ԱՄՆ Սենատում Հայոց Ցեղասպանության բանաձևի նկատմամբ այժմ էլ վետո է կիրառել սենատոր Փըրդուեն: Այս մասին Analitik.am-ին հայտնեց քաղաքագետ Սուրեն Սարգսյանը:
Նա նշեց, որ այժմ Սպիտակ Տունը չի խառնվում Հայոց Ցեղասպանության բանաձի շուրջ բախումներին և սենատոր Փըրդուեն արդեն թուրքերի խնդրանքով է վետո կիրառել:
«Սպիտակ տունը Լինդսի Գրեհեմին Ցեղասպանության բանաձևի նկատմամբ խնդրել էր վետո կիրառել միայն այն ժամանակ, երբ Էրդողանը Վաշինգտոնում էր»,-ասաց նա՝ հավելելով, որ Գրեհեմը ետ է վերցրել վետոն և այժմ հայկական ու թուրքական լոբբիստների պայքարն է գնում:
«Եթե Հայոց Ցեղասպանության բանաձևն անցներ այն ժամանակ, երբ Էրդողանը Վաշինգտոնում էր՝ սկանդալ կլիներ։ Դրան հետևելու էին Էրդողանի հայտարարությունները, հետևաբար սկանդալից խուսափելու համար Գրեհեմը վետո դրեց»,-ասաց նա:
Հարցին՝ այժմ ի՞նչ պետք է անել, Սարգսյանը նշեց, որ պետք է ակտիվ աշխատել մնացած սենատորների հետ, հասկանալու համար, թե ինչ տարբերակներ կան Հայոց Ցեղասպանության բանաձևի ակտիվացման համար։
Քաղաքագետը նաև հաղորդեց, որ հիմա փորձում են հասկանալ, թե Փըրդուեն ինչ կապ ունի թուրքերի հետ, նաև ճշտում են, թե արդյոք նա կապ ունի թուրքական լոբբիստական կառույցների հետ:
Սարգսյանը կարևորեց ԱՄՆ Սենատում Հայոց Ցեղասպանության բանաձևի քննարկման շրջանակներում ՀՀ իշխանությունների դերը, սակայն նշեց, որ որևէ քայլ չեն անում, այնինչ հնարավոր էր օգտագործել ԱՄՆ հայ համայնքի ներուժը. «Այնտեղ կան մարդիկ, ովքեր կապեր ունեն հանրապետականների հետ, և կարելի է բանակցել նրանց հետ»:
Դիտարկմանը, որ դա կարող են անել հենց համայնքի ներակայացուցիչները, և արդյո՞ք պետք է ՀՀ-ի միջամտությունը, քաղաքագետն ասաց, որ հայկական լոբբին աշխատում է, սակայն կան մարդիկ, որոնց հետ պետք է խոսեն Հայաստանի իշխանությունները:
Իսկ թե ինչու չեն խոսում, կամ հայ-ամերիկյան քաղաքական հարաբերություններն ինչու բարձր մակարդակի չեն, Սարգսյանն ասաց, որ մեծ հաշվով, օրակարգ չկա, և առանձնապես խոսելու շատ բան չկա՝ բացի օգնությունից և օգնության տրամադրումից։
«Եթե նույնիսկ ներկա իշխանությունը նախկինից ժառանգություն չի ստացել ակտիվ կապեր և քննարկումներ, դա չի նշանակում, որ այս փուլում չպետք է նոր հորիզոններ բացվեն և նոր ուղղություններով աշխատեն»,-շեշտեց քաղաքագետը՝ փաստելով, որ ներկա իշխանության մեջ կան մարդիկ, ովքեր կարող են ակտիվ աշխատել հայ-ամերիկյան հարաբերությունների ակտիվացման ուղղությամբ, ուղղակի դրա համար պետք է ակտիվ աշխատանք ու քաղաքական որոշում: