Այսօր «Տեսակետ» մամուլի ակումբում «Դեմոկրատական այլընտրանք» կուսակցության քաղաքական խորհրդի նախագահ, քաղաքագետ Սուրեն Սուրենյանցն անդրադարձավ ներքաղաքական վերջին զարգացումներին, մասնավորապես՝ ՍԴ շուրջ ստեղծված իրավիճակին, քաղաքական նոր կոնսոլիդացիաներին և այլն:
Սուրենյանցը նշեց, որ շատ կարևոր է Սահմանադրության փոփոխություններն իրականացնել մի քանի կարևոր բաղադրիչի պահպանմամբ, ինչը տեղի չի ունեցել, և դրա արդյունքում ոչ թե լուծվել է ՍԴ խնդիրը, այլ առաջացել է ճգնաժամ:
՛՛Քվորում չկա ՍԴ-ում, մի քանի հրատապ միջազգային պայմանագրեր պետք է քննարկվեին, բայց գործող խշխանությունը գնաց իրեն բնորոշ հեղափոխական լուծումների ճանապարհով՝ խախտելով լեգիտիմությունը՛՛,-ասաց բանախոսը:
Նա նշեց նաև, որ Սահմանադրության փոփոխությունները հասունացած էին, և բոլորը սպասում էին, որ հեղափոխությունից հետո կընդունվեր նոր Սահմանադրություն, ոչ թե փոփոխություններ կլինեին առանձին հոդվածում: Սուրենյանցը տարօրինակ համարեց հատվածական փոփոխությունները և նշեց. ՛՛Գործող Սահմանադրության պարագայում, գործող սահմանադրական կարգավորումներով, երբ գործում էր սուպերվարչապետական համակարգ, իշխանության զսպումների և հակակշիռների մեխանիզմը չի գործում, անկախ Սահմանադրական դատարան ունենալ չենք կարող, եթե իշխանությունը գնաց ոչ թե նոր Սահմանադրության ընդունման միջոցով ՍԴ-ի խնդիր լուծելու ճանապարհով, այլ հատվածական փոփոխության, կարող ենք ենթադրել, որ Նիկոլ Փաշինյանի իշխանության խնդիրը ոչ թե անկախ ՍԴ ստեղծելն էր, այլ ՍԴ-ն Սերժ Սարգսյանի գրպանից իր գրպանը տեղափոխելը՛՛: Բանախոսը հավաստիացրեց, որ արդեն անգամ անուններ են շրջանառվում, թե ովքեր պիտի դառնան ՍԴ դատավոր:
Նրա խոսքով՝ Սահմանադրության փոփոխությունները պետք է կատարվեին երկու կարևոր բաղադրիչի պահպանմամբ՝ քաղաքական ու հանրային կոնսենսուս: Սակայն հասարակության մեծ մասը, ըստ նրա, նույնիսկ իրազեկ չէ՝ ֆորմալ առումով ի՛նչ փոփոխություններ են եղել, իսկ քաղաքական կոնսենսուսի մասին էլ անտեղի է խոսելը, որովհետև փոփոխությունը ընդամենը խորհրդարանական մեծամասնության քվեարկությամբ է եղել:
՛՛Զարմանալ կարելի է այս իշխանության մտածողության վրա. եթե պիտի դիմեիք Վենետիկի հանձնաժողով, բայց անեիք ձեր ուզածը՝ անտեսելով նրանց եզրակացությունը, իմաստը ո՞րն էր դիմելու: Այնպիսի տպավորություն է, որ իշխանությունը փորձուոմ է բոլոր միջազգային կառույցների հետ հարաբերությունները փչացնել՛՛,-ասաց նա:
Ինչ վերաբերում է ներքաղաքական այլ գործընթացների, Սուրենյանցն ասաց, որ, ցավոք սրտի, իշխանությունը վերջին շաբաթներին դիմում է ռեպրեսիվ գործողությունների: Նա, մասնավորապես, որպես օրինակ բերեց Գագիկ Ծառուկյանի գործը, ինչպես նաև՝ վարչապետի վերջին ելույթը խորհրդարանում: Նա որակեց այդ ելույթը չտեսնված՝ բացասական իմաստով:
՛՛Ես չեմ զարմանա, որ իշխանությունը ստեղծի իր համար ընդդիմադիր ուժեր: Օրինակ՝ շատ անկախ պատգամավորներից մեկը քաղաքական ուժ է ձևավորել, իբր գործ ունենք ընդդիմադիր ուժի հետ, բայց իշխանության համար Ժիրինովսկու ֆունկցիա է կատարում՛՛,-ասաց քաղաքագետը և հավելեց, որ չի զարմանա, եթե հաջորդ թիրախը դառնա մամուլը:
՛՛Հիմա տեղի է ունենում ընդդիմադիր ուժերի կոնսոլիդացիա, կոնսոլիդացնող բևեռ կարող է լինել ԲՀԿ-ն: Ի դեպ՝ նրանց շուրջ տեխնոլոգիական դաշինք կձևավորվի , թե ավելի ազատ հարաբերություններ կլինեն, էական չէ: Ըստ իս՝ ավելի արդյունավետ են այն միությունները, որոնք կոնկրետ օրակարգի շուրջ միավորվում են, փորձում են ինչ-որ կետեր դարձնել իրականություն: Վստահ եմ՝ առաջիկայում ԲՀԿ-ի շուրջ կոնսոլիդացիան ավեի ուժեղ ու առարկայական կդառնա, մեր կուսակցությունը նույնպես մասնակից է այս գործընթացներին, մենք դեռ վաղուցվանից գործընկերային հարաբերություններ ունենք ԲՀԿ-ի հետ՛՛,-ասաց Սուրենյանցը:
Բանախոսն անդրադարձավ նաև կորոնավիրուսային իրավիճակին և ասաց, որ իշխանությունները հիմնովին տապալել են հակահամաճարակային պայքարը: Նա նշեց, որ կան երեք կոնկրետ հարցեր, որոնց իշխանությունը պետք է հստակ պատասխան տա:
՛՛Առաջինը՝ հունվարի 30-ից ՀՀ-ում գործում է կորոնավիրուսի դեմ հանձնաժողով, ինչո՞վ են բացատրում, որ մինչև մարտի 13-ը Հայաստանում անցկացվել են հանրահավաքներ: եթե այդ հանձնաժողովը ձևականորեն չէ գործել, այլ իրականում, պարտավոր էր հաշվի առնել ռիսկը:
Երկրորդը՝ ո՞րն է տրամաբանությունը՝ մայիսի 4-ին վերացնել սահմանափակումները, իսկ դիմակների կրումը մտցնել մայիսի 18-ին:
Երրորդը՝ այդպես էլ մեր իշխանությունը չգնաց զանգվածային թեստավորման, ինչը բերել է համաճարակային ճգնաժամի, եթե չի կատարվում զանգվածային թեստավորում, շատ մեծ թիվ են կազմում ասիմպտոմ, չբացահայտված հիվանդները, և վարակը տարածվում է՛՛:
Քաղաքագետի խոսքով՝ կառավարությունը ցանականում է լոքդաունի պես ինչ-որ բան մտցնել՝ առանց սոցիալական երաշխիքների, սակայն եթե մարդն ունի հացի, կոմունալները վճարելու խնդիր, հնարավոր չէ ակնկալել, որ կարանտինը կարող է լիարժեք գործել: Նրա կարծիքով՝ առաջին անգամ լոքդաունը հենց այն պատճառով տապալվեց, որ հակաճգնաժամային ծրագրերն իմիտացիոն բնույթ էին կրում և հասարակության շատ սահմանափակ խմբերի համար էին:
Հարցին՝ թե այս բոլոր թերությունները նշելուց հետո, որպես քաղաքական ուժ, իրենք պատրաստվու՞մ են գնալ իրավական ճանապարհներով, թե՞ ոչ, Սուրենյանցը պատասխանեց. ՛՛Այո, քաղաքական ուժերը, այդ թվում՝ մերը, պետք է հետամուտ լինեն, որ հատկապես մահվան դեպքերը բացահայտվեն: Պետք է պարզվի, թե հիմնադրամում կուտակված և օգնություն ստացած գումարներն ինչպես են ծախսվել: Ինչքան հասկացա՝ գործող իշխանությունը սորտավորում է նաև հիվանդանոցները, ոչ միայն հասարակությանը: Ի վերջո՝ պետք է իմանանք՝ ինչքան է հավաքվել, ինչպես է ծախսվել՛՛:
Բանախոսն անդրադարձավ նաև Սուրբ Աթոռում ՀՀ նախկին դեսպան Միքայել Մինասյանի ՛՛Ստի վերջը՛՛ տեսաշարին ու իշխանություններին վերագրվող կոնկրետ մեղադրանքներին:
՛՛Ես ենթադրում եմ, որ Միքայել Մինասյանի մի քանի պնդումներ գուցե ճիշտ են՛՛,-ասաց նա՝ հավելելով, որ իրեն էլ է հետաքրքիր, թե ինչու Նիկոլ Փաշինյանը չի պատասխանում Մինասյանի պնդումներին ու մեղադրանքներին:
՛՛Իսկ գուցե Սերժ Սարգսյանի ու Նիկոլ Փաշինյանի միջև պայմանավորվածություննե՞ր կային հեղափոխության օրերին: Աբսուրդ է ընտրակաշառքի դրվագ ուսումանսիրել մեկ այլ ուժի պարագայում, բայց օրվա իշխանությանը թողնել հանգիստ: Մի շարք այլ դրվագներում էլ է դա տեսանելի, ինձ մոտ տպավորություն է, ոնց որ ներկաներն ու նախկինները պասերով խոսեն, բայց բոլորն են նկատել, որ Սերժ Սարգսյանն ու իր մերձավորները կամ հանգիստ երկրից հեռանում են, կամ ինչ-որ շատ տարօրինակ վիճակ է:
Ես Միքայել Մինասյանի երկրպագու երբեք չեմ եղել, հիմա էլ չեմ, ես անկեղծ չեմ լինի, որ ասեմ՝ մեծ ոգևորությամբ եմ հետևում իրեն, բայց դա կապ չունի, հնչում են հարցեր, որոնց չկան պատասխաններ: Վերջը իմացանք, որ ծխախոտի պատմությունը կա, քրգործ է հարուցվել: Այնքան կոնկրետ մեղադրանքներ է հնչեցնում, որ գործ պիտի հարուցվի, կամ հստակ պատասխան տան, հերքեն կամ հաստատեն՛՛,-ասաց քաղաքագետը:
Սուրենյանցը նշեց նաև, որ քանի որ հերքում չի հնչել, հասարակության մի մասը սկսել է հավատալ մեղադրանքներին: ՛՛Ինչքան էլ բարձր վարկանիշ ու լեգիտիմություն ունենաս, հնչած մեղադրանքը կոնկրետ պատասխան է ենթադրում՛՛,-նշեց նա: