ՌԴ նախագահ Վլադիմիր Պուտինը, ըստ «Գլոբալիզացիայի և տարածաշրջանային համագործակցության վերլուծական կենտրոն»-ի նախագահ Ստեփան Գրիգորյանի, Բաքու էր մեկնել նաև քննարկելու համար Սյունիքով անցնող ճանապարհի հարցը, որը, ՌԴ տեսակետի համաձայն, պետք է վերահսկեն ՌԴ սահմանապահ ծառայության աշխատակիցները։
Ինչպես նշեց Սերգեյ Լավրովը, դա պայմանավորված է 2020 թվականի նոյեմբերի 9-ի եռակողմ հայտարարությամբ, որը ուժի մեջ է ու արդիական։ Հայկական կողմը, սակայն, նշում է, որ բոլոր կետերը խախտված են, և ինչո՞ւ պետք է Հայաստանը կատարի այդ փաստաթղթի 9-րդ կետը։ Արդյոք պե՞տք է Հայաստանը հետ կանչի իր ստորագրությունը։ Դա, սակայն, ըստ Գրիգորյանի, կարող է առիթ դառնալ Հայաստանի վրա նոր հարձակման համար։ «Ալիևը հիմա փնտրում է կիսալեգիտիմ հիմքեր՝ հարձակվելու համար։ Այսինքն՝ եթե մենք փաստաթղթից հրաժարվենք, նույն Ռուսաստանը կարող է ասել՝ տեսա՞ք, Հայաստանն է խախտում։ Մի կողմից՝ կարող ենք մտածել փաստաթղթից դուրս գալու մասին, մյուս կողմից՝ վտանգներ կան։ Դու առիթ ես տալիս Ռուսաստանին և Ադրբեջանին ու միջազգային հանրության այն կողմերը, որոնք հակված են լսել նրանց, կունենան հիմք դա անելու»,- ասաց Գրիգորյանն ու մատնանշեց Արցախի վրա հարձակումը, որը շատ կոշտ արձագանքի չարժանացավ անգամ դեմոկրատ երկրների կողմից։ Դա է պատճառը, որ պետք է զգուշավոր լինել նոյեմբերի 9-ի եռակողմ հայտարարության տակից Հայաստանի ստորագրությունը հետ կանչելու հարցում։
Անդրադառնալով Տելեգրամ-ալիքի հիմնադիր Պավել Դուրովի՝ Ֆրանսիայում ձերբակալությանը, Գրիգորյանը հիշեցրեց, որ նա Ֆրանսիա էր մեկնել Ադրբեջանից և այնտեղ էր գտնվել նաև Պուտինի՝ Բաքու այցի ընթացքում։ Ֆրանսիայի համապատասխան մարմինների կողմից Դուրովին ներկայացված մեղադրանքները Գրիգորյանը «խելքին մոտ» համարեց։
Տելեգրամյան մի շարք ալիքներ օգտագործվեցին և օգտագործվում են Հայաստանի դեմ մղվող մեդիապատերազմում, այդ թվում՝ 44-օրյա պատերազմի ընթացքում։ Այդ ալիքները կառավարվում և կառավարվում էին թե՛ դրսից, թե՛ Հայաստանից։ Գրիգորյանը նշեց, որ դա գործիք է ՀՀ թշնամիների դեմ, որը նրանք օգտագործում են այդ թվում Հայաստանի հեղինակությունը վնասելու համար։ «Ոչինչ պատահական չէ։ Գնում է ինֆորմացիոն պայքար՝ նաև Հայաստանի հեղինակության դեմ»,- նշեց վերլուծաբանը։
Դրա դեմ պետք է պայքարեն մեր իրավասու մարմինները՝ նկատեց Գրիգորյանն ու ուշադրություն հրավիրեց հանգամանքի վրա, որ խոսքը ոչ թե լրատվամիջոցների՝ այլ պրոպագանդիստական մեքենայի, գործակալական ցանցերի մասին է։
Անդրադառնալով ՀՅԴ բյուրոյի 34-րդ ընդհանուր ժողովից հետո կուսակցականներին ուղարկված շրջաբերականին, որտեղ վերջիններս կոչ էին անում աշխատանք տանել, որպեսզի ՌԴ կողմից Արցախը իրենց կազմ ներառելու դեպքում այնպես անել, որպեսզի ՀՀ-ի և Արցախի կարգավիճակների հարցը լուծվեր մեկ ընդհանուր սկզբունքով, այսինքն՝ վերացվեր ՀՀ անկախությունը, կամ, նվազագույնը, իջեցվեր ՀՀ ինքնիշխանության աստիճանը, Գրիգորյանն ասաց, որ ակնհայտ դարձավ նաև, որ ՌԴ-ն Արցախի մասով այդպիսի օրակարգ չի ունեցել։ ՀՅԴ-ն անգամ այդ հարցում է սխալվել ու սխալ հաշվարկ կատարել։
Հատկանշական է, որ նույն շրջաբերականում խոսք կա նաև Ջավախքի մասին։ «Հետամուտ լինել Վրաստանի կազմում Ջավախքի տարածաշրջանին ինքնավարության կարգավիճակ շնորհելու գործընթացին։ Ջավախքի հարցը մնայուն քաղաքական օրակարգ դարձնել ԱՄՆ-ի և Եվրոպայի Հայ դատի գրասենյակների համար»,- ասված է ՀՅԴ բյորոյի տարածած շրջաբերականում։
Ըստ Գրիգորյանի՝ սա ՌԴ ցանկությունն է՝ փչացնել Հայաստանի հարաբերությունները Վրաստանի հետ։ «Իզոլացնել Հայաստանը, որից հետո Հայաստանը կդառնա ՌԴ կցորդը՝ վերջնականորեն։ Ջավախքի ինքնավարության հարցը հայկական օրակարգ չէ, դա ռուսական օրակարգ է»,- ասաց Գրիգորյանն ու ավելացրեց, որ Վրաստանի հետ մենք խնդիրներ չունենք։ Ավելին՝ ջավախահայությունը շատ լավ ինտեգրված է վրացական հասարակությանը, լեզուն է սովորում, հարգում է վրաց ժողովրդին։ Գրիգորյանը նշեց նաև, որ վերջերս Հայաստանի դիրքերը, հեղինակությունը Վրաստանում բարձրացել են։
Ո՞րն է այդ հարցը բարձրացնելու Դաշնակցության նպատակն ու տրամաբանությունը՝ հարցին Գրիգորյանը պատասխանեց. «Դա կարող է լինել Ռուսաստանի ազդեցությունը՝ միամիտ կամ ագենտ հայերի միջոցով ապակայունացնել Հայաստան-Վրաստան հարաբերություններն ու Հայաստանին վերջնականորեն զրկել անկախ պետականություն ունենալու շանսից։ Մեր հատուկ ծառայությունները պետք է այս հարցով զբաղվեն»։
Մանրամասն՝ տեսանյութում