Կան բնապահպանական կազմակերպություններ ներկայացնող անձինք, որոնք ֆինանսավորվել են այլ տնտեսվարողներից։ Այս մասին այսօր լրագրողների հետ զրույցում ասաց ՀՀ շրջակա միջավայրի նախարար Էրիկ Գրիգորյանը՝ անդրադառնալով փոխվարչապետ Տիգրան Ավինյանի ու վարչապետ Նիկոլ Փաշինյանի այն հայտարարությանը, թե Ամուլսարի հանքի բացման դեմ արշավը հովանավորում են հանքարդյունաբերական այլ ընկերություններ։
Հարցին, թե վերջապես ինչ է որոշվել Ամուլսարի հանքի շահագործման մասին և ինչ քայլեր են ձեռնարկում, Էրիկ Գրիգորյանը պատասխանեց, որ դեռ քննչական գործն է ընթանում։ Նա հիշեցրեց, որ ՀՀ քննչական կոմիտեի ՀԿԳ քննության գլխավոր վարչությունում հարուցվել է քրեական գործ՝ ՀՀ բնապահպանության նախարարության պաշտոնատար անձանց կողմից շրջակա միջավայրի աղտոտման մասին տեղեկությունները դիտավորությամբ թաքցնելու առերևույթ դեպքի առթիվ։
«Յուրաքանչյուր ՀՀ քաղաքացի կարող է պայմանագիր կնքել և աշխատել իրավաբանական անձի հետ, որոնք կարող են հանրայնացնել, թե որ կազմակերպության հետ են աշխատում»,- նշեց նա և հիշեցրեց, որ Ամուլսարի հետ կապված օրենքի տառին համաձայն փորձաքննություններ դեռ չեն իրականացվում, փոխարենը իրականացվում են գործընթացներ մի քանի անհամաձայնությունների մասով։
Անդրադառնալով հարցին, թե Ամուլսարի հիմնական խնդիրներից մեկը թթվային դրենաժն է, և այդ խնդրով երբ է ուսումնասիրվել մյուս հանքերի թթվային դրենաժը և ինչ տարբերություն կա, Էրիկ Գրիգորյանը նշեց, որ տարբեր ակտիվ մետաղական նյութերի փոխազդեցության արդյունքում որոշ հանքերում ևս թթվային դրենաժի պրոցեսներ կան։
«Մենք նախաձեռնել ենք մեր մոնիտորինգի դիտակետերի տեղափոխման գործընթաց։ Օրինակ՝ Ողջի գետի վրա դիտակետ ունեինք, որը ցույց էր տալիս, որ ջրի որակը բավական վատն է»,- ասաց նա և հավելեց, որ հիմա դիտակետերը պետք է տեղափոխեն այն վայրերը, որոնք էտալոնային են, որտեղ արդեն կարող են թթվային դրենաժի ազդեցություններն ուսումնասիրել։