«Այսօր խոսվում է այն մասին, որ հնարավոր է՝ Արցախում ընտրական գործընթացները գնան հայաստանյան սցենարով և բերեն «թավշյա հեղափոխության»: Դրա համար մենք փորձել ենք գնահատել գործոնների առկայությունը և նրանց ուժը, որով կարող են հանգեցնել «թավշյա հեղափոխության»,-այս մասին այսօր «Տեսակետ» մամուլի ակումբում ասաց սոցիոլոգ Ահարոն Ադիբելյանը՝ անդրադառնալով Արցախում մարտի 31-ին կայանալիք նախագահական ու խորհրդարանական ընտրություններին:
«Հեղափոխութունը հնարավոր է, երբ հանրությունը բաժանվում է երկու մասի՝ ունևոր ու չունևոր, դժգոհ ու գոհ, երբ մեկը մյուսին փորձում է ստորադասել՝ հանուն սեփական իշխանության, իշխանական լծակների»,-ասաց նա և հավելեց, որ իրենք սոցհարցումների միջոցով փորձել են գնահատել այն հիմնական գործոնները, որոնք հանգեցնում են հեղափոխության:
Դրանցից մեկը, սոցիոլոգի խոսքով, ժողովրդի ծայրահեղ նյութական վիճակն է, սակայն Արցախում երկու անգամ պակաս են աղքատները, քան Հայաստանում. Արցախում 2 տոկոսն է իրեն աղքատ համարում, ՀՀ-ում՝ 19, ինչպես նշեց Ադիբեկյանը:
Մյուս գործոնը, ըստ նրա, երիտասարդների պատկերացումներն են ապագայի վերաբերյալ:
«Երբ նայում ենք թեկնածուների ընտրազանգվածին, ամենաժողովրդավարական կառուցվածիքն մոտը «Ազատ հայրենիք» կուսակցության ընտրազանգվածն է, նախ՝ ամենաշատն են, սեռական, կրթական տարիքային առումով բոլոր խավերի կարծիքն են արտացոլում: Վիկտոր Բալասանյանի մոտ, օրինակ, երիտասարդներն են շատ, բայց տոկոսային ծավալը «Ազատ հայրենիքից» պակաս է»,-նշեց բանախոսը:
Ինչ վերաբերում է պաշտպանական հարցերին՝ այս դեպքում ևս, Ադիբեկյանի դիտարկմամբ, ընտրողների կարծիքները բավականին դրական են:
«Որպես լրացուցիչ գործոն՝ փորձել ենք պարզել Բակո Սահակյանի գործունեության գնահատականը: Հարցին՝ կցաանկանա՞ք, որ Բակո Սահակյանը շարունակի լինել նախագահ, 60 տոկոսը դեմ չի եղել, 40-ը դեմ է արտահայտվել: Պարզ է, որ որքան բարձր է իշխանական մակարդակը, այնքան դժգոհների թիվն աճում է, բայց այս դեպքում 60 տոկոսը խոսում է այն մասին, որ նա կարողացել է բնակչության բնակարանային, սոցիալ-տնտեսական հարցերը հիմնականում լուծել: Այս առումով նախկին իշխանության նկատմամբ չկա դժգոհություն, ՀՀ-ից բարենպաստ է սոցիալական վիճակը, և խոսել, որ կան «թավշյա հեղափոխության» լուրջ գործոններ, մի քիչ սխալ է»,-պարզաբանեց Ահարոն Ադիբեկյանը:
Նա նշեց նաև, որ Ղարաբաղը բավականին հանդարտ է մոտենում իր լուրջ քաղաքական որոշումներին, և հույս հայտնեց, որ մարտի 31-ին արցախցիները ճիշտ ընտրություն կկատարեն:
Բանախոսն անդրադարձավ նաև ընտրությունների հավանական հետաձգմանը՝ կապված կորոնավիրուսի պատճառով ստեղծված իրավիճակի հետ: Նա ասաց, որ հետևում է հիմնական թեկնածուների ելույթներին, և նման առաջարկ չի եղել, ինչպես նաև չեն եղել հեղափոխության վերաբերյալ կոչեր, ուստի կարելի է եզրակացնել, որ ընտրությունները բավականին հանգիստ կընթանան:
Խոսելով այն մասին, թե ինչպես են անցկացրել հարցումը՝ Ադիբեկյանն ասաց. «Մոտ 2000 մարդու ենք մոտեցել, մոտ 400-ը հրաժարվել է, մնացածը սխալ է լրացրել թերթիկը, ընդհանուր 1400 հոգու կարծիք ենք մշակել, որոնց սեռային, տարիքային, կրթական կառուցվածքը բնակչության ազգագրական կառուցվածքին համապատասխանում է»:
Սոցիոլոգը հույս հայտնեց, որ դիտորդները, այնուամենայնիվ, այդ օրն արտասահմանից կժամանեն Արցախ, ներկա կլինեն, և պատշաճ կերպով կանցկացվի ամեն ինչ. «Հույս ունենանք, որ արտասահմանից դիտորդներ կգան, նրանց կարծիքը լայն արձագանք է ստանում միջազգային ԶԼՄ-ներում, դա շատ կարևոր է, հուսանք, որ համաճարակը չի ազդի նրանց այցի վրա, և Ղարաբաղը կունենա նորմալ ընտրական գործընթաց»:
Ադիբեկյանն ընտրողներին հորդորեց չվախենալ գալ ընտրատեղամաս և գալ պատրաստված, իսկ ընտրությունների կազմակերպիչներին խորհուրդ տվեց տեղում բաժանել ձեռնոցներ, դիմակներ, որպեսզի դրանց բացակայությունն ընտրական ակտիվության անկման պատճառ չդառնա: