Քաղաքագետ Հարություն Մկրտչյանի կարծիքով՝ Ռուսաստանի նախագահ Վլադիմիր Պուտինի այցը Բաքու, որը զուգորդվում է Ադրբեջանի պաշտպանության նախարարության կողմից տարածվող մի շարք ապատեղեկատվություններով, խոսում է մի բանի մասին, այն է, որ ռուս-ադրբեջանական տանդեմը պատրաստվում է հերթական արկածախնդրությանը: Քաղաքագետը կարծում է, որ դա կարող է լինել Հայաստանին հերթական անգամ զիջումներ պարտադրելով:
Նկատենք, որ, խոսելով Սյունիքի մարզի հաղորդակցությունների մասին, ռուսական դիվանագիտության գլուխ Սերգեյ Լավրովն ասել է, թե, ցավոք, իբր Հայաստանի ղեկավարությունն է, որ սաբոտաժի է ենթարկում պայմանավորվածությունը, որի ներքո ՀՀ վարչապետ Նիկոլ Փաշինյանի ստորագրությունն է։
«Այլ բան չի կարելի պատկերացնել այս երկու պետությունների առաջնորդների հանդիպումներից, հատկապես այն ֆոնին, երբ ՌԴ-ն այնքան էլ հեշտ օրեր չի ապրում, սակայն Պուտինին իր օդանավը տարել է Բաքու»,- «Հայկական ժամանակ»-ի հետ զրույցում ասում է նա:
Ըստ քաղաքագետի՝ COP29-ից հետո՝ աշնանը, տարածաշրջանում իրավիճակը կգնա կտրուկ սրացման. «Ադրբեջանը կգնա նման քայլի, քանի որ այս իրավիճակում պաշտոնական այցով Բաքվում ընդունել «իզգոյ» Վլադիմիր Պուտինին, այն էլ՝ այդպիսի ձևով, նշանակում է, որ Ադրբեջանը կատարել է իր ռազմավարական ընտրությունը, այսինքն՝ տեղավորվել է ռուսական նավում»:
Մկրտչյանի համոզմամբ՝ թե՛ Ադրբեջանը, թե՛ Ռուսաստանը շատ ակնհայտ ու բաց են խաղում, իսկ Հայաստանը հապաղում է:
«Ալիևն իր ռազմավարական կողմնորոշման մեջ շատ հստակ է, իսկ ՀՀ-ն որտե՞ղ է, աշխարհաքաղաքական ո՞ր ճամբարում, ո՞ր ուղղությունն է ընտրել, սրան էլ պիտի պատասխանի օրվա իշխանությունը: Մենք շարունակում ենք մնալ ՀԱՊԿ-ում, բայց համագործակցել ՆԱՏՕ-ի հետ, մնալ ԵԱՏՄ-ում, սակայն երազել ԵՄ անդամ դառնալու մասին: Մենք ռազմավարական դաշնակից և գործընկեր ենք հռչակել ՌԴ-ին, որը, ի դեմս Վլադիմիր Պուտինի և Իլհամ Ալիևի՝ 2022 թվականի դաշնակցային պայմանագրի, ԼՂ-ն հայաթափեց՝ հարյուր հազարից ավելի մեր քույրերին ու եղբայրներին անտուն դարձնելով: Հիմա վստահ քայլեր անելու ժամանակն է»,- կարծում է քաղաքագետը:
Զրուցակցի համոզմամբ՝ Հայաստանի Հանրապետությունը պետք է դիվանագիտական հարձակում իրականացնի թե՛ Ռուսաստանի, թե՛ Ադրբեջանի ուղղությամբ. «Դիվանագիտական հարձակում ասելով՝ նկատի ունեմ աշխարհաքաղաքական կուրսի՝ վեկտորի փոփոխություն, որին պատրաստ չեն ո՛չ Ադրբեջանը, ո՛չ էլ առավել ևս ՌԴ-ն, որպեսզի հակազդեն: Այս իրավիճակում եվրաինտեգրաման հանրաքվեն հավելյալ անվտանգային բարձիկներ կարող է բերել ՀՀ-ին: Մենք տեսել ենք, որ ԵԱՏՄ անդամ, ՀԱՊԿ անդամ Հայաստանի վրա Ադրբեջանն առանց խորշելու հարձակվում և տարածքներ էր օկուպացնում. եվրոպական դիտորդների տեղակայումից հետո այդ իրավիճակը կտրուկ փոխվել է: Անվտանգային բարձիկները պետք է ավելի շատացնել և այդ ուղղությամբ աշխատել»:
Անդրադառնալով Բաքվում Վլադիմիր Պուտինի այն հայտարարությանը, թե ուրախ կլինի հայ-ադրբեջանական կարգավորման և Խաղաղության պայմանագրի կնքման հարցում օգնել կողմերին, և որ Ադրբեջան այցից հետո Նիկոլ Փաշինյանին կտեղեկացնի Ալիևի հետ բանակցությունների արդյունքների մասին՝ Մկրտչյանն ասում է՝ Ռուսաստանը շահագրգիռ չէ տարածաշրջանում խաղաղություն հաստատելու առումով:
«Ակնհայտ է, որ ՌԴ-ին տարածաշրջանում անընդհատ տաք հակամարտություն է պետք, որպեսզի իր ձեռքում պահի և կառավարելի թե՛ Ադրբեջանին, թե՛ ՀՀ-ին, ուստի ես չեմ հավատում ՌԴ ներդրած ջանքերին: Կամ ի՜նչ խաղաղության մասին է առհասարակ խոսքը, երբ որ խաղաղապահների ուղիղ մասնակցությամբ ԼՂ-ն հայաթափվեց: Եվ, առհասարակ, Վլադիմիր Պուտին-Փաշինյան հանդիպում կլինի, թե հեռախոսազրույց, նույն պատասխանը նաև վարչապետ Փաշինյանի կողմից կլինի Պուտինին և շատ ավելի կոպիտ տոնայնությամբ. համբերության բաժակը վաղուց լցված է, և ՀՀ քաղաքացին չի պատրաստվում Բաքվում բեմականացված «խմբակային սեքսի» մասնակիցը լինել, աշնանն էլ ինչ-որ մի մոմ բռնող ինքնասառեցված հոգևորականի բեմականացված ակցիաներին նայել և մեկնաբանել: Մեր դաշնակիցը մեր թշնամու հետ դաշնակցային պայմանագիր ունի, որի կետերից մեկն էլ միմյանց հետախուզական տվյալների փոխանցումն է, իսկ մենք մեր «ծոցում» շարունակում ենք 102-րդ ռազմաբազա և «սպիտակ թուրքերի» ոհմակ պահել»,- ասում է քաղաքագետը:
Մկրտչյանը վերահաստատում է՝ ադրբեջանա-ռուսական որևէ հանդիպում, որևէ մերձեցում, որևէ բանակցություն և քննարկում, որտեղ առավել ևս խոսք կա հայ-ադրբեջանական հարաբերությունների մասին, փորձը ցույց է տալիս, որ հայկական կողմի վրա լավ հետևանքներ չի ունենում. «Հանդիպումից մեկ օր առաջ Ադրբեջանը սկսել է ստահոդ լուրեր տարածել մեր ԶՈՒ-ի հետ կապված, և դա շարունակվում է մինչև այս պահը և գնալով ավելի է սաստկանալու»: