Սոցիական ցանցերում շրջանառվում է ապատեղեկատվություն, որ կորոնավիրուսը, իբրեւ, տարածվում է ախտորոշման թեստերի միջոցով: Ֆեյսբուքի օգտատերերից մեկը կոչ է արել իր ընկերներին ոչ մի դեպքում չհանձնել կորոնավիրուսի թեստ, քանի որ «դեռ հայտնի չէ, թե ինչպես է տարածվում վիրուսը. հնարավոր է՝ հենց թեստերի միջոցով է տարածվում»:
Հղում անելով ՀՀ առողջապահության նախարար Արսեն Թորոսյանի՝ նախկինում ասված խոսքերին, որ Հայաստանի պես երկրները պետք է մասնակցեն կլինիկական հետազոտություններին, օգտատերը նշել է, որ, հնարավոր է, տեղի ունեցողը ինչ-որ «փորձարկումների» մաս է:
Օգտատերը կոչ է արել իր ընկերներին «լիմոնով թեյ խմել, օգտագործել կոճապղպեղ, առավոտյան նախաճաշին մեկ բաժակ ջրով մանրացված սխտոր վիրուսներից պաշտպանվելու համար, եւ ոչ մի դեպքում չհանձնել այդ թեստը»:
Այդպիսի կոչերը կարող են լուրջ վտանգ ներկայացնել հանրային առողջապահության տեսանկյունից, հատկապես, պանդեմիայի պայմաններում: Հայաստանում, մասնավորապես, արդեն եղել են դեպքեր, երբ վարակվածների հետ շփված մարդիկ փորձել են թաքնվել առողջապահության ոլորտի աշխատակիցներից: Այդպիսի քաղաքացիների ազատ տեղաշարժը, եթե նրանք իսկապես վարակված են, կհանգեցնի կորոնավիրուսային վարակի լայն տարածմանը:
Թեստավորումից հրաժարվելու խնդիրների վառ օրինակ է գրանցվել Հարավային Կորեայում. 61-ամյա կինը հրաժարվել է թեստից եւ գնացել եկեղեցի, որտեղ վարակել է մի քանի տասնյակ մարդու:
NEWS.am Medicine-ին պարետատանը հայտնել են, որ քննարկվող գրառումը կհայտնաբերվի, որից հետո որոշում կկայացվի հետագա գործողությունների վերաբերյալ:
Հիշեցնենք, որ ո՛չ սխտորը, ո՛չ կոճապղպեղը, ո՛չ ինչ-որ ուրիշ ժողովրդական մեթոդ, ինչպես խունկը, իրականում չեն կարող պաշտպանել վիրուսներով, այդ թվում՝ կորոնավիրուսով վարակվելուց: Սխտորի մասին միֆին անդրադարձել են նաեւ ԱՀԿ մասնագետները՝ նշելով, որ որեւէ հիմք չկա կարծելու, որ այն կանխարգելում է վարակը:
Ինչ վերաբերում է կոճապղպեղին, ապա օրական խորհուրդ է տրվում օգտագործել առավելագույնը 2-4 գրամ: Այդ մթերքն օգտագործելը չի կարող պաշտպանել կորոնավիրուսից, անգամ կարող է հանգեցնել առողջական մի շարք խնդիրների առաջացմանը հատկապես մարդկանց մոտ, որոնք ունեն խնդիրներ, օրինակ, ստամոքսի հետ:
Սխտորի միջոցով «պրոֆիլակտիկայի» պատճառով առնվազն մեկ մարդ է արդեն տուժել:
Հիշեցնենք նաեւ, որ Իրանում սոցցանցերով տարածվող ապատեղեկատվությունը, որ կորոնավիրուսը հնարավոր է կանխարգելել ալկոհոլի միջոցով, հանգեցրել է շուրջ 500 մարդու մահվան, եւս 2850 մարդ լուրջ վնասվածք է ստացել:
:
