«Հացաբուլկեղենի արտադրության ոլորտում բավականին առաջընթաց կա»,- այս մասին այսօր լրագրողների հետ զրույցում ասաց «Հայաստանի սպառողների ազգային ակադեմիայի» փոխնախագահ, մոնիթորինգի բաժնի պետ Ռուբեն Հայթյանը։
Արտադրանքի 1/3-ը մակնշվում է, համապատասխանում է նորմատիվ պահանջներին։
Հայթյանը նշեց, որ ոլորտում միակ խնդիրն այն է, որ փոքր խանութներում չի նշվում հացի որակը, թե ինչ ալյուրից է պատրաստված, միայն նշվում է հացի արժեքը։
«Կան ալյուրի տարբեր տեսակներ՝ բարձր, թեփախառն և այլն, իսկ խանություն երբևէ չեք տեսնի հաց, որի վրա նշվի՝ երկրորդ տեսակի ալյուրից պատրաստված հաց, միայն գինն է գրվում։ Ընդ որում պետք է նշվի նաև խոնավությունը։ Եթե սահմանված 45% խոնավությունից 1% շեղվեն, դա հացի քաշի 3 անգամ աճ կբերի, բացի այդ խոնավությունը վատ հետևանք է թողնում մեր ստամոքսների վրա»,- նշեց Ռուբեն Հայթյանը։
Կաթնամթերքի շուկայում արտադրանքի 97-98%-ը տեղական է։ Ռուբեն Հայթյանը նշում է, որ ներկրված 2-3%-ը, որ հիմնականում յոգուրտներ են, ցանկալի կլիներ՝ տեղական լինեին. «Ներկրվածների մեջ բավականին շատ կայունացուցիչներ կան, իսկ դրանցից հիմնականում օգտվում են երեխաները։ Ցանկալի չէ, որ հավելանյութերով ոչ ցանկալի սնունդ տալ երեխաներին»։
Հայթյանի խոսքով, կաթնամթերքի շուկայում անհանգստացնող է թթվասերի արտադրությունը։
«Այն բավականին թանկարժեք ապրանք է, այդտեղ կաթնայուղի փոխարեն օգտագործում են բուսական յուղ։ Բայց էս դեպքում թթվասեր չէ, այն այլ պրոդուկտ է։ Կամ էլ գրում են, բայց կապույտ ֆոնի վրա կապույտ շրիֆտով։ Դա էլ սպառողին մոլորեցնելու համար է։ Բացի այդ տեղական արտադրության կաթնամթերքի հումքի 40%-ը ներկրված է»,- նշեց Հայթյանը։
Մսամթերքի շուկայում ևս 96-97%-ը տեղական արտադրության է, բայց ներկրված մսով։
«Որակը պետք է բացարձակ չխախտվի, դա կլինի հնդկական գոմեշի մսով, թե բրազիլական, կանադական կամ այլ մսով։ Ուղղակի խնդիր կա, որ, օրինակ Կանադայից և Բրազիլիայից ներկրվող մսին հորմոններ են ներարկել։ Ու այդ մսով ստեղծված արտադրանքի վրա էլ պետք է նշվի՝ որտեղից ներկրված մսով է և ինչ հավելումներ է պարոնակում։ Եվ երբեմն մսամթերքում համեմունքները ավելի շատ են, քան միսը»,- նշեց Հայթյանը։
Վերջինիս խոսքով, շատ մտահոգիչ լուր է ստացվել, որ 2 մսամթերք արտադրող ընկերություններ ներկրել են անորակ և հիվանդ միս. «Դա լավ վերամշակելով պետք է մսամթերք արտադրեն։ Երկար ջերմային մշակումից հետո անգամ բրուցիլոզը կարող է վերանալ։ Լուր կա, որ այդ մթերքը թույլ են տվել լավ մշակելով արտադրել և էժան գնով վաճառել»։
Հրուշակեղենի արտադրությունում Հայթյանի խոսքով, խնդիր չկա, իսկ նոր տարվա շեմին արտադրվող խմիչքների ոլորտում խնդիրները շատ են։
«Արտադրվում են կասկածելի որակի խմիչքներ։ Մենք 2 տարի առաջ հայտնաբերեցինք առանց մակնշման խմիչք՝ մանկական շամպայն-գինի։ Բացի այդ խնդիր կա գազավորված ըմպելիքների ոլորտում, այս օրերին անխնա օգտագործում են տարեր գունանյութեր պարունակող անհայտ ծագման լիմոնադներ»,- նշեց Ռուբեն Հայթյանը։