Ռուս քաղաքագետ Կոնստանտին Տասիցը Alpha News-ի հետ զրույցում մեկնաբանել է Հայաստանի կողմից գնդակոծությունների մասին Ադրբեջանի ապատեղեկատվությունը և Բաքվի կողմից նոր ագրեսիայի հավանականությունը։
«Ադրբեջանի դիրքորոշումն այն է, որ հնարավորինս արագ կնքվի խաղաղության պայմանագիրը, որի տեքստը համաձայնեցվել է։ Սակայն Բաքուն դեռ երկու նախապայման ունի, առաջինը կապված է Լեռնային Ղարաբաղի հակամարտությամբ զբաղվող ԵԱՀԿ Մինսկի խմբի լուծարման հետ։ Եվ քանի որ Ադրբեջանի տեսանկյունից այդ հակամարտությունը լուծված է, ապա իմաստ չունի, որ Մինսկի խումբը պահպանվի։ Հայաստանի նկատմամբ Բաքվի երկրորդ պահանջն այն է, որ Հայաստանի օրենսդրական ակտերում և Սահմանադրության մեջ առկա տարածքային պահանջներն Ադրբեջանի նկատմամբ հեռացվեն։ Խոսքը Սահմանադրության մեջ Անկախության հռչակագրի մասին է, որտեղ ասվում է, որ Ղարաբաղը պետք է լինի Հայաստանի մաս։ Ըստ այդմ, այն գործողությունները, որոնք ձեռնարկում է Բաքուն, ակնհայտորեն կապված են այդ գործընթացներն արագացնելու և այն ստատուս քվոն ամրագրելու հետ, որը վերջին շրջանում ձևավորվել է Հարավային Կովկասում»,- կարծում է փորձագետը։
Փորձագետի կարծիքով՝ պաշտոնական Բաքուն մտահոգված է Հայաստանի հնարավոր ռևանշից, այդ պատճառով էլ փորձում է գործել կանխամտածված:
«Ինչպես պնդում է Բաքուն, Հայաստանում շարունակում են պահպանվել ռևանշիստական տրամադրությունները, այսինքն՝ հասարակության մի մասը չի համակերպվել այն ամենի հետ, ինչ տեղի է ունեցել։ Եվ այդ պատճառով էլ կարող է օգտագործել ինչ-որ տարբերակներ Ղարաբաղի հարցը նորից բարձրացնելու համար։ Հետևաբար, կողմերը պետք է համաձայնության գան և աշխատեն փոխադարձ վստահության ամրապնդման ուղղությամբ, որպեսզի այդ բոլոր հարցերը լուծվեն», — ընդգծել է Տասիցը։
Alpha News-ի զրուցակիցն Ադրբեջանի հայտարարություններում Հայաստանի տարածք հնարավոր ներխուժման վտանգ չի տեսնում, սակայն սահմանի առանձին հատվածների պատճառով լոկալ բախումների հավանականություն կա:
«Ինձ թվում է՝ քանի դեռ սահմանազատում, սահմանագծում չի իրականացվել, հնարավոր են սահմանային էսկալացիաներ, բախումներ հենց սահմանային տարածքում։ Բայց ինձ քիչ հավանական է թվում, որ Ադրբեջանը համարձակվի ինչ-որ խորը ներթափանցման և հայկական բնակավայրերի գրավման գնալ, որովհետև դա կնշանակի միջազգային իրավունքի կոպիտ խախտում, և դրան կարող է հաջորդել միջազգային հանրության շատ կտրուկ արձագանքը»,- եզրափակել է Կոնստանտին Տասիցը։