Ռազմական փորձագետ Վան համբարձումյանն այսօր ՛՛Տեսակետ՛՛ մամուլի ակումբում անդրադարձավ սահմանի ողջ երկայնքով Ադրբեջանի անցկացրած լայնածավալ օպերատիվ-մարտավարական զորավարժություններին, որոնք իրականացվում են ոչ միայն Ադրբեջանում, այլև՝ Նախիջևաում:
Այս առնչությամբ ռազմական փորձագետը հայտնեց իր մտահոգությունը, քանի որ ադրբեջանական կողմը, նրա խոսքով, սահմանին մոտ կրակադաշտերում զորավարժություն է անցկացնում, թիկունքից ծանր տեխնիկա է բերում դեպի կրակադաշտեր:
՛՛Երբ դու ուզում ես լայնամասշտաբ պատերազմ սկսես, թիկունքի ուժերը պետք է ներգրավես, եթե սկսես սահմանին մոտեցնել՝ առանց զգուշացնելու, կնշանակի՝ պատերազմ ես ուզում՛՛,-ասաց նա՝ պարզաբանելով Ադրբեջանի քայլերը:
՛՛Նախիջևանի Ինքնավար Հանրապետությունում էլ են լուրջ քանակի զինտեխնիկա կուտակել սահմանին, թիկունքից 10 հազար զինծառայող են բերել, գումարել երեք շաբաթ այնտեղ հավաքվող զորքերին, 200 միավոր հրետանային զինտեխնիկա են բերել թիկունքից սահման, տրանսպորտային ուղղաթիռներ են բերել, տեղակայել մեր սահմանին շատ մոտ՛՛,-ասաց Համբարձումյանը և ընդգծեց, որ Ադրբեջանն այժմ անում է այն, ինչ պիտի անի պատերազմի ժամանակ:
՛՛Տեղակայվել են այնպիսի զինատեսակներ, որոնք Նախիջևանում դեռ մի քանի շաբաթ առաջ չկային, 300 կմ հեռահարություն ունեցող զինատեսակը տեղակայալ են Նախիջևանում: Ինչո՞վ է դա վտանգավոր. Երևանում ՊՆ շենքն է, ԱԱԾ շենքը, վարչապետի, նախագահի նստավայրը՝ ինչպես յուրաքանչյուր պետության պարագայում, սակայն Երևանի ու Նախիջևանի միջև հեռավորությունը 42 կմ է, հիմա այս զինատեսակը Երևանն է թիրախավորում՛՛,-ասաց Համբարձումյանը:
Նրա խոսքով՝ սա փորձ է՝ ազդելու Հայաստանի ռազմաքաղաքական ղեկավարության վրա, ճնշելու և ցույց տալու, որ իրենք պատրաստ են պատերազմի Հայաստանի դեմ:
՛՛Ադրբեջանի պաշտպանության նախարարը մեկ շաբաթ առաջ ասաց, որ բանակցությունները երկարաձգվեցին, ամեն վայրկյան պատրաստ եղեք պատերազմի, հաջորդ օրը զորավարժությունները սկսվեցին, որոնք լարվածություն են ստեղծում՛՛,-նշեց նա և հավելեց, որ, իր կարծիքով, ՀՀ-ի ու Ռուսաստանի միջև հարաբերություններն այսօր այն մակարդակի չեն, ինչ եղել են 1-2 տարի առաջ:
Վան Համբարձումյանն ասաց. ՛՛Չասեմ սառեցում, բայց որոշակի փոփոխություն կա, որոշակի անհասկանալի պահեր կան, գործող իշխանության պարագայում՝ հանձին Փաշինյանի, Հայաստանը հայտ է ներկայացրել, որ իր հետ հաշվի նստեն որպես ինքնիշխան պետության, իսկ նախկին իշխանության ժամանակ այդպես չէր՛՛:
Նա հավելեց նաև, որ ՀՀ-ի ու Կրեմլի միջև հարաբերությունների որոշակի վերանայում կա, ինչն Ադրբեջանի կողմից ընկալվում է որպես կանաչ լույս, մանավանդ՝ Լավրովի հայտարարությունից հետո:
՛՛Իմ կարծիքով՝ ՌԴ-ն մարտավարություն ուներ՝ հայկական կողմի վրա ճնշում գործադրելու՝ կամ կանեք մեր ուզածով, կամ պատերազմ է սկսվում՛՛:
Փորձագետի խոսքով՝ այս կերպ Ադրբեջանը ցանկանում է շոփշափել, հասկանալ, թե հայկական կողմը մոբիլիզացիա կհայտարարի՞ կորոնավիրուսային հիվանդության այս իրավիճակում, թե՞ ոչ: Բացի այդ՝ արդբեջանական կողմը ցանկանում է հասկանալ նաև, թե որոնք են հայկական կողմի թույլ և ուժեղ կողմերը, ինչպես է ՀՀ-ի ղեկավարությունն արձագանքում այս ամենին, խուճապի մատնվու՞մ է, թե՞ սթափ է: Համբարձումյանի գնահատմամբ՝ այս անգամ հայկական կողմը շատ ճիշտ արձագանքեց՝ նույնպես սկսելով զորավարժություններ և դրանով ցույց տալով, որ մենք ևս պատրաստ ենք պատերազմի և վճռական ենք տրամադրված:
Ռազմական փորձագետն ասաց նաև, որ անցյալ տարի արդբեջանական զորավարժություններն այս ինտենսիվությունը չեն ունեցել, այս տարի դրանք շատ ավելի մասշտաբային են:
՛՛Դեպքեր են տեղի ունենում, որոնք փոխկապակցված են՝ Լավրովի հայտարարությունը և այլն: Բացի այդ՝ ապրիլինին Թուրքիան Սիրիայի հետ պատերազմ սկսեց: ՌԴ-ն Բաշար Ասադին ու կառավարական զորքերին է աջակցում, Պուտինն այդ ժամանակ ասել էր՝ ով կմտնի Սիրիա, համարեք՝ Մոսկվա է մտել, և Թուրքիան լայնամասշտաբ ռազմական գործողություններ սկսեց այս զգուշացումից հետո, այս պարագայում 2500 սիրիացիներ կոտորվեցին, 5 ռազմական ինքնաթիռ խոցեցին, 2 շաբաթ պատերազմը տևեց, լուրջ հարվածներ հասցվեցին Սիրիային Թուրքիայի կողմից, սակայն ՌԴ-ն բավականին հանդուրժող էր այս ընթացքում:
Ինչի՞ հետ է սա կապված. Ռուսաստանի Դաշնությունը սանկցիաների պատճառով խնդիրների առաջ է կանգնած՝ տնտեսական և այլն, ռուբլին արժեզրկվել է, ՌԴ-ին պետք են դոպինգային մեծ ծրագրեր՝ տնտեսության համար, և այդպիսին եղավ ՛՛Թուրքական հոսք՛՛ ծրագիրը, որը որոշ չափով փրկեց ռուսական տնտեսությունը, բայց նաև ՌԴ-ին Թուրքիայից որոշ չափով կախվածության մեջ գցեց, քանի որ Պուտինը ՛՛Թուրքկանա հոսքը՛՛ չուզեց վտանգել Ասադի պատճառով՛՛,-նշեց Համբարձումյանը և հավելեց, որ Էրդողանը հասկացավ, որ ռուսական կողմը հանդուրժող է լինելու, ուստի և ակտիվացան:
՛՛Չավուշօղլուն անդրադարձավ այդ օրերին ԼՂ-ին ու Ադրբեջանի տարածքային ամբողջականությանը, ես այստեղ վտանգ տեսա՝ մտածելով, որ ադրբեջանական կողմը հոտն առավ, որ ռուսական կողմը եթե հանդուրժող է թուրքական կողմի նկատմամբ, ադրբեջանականի դեպքում էլ հանդուրժող կլինի, այս ամենը հենց նրա արդյունքն է, որ թուրքական կողմը տեսավ հայ-ռուսաական հարաբերությունների ռեստարտը: Ռեստարտն ինքնին վտանգավոր չէ, բայց հայ-ռուսական հարաբերությունները ժամանակ են պահանջում, որ խաղաքարտերը դասավորվեն, և ադրբեջանական իշխանությունը դա ընկալեց որպես կանաչ լույս՝ նաև Լավրովի հայտարարությունը հաշվի առնելով՛՛,-հստակեցրեց ռազմական փորձագետը՝ ցույց տալով իր նշած դեպքերի փոխկապակցվածությունը: