Միլանի «Ինտերի» կիսապաշտպան Հենրիխ Մխիթարյանը պատրաստ է ֆրանսիական «Պարի Սեն Ժերմենի» հետ Չեմպիոնների լիգայի եզրափակիչ խաղին: Այս մասին գրում է իտալական Corriere dello Sport թերթը։
«Նույնիսկ 36 տարեկանում կարող է շրջադարձային պահ լինել։ Մխիթարյանի համար սա պարզապես խաղ չէ. սա այն գնացքն է, որին նա մի անգամ չհասավ, հիմա ժամանակն է նստել այն․․․ Հիմա ամեն ինչ այլ է: Հենոն պատրաստ է, սա իր եզրափակիչն է, և նա ցանկանում է լինել այս պատմական գիշերվա էպիկենտրոնում, գլխավերևում բարձրացնել եվրոպական ակումբային ֆուտբոլի ամենահեղինակավոր գավաթը»,- գրում է պարբերականը:
Թերթն ընդգծում է՝ Սիմոնե Ինձագիի թիմում Մխիթարյանը ոչ միայն կարևոր խաղացող է, այլև վստահության հենասյուն: Ավելին, այս մրցաշրջանում Հենրիխը յուրահատուկ կայունություն է ցուցաբերում։ Նա չորրորդն է թիմում անցկացրած խաղաժամանակի ցուցանիշով (3482 րոպե): Նրանից ավելի երկար խաղադաշտում են եղել միայն Բաստոնին (3836 րոպե), Բարելլան (3717) և Լաուտարոն (3643):
Նշենք, որ «Ինտերը», որի կազմում հանդես է գալիս Մխիթարյանը, դուրս է եկել ՈւԵՖԱ-ի Չեմպիոնների լիգայի եզրափակիչ: Եվրագավաթային հեղինակավոր մրցաշարի կիսաեզրափակչում «Ինտերը» հաղթել է Բարսելոնային (3:3 և 4:3): Եզրափակիչ հանդիպումը, որում «Ինտերի» մրցակիցը կլինի ֆրանսիական ՊՍԺ-ն, կկայանա մայիսի 31-ին Մյունխենում: