշվի չենք առնում մեր և արտասահմանյան ֆինանսավորման տարբերությունը:
Մելիքսեթյանն էլ նշեց, որ հիմնականում ծանոթացել է օրենքի՝ գիտությանը վերաբերող հատվածին. «Չնայած գիտության ոլորտում անհրաժեշտ են բարեփոխումներ, բայց ունենք գիտության կառավարման համակարգ, որը գործում է, իսկ նոր օրենքն առաջարկում է փոփոխել դա և կառավարման նոր համակարգ չի առաջարկում. արդյունքում ինստիտուտների կառավարումը մնում է անորոշ»:
Մանրամասները՝ տեսանյութում
https://www.youtube.com/watch?v=WYlKmxGF434&feature=emb_logo