Մենք ունենք տարբեր մարկերներ, որոնք խոսում են այն մասին, որ ԱՄՆ-ի կողմից Իրանին հարվածելու հավանականությունը բարձր է և նրանք, որորոնք ասում են, որ այդ հավանականությունը, դեռ այդքան բարձր չէ։ Այս մասին NEWS.am-ի հետ զրույցում նշեց «ԱՊՐԻ Արմենիայի» գիտաշխատող, Իսրայելի հարցերով փորձագետ միջազգայնագետ Սերգեյ Մելքոնյանը:
«Այո, ամերիկյան ավիակիրը գնում է դեպի Մերձավոր Արևելք, որը հավելյալ 50-ից 70 կործանիչներ է կրում և այո, անշուշտ դա մեծացնում է ԱՄՆ-ի օդային ուժը, որովհետև այն հնարավորությունները, որը այսօր ԱՄՆ-ն և Իսրայելը ունեն, բավարար չեն։ Երկրորդը, մենք տեսնում ենք Նեթանյահուի դեմ արշավը և Իսրայելի ներսում քաղաքական մակարդակում, և ուժային բլոկի կողմից, և նա որոշեց նոր փաստացի ռազմական օպերացիա սկսել Գազայում: Եթե իր հանդեպ աջակցությունը նվազի, այդ դեպքում այո, Նեթանյահուն կարող է բարձրացնել խաղադրույքները: Եվ, անշուշտ, ԱՄՆ-ում այս սցենարը կա սեղանի վրա:
Եվ մենք ունենք այլ խմբի մարկերներ, թե ինչու հավանականությունը դեռ այդքան բարձր չէ։ Առաջինը, ԱՄՆ-ն դեռ չի ապահովել իր ռազմաբազաների անվտանգությունը Մերձավոր Արևելքում, և սա հիմնական խնդիրն է, որովհետև այդ ռազմաբազաները կլինեն Իրանի համար մեկ թիրախը։ Երկրորդը, մարկերը, չկա կոնսենսուս և միջազգային, և տարածաշրջանային, որպեսզի լայնածավալ հարձակման դիմի ԱՄՆ-ն:
Այստեղ շատ կարևոր է նաև արաբական երկրների չեզոք դիրքորոշումը կամ կանաչ լույսը, և այս ուղղությամբ Իրանը ծավալում է աշխատանք։ Եվ երրորդը, նույնիսկ այն օդային ուժը, որը ԱՄՆ-ն բերում է տարածաշրջան, կարող է բավարար չլինի շատ մեծ խնդիրը լուծելու համար։ Ընդամենը մեկ օրինակ բերեմ, Իսրայելը կիրառում էր Մարկ- 84 ռումբերը, որոնք մոտավորապես 900 կգ են, 16 հատ ռումբ են գցել, որպեսզի կարողանան ոչնչացնել Հեզբոլայի բունկերը, որտեղ Նասրալան էր գտնվում և այլ հրամանատարները։ Այդ բունկերը անհամեմատելի թույլ է այն ենթակառուցվածքի համեմատ, որոնք կան Իրանում։ Այս դեպքում խոսքը 10,000 այսպիսի ռումբերի մասին է, որպեսզի իրենք կարողանան որևէ հարց լուծել Իրանի տարածքում»,- հայտարարեց փորձագետը:
Նա նկատեց, որ Իսրայելը շահագրգռված է հարցը լուծել ուժային ճանապարհով, սակայն հիմնական որոշում կայացնողը Թրամփն է, որովհետև Իսրայելը միակողմանի որևէ լուրջ բան չի կարող անել:
«Հիմա հարցն այն է, թե արդյոք Թրամփձը կհամաձայնի անուղղակի բանակցություններ վարել Իրանի հետ: Եթե մեկնարկեն անուղղակի բանակցությունները, սա արդեն շատ կարևոր դեսկալացիայի նշան է, բայց այն ուժը, որ արդեն ԱՄՆ-ն կուտակել է Մերձավոր Արեւելքում, անշուշտ նվազեցնում է Իրանի դիրքերը բանակցային սեղանի շուրջ»,-ասաց Մելքոնյանը:
Բացի այդ, փորձագետը նկատեց, որ այսօր Իսրայելը նոր ռազմական օպերացիա է սկսել Գազայում, նաև շարունակում է թիրախավորել ռազմական ենթակառուցվածքը Սիրիայի տարածքում, որպեսզի զրոյացնի հնարավորությունը, որ Թուրքիան կունենա այնտեղ ռազմական ներկայություն. «Հիմա Իսրայելի ընդհանուր անվտանգության համակարգը աշխատում է հիմնականում այս երկու ուղղությունների վրա։ Հետևաբար, բավականին ուժ և ունակություն, որպեսզի մի հատ էլ ամենամեծ ճակատը բացի Իրանի ուղղությամբ, դժվար կլինի»: