Նախանշաններ կան, որ այս անգամ ապրիլի 24-ին նախագահ Բայդենը իր խոստմանը հավատարիմ կմնա եւ կճանաչի Հայոց ցեղասպանությունը, եթե անշուշտ Անկարան ավելի քաղցր մի բլիթով չհրապուրի նրան, եւ նա ստիպված չլինի ընդունել այն: Առայժմ Վաշինգտոնը չարագուշակ լռություն է պահպանում Անկարայի հետ իր հարաբերություններում: Նախագահ Բայդենը բարեկամ թե թշնամի շատ երկրների ղեկավարների հետ է հեռախոսազրույցներ ունեցել, բայց դեռեւս չի պատասխանել հեռախոսային կապ հաստատելու Էրդողանի հայցին: Տարածաշրջանում Իրանին (եւ նաեւ Ռուսաստանին) մեկուսացնելուց հետո, Անկարան այժմ փորձում է իր կամքը թելադրել այլ վայրերում եւ այլ ոլորտներում:
Իրականում նա արդեն տնտեսական մի նոր ծրագիր է մշակել «Վեցի հարթակ» խորագրով, որի մեջ ներգրավված կլինեն Ռուսաստանը, Թուրքիան, Ադրբեջանը, Վրաստանը, Իրանը եւ Հայաստանը: Ըստ Թուրքիայի արտգործնախարարության մի խոսնակի` վերջինս կհրավիրվի մասնակցելու, եթե հրաժարվի թշնամական վերաբերմունք ունենալ Ադրբեջանի եւ Թուրքիայի հանդեպ:
Վերոնշյալ զարգացման այս ծրագիրը եւ տարածաշրջանի հաղորդակցության միջոցների ապաշրջափակումը, որ նախատեսվում է նոյեմբերի 9-ի հայտարարությամբ, երկսայր թուր է Հայաստանի համար: Շրջափակման պայմաններում Հայաստանն արդեն կազմավորել է իր տնտեսությունը անցած 30 տարիների ընթացքում, այնպես որ շատ զգույշ պետք է լինի թուրքական որեւէ առաջարկի նկատմամբ ոչ թե սոսկ հիվանդագին վախից դրդված, այլ պարզապես հենվելով պատմական փորձառության վրա: Մեկ անգամ տուժվածը կրկնակի կզգուշանա: