Վարչապետի հրաժարականի դեպքում նրա պաշտոնավարման վերաբերյալ կա երեք մոտեցում։ Այս մասին այսօր խոսել է իրավագիտության դոկտոր, պրոֆեսոր Գեւորգ Դանիելյանը՝ «Վարչապետի հրաժարականով պայմանավորված ԺՊ-ի սահմանադրականությունը» թեմայով քննարկման ժամանակ։
Սահմանադրության 158-րդ հոդվածն ասում է՝ վարչապետի հրաժարականից հետո կառավարության անդամները շարունակում են պաշտոնավարել, եւ մի մոտեցման համաձայն, կառավարության անդամ է համարվում նաև վարչապետը, հետևաբար ինքն էլ կարող է շարունակել պաշտոնավարել։ Մեկ այլ մոտեցմամբ՝ քանի որ սահմանադրությունը չի արգելում վարչապետի հրաժարականից հետո նրա պաշտոնավարումը, ապա նա իրավունք ունի պաշտոնավարել։ Իսկ երրորդ մոտեցումն էլ այն է, պետք է բարոյականության սահմաններում դիտարկել հարցը, այսինքն՝ վարչապետը բարոյական իրավունք ունի շարունակել պաշտոնավարելը։
«Եթե իսկապես կառավարության անդամ է վարչապետը, ապա ինչո՞ւ չի կարող պաշտոնավարել։ Սահմանադրության 147-րդ հոդվածով ամրագրվել է կառավարության կազմը, բայց այնտեղ կառավարության անդամ եզրույթը չկա։ Ի տարբերության կառավարության կազմի, կառավարության անդամներ եզրույթն օգտագործվում է երկու իմաստով։ Նորմատիվ իրավական ակտերի մասին օրենքի 41-րդ հոդվածը հստակ ամրագրում է, թե ինչպիսի մեթոդաբանությամբ պետք է մեկնաբանվի եզրույթը»,- նշել է իրավագիտության դոկտորը։
Նրա արձանագրմամբ՝ հրաժարականից հետո Նիկոլ Փաշինյանի ժամանակավոր պաշտոնավարման համար իշխանությունները ներկայումս որպես փաստարկ նշում են այն, թե չեն կարող ստեղծել իշխանության վակուում։ Սակայն Գ. Դանիելյանի արձանագրմամբ՝ վարչապետի պաշտոնավարումը դադարեցնելը չի կարող առաջացնել իշխանության վակուում, որովհետև գործող սահմանադրական մարմինը ոչ թե վարչապետն է, այլ Կառավարությունը։
«Եթե ասում ենք՝ անհնարինության դեպքում փոխվարչապետն ամբողջ ծավալով է իրականացնում վարչապետի լիազորությունները՝ առանց որևէ վերապահման, ապա այստեղ այդ խնդիրը բարձրացնելն ուղղակի տեղին չէ»,- ասաց նա։