«Պռոշյան և Քասախ համայնքների բնակիչները, ովքեր օգտվում են տրանսպորտի 25 և 59 համարների գծերի ավտոբուսներից դեպի Երևան, վճարում են 150 դրամ։ Ավտոբուսները գործում են Երևանի քաղաքապետարանի ենթակայության տակ։ Իսկ հիմա քաղաքապետարանը հանում է ավտոբուսները, նոր երթուղին սպասարկելու է «Մուլտիտրանսպորտ» ընկերությունը 250 և 200 դրամ արժեքով»,- ասաց Պռոշյանի բնակիչներից մեկը։
Բացի այդ, նրա ներկայացմամբ, նոր երթուղին սպասարկելու է ընդամենը 7 կմ՝ մինչև Ֆիզիկայի ինստիտուտ, վերջին ավտոբուսը նախատեսված է ժամը 19։30-ին։ Իսկ մեր նախկին երթուղու վերջին կանգառը եղել է Հաղթանակի զբոսայգու մոտ։
Հիշեցնենք, որ Պռոշյան և Քասախ համայնքների բնակիչները վաղ առավոտից բողոքի ակցիա են իրականացնում տրանսպորտի 25 և 59 համարների գծերի կրճատման և նոր՝ ավելի թանկ երթուղու դեմ։ Նրանք փակել են դեպի Աշտարակ տանող ճանապարհը։
«Ինչ-որ օլիգարխներ ուզում են սողոսկել ու բերել այստեղ այլ տրանսպորտ դնել, որը մեզ կտեղափոխի A կետից B կետ, շատ կարճ ճանապարհ։ Մենք դեմ ենք դրան, անընդունելի է»,- լրագրողներին ասաց դեպի Աշտարակ տանող ճանապարհը փակած ակցիայի մասնակիցներից մեկը։
«Հարյուրավոր երեխաներ սովորում են քաղաքի դպրոցներում։ Թոռներս ամեն օր գնում են դպրոց ու վերադառնում։ Ընտանիքն ի վիճակի՞ է ամեն օր հազարավոր դրամներ ծախսել տրանսպորտի համար։ Պռոշյանում ոչ մի արտադրական հիմնարկ չկա, ոչ մի աշխատատեղ չկա, բոլորը կապված են Երևանի հետ։ Ի՞նչ է նշանակում տեղական մարզային տրանսպորտի միջոց, մենք պետք է քաղաքային տրանսպորտից օգտվենք»,- ասաց ակցիայի մասնակից կինը։
Ակցիայի մասնակից բնակիչներն ընդգծեցին՝ ոչ մեկ չի օգտվելու այդ նոր երթուղու ավտոբուսներից։
«Չենք օգտվելու։ Ոտքով կգնանք, չենք օգտվի։ Սա է մեր վերջնական որոշումը»,- ասացին ակցիայի մասնակիցները։
«Եթե երկուշաբթի օրը կառավարության անդամները մեր հարցին դրական լուծում չտվեցին, մեր ժողովրդի պահանջը չկատարեցին, 25 համարը չպահպանվեց, մեր ողջ ժողովուրդը պալատկետքը խփելու է Նիկոլի տան դեմը, ճանապարհը փակելու ենք։
Մենք հարգում ենք մեր ոստիկանների աշխատանքը, բացում ենք ճանապարհը, գնում ենք գյուղապետարան 20 հոգանոց թիմ ընտրելու, ովքեր երկուշաբթի ներկայացնելու են մեր պահանջը։ Եթե հարցին լուծում չտրվեց, մենք կոպիտ քայլերի ենք դիմելու։
Մեզ խոստացել ենք՝ մինչև մեր՝ իրենց հետ հանդիպումը, հարցի լուծումը , Պռոշյան համայնքի 25 համարը գործելու է։ Եթե դա չգործեց, մեզ խաբեցին, ուրեմն իրենց չունենք ոչ հարգելու ոչ ենթարկվելու, ոչ լսելու»։
Ապրիլի 7-ին ժամը 17։30-ին բնակիչները պետք է հանդիպի ՏԿԵ փոխնախարար Արմեն Սիմոնյանի հետ: