Անկախ նրանից, թե այն ժամանակ մարդիկ բարիկադի որ կողմում էին, իհարկե շատ ցավալի են այդ դեպքերը, շատ ցավալի է զոհեր ունենալու հանգամանքը, և ես չեմ չափազանցնում, բայց ամենամեծ տուժածներից, զոհերի հարազատներից հետո, մեր ընտանիքը, քանի որ այդ ամենը անարդարացիորեն առաջին օրից նպատակաուղղված փորձեցին կապել մեզ հետ, տարիներ շարունակ այդ գիծը տարան: Այս մասին լրագրողների հետ զրույցում ասաց ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը` ցավակցելով զոհերի հարազատներին:
Նա նշեց, որ «Մարտի 1-ի գործը հետհեղափոխական Հայաստանում» տեղեկատվական կոնֆերանսին փորձեցին ցույց տալ, թե ինչ մանիպուլյացիաներով, կեղծիքով փորձել են իրենց հետ կապել այս գործը:
«Հույս ունեմ, որ մի օր կբացահայտվի այս ամենը, քանի որ այն դատավորությունը, որի ականատեսն ենք լինում, բազմիցս ասվել է, որ կապ չունի զոհերի մահանալու հանգամանքները պարզելու հետ, սա քաղաքական պրոցես է, որը կոնկրետ քաղաքական, անձնական նպատակ է հետապնդում՝ ամեն գնով կալանքի տակ պահելու հորս»,- ասաց նա:
Լևոն Քոչարյանը նշեց, որ երբևէ զոհերի հարազատների հետ չի խոսել, սակայն խնդիր չունի հանդիպելու առումով: «Ես, իմ ընտանիքը, հայրս, ոչ մի առնչություն չունենք այդ զոհերի հետ և ինձ հետաքրքիր է, թե իրենք փորձե՞լ են այսօրվա վարչապետին հարցեր ուղղել, թե ինչու էր այն ժամանակ մարդկանց կոչ անում զոհվել, ապստամբել, ինչո՞ւ էր հրճվում, երբ ոստիկաններից խլվում էին մահակները, վահանները, ինչո՞ւ էր ասում, որ պետք է ազատվել ղարաբաղցի տականքներից: Լավ վերջիվերջո ինչո՞ւ թողեց փախավ այդ օրը, բարոյական առումով այդ հարցի պատասխանը ստացե՞լ են: Միգուցե, հասկանում եմ, որ մեծ մասը, եթե ցույցերին մասնակցել է, ապա այն ժամանակ իշխանություններին ընդդիմադիր է եղել, բայց արդյո՞ք չեն տեսնում ուղիղ կապ զոհեր լինելու հանգամանքի և այդ ժամանակ ցույցերի ղեկավարների գործողությունների մեջ»,- ասաց նա:
Ըստ Լևոն Քոչարյանի` մարդկանց տրամադրությունները վերջին շրջանում շատ է փոխվել: «Այս երկու տարին լավագույնս են ցույց տալիս այն անցած տարիների բազմաթիվ կեղծիքները, որ արվել են և սլաքներ են ուղղվել մեր ընտանիքի հանդեպ և ցույց է տալիս այդ ամենի կեղծ ու սուտ լինելը»,-ասաց նա:
Լևոն Քոչարյանը նշեց, որ դժվարանում է հիշել այդ օրերին «Մարտի 1»–ի հետ կապված տանը քննարկումներ եղած լինեն, քանի որ հայրը գործի հետ կապված թեմաներ երբեք չի քննարկել, իսկ պաշտոնավարումից հետո խոսել են: «Հիմնական զոհերը եղել են չվերահսկվող տարածքներում, այսինքն՝ անհանգստություն ունեցել է, բայց նա արդեն նախագահ չէր և որևէ միջամտության փորձ, որևէ առնչություն չի ունեցել գործընթացին և ակնկալիք է ունեցել, որ պետք է գտնվեն այն մարդիկ, որոնք պատասխանատու են»,-ասաց նա:
Անդրադառնալով հանրաքվեին, նա ևս մեկ անգամ հաստատեց, որ ոչ մի կապ չունեն «Ոչ»-ի ճակատի հետ և այնտեղ կան մարդիկ, որ Նիկոլ Փաշինյանի պաշտպաններն են եղել: «Այս պրոցեսը ի սկզբանե հակաօրինական, հակասահմանադրական պրոցես է, որը կոնկրետ նպատակ է հետապնդում՝ ազատվել իրենց համար ոչ ցանկալի կազմից»,- ասաց նա և նշեց, թե կարծում է, որ մաքսիմալ պետք է փորձել մասնակցություն չունենալ այս գործին:
https://www.youtube.com/watch?v=ci__0S9cTns&feature=emb_logo