Կարանտինը բացարձակապես չնպաստեց կորոնավիրուսի կանխարգելման աշխատանքներին, իմ կանխատեսմամբ՝ սահմանափակումների թուլացումից հետո դեպքերի թիվը ընդամենը մի քանի օրում կհասնի 5000-ի, ու մենք կանցնենք ավելի խիստ կարանտինային սահմանափակումների, բայց արդյո՞ք պետք էր այս փորձարկումն անել:
Tert.am-ի հետ զրույցում այս տեսակետը հայտնեց բժիշկ-թերապևտ, Ներքին հիվանդությունների բժշկության հայկական ասոցիացիայի նախագահ Լամարա Մանուկյանը՝ անդրադառնալով պարետատան որոշմանը՝ մայիսի 4-ից վերացնել սահմանափակումների մեծ մասն ու թույլ տալ քաղաքացիների ազատ տեղաշարժը:
«Կարանտին անելը սխալ չէր, դրա կազմակերպման ձևն էր սխալ: Ոչինչ չփոխվեց, վարակման դեպքերն ավելանում են և դեռ կավելանան: Արդո՞ք հիմա առաջնային էր գեղեցկության սրահների, սրճարանների բացումը: Մարդիկ կյանքի խնդիր ունեն, որն է այս պահին այդ հաստատությունների բացման առաջնահերթությունը: Ինքս ավելի կողմ եմ, որ հիմա գործարաններ բացվեն, ոչ թե սպասարկման ծառայությունները»,-նշեց նա:
Մանուկյանը նկատեց՝ թեև կարանտինի ընթացքում բաց էին միայն խանութներն ու դեղատները, սակայն դիմակով էին միայն դրանց աշխատակիցները, այցելուների մեծ մասն առանց դիմակների էր:
«Եթե որևէ հաստատություն բաց էր թողնվում, դրա մուտքի մոտ պետք է հսկիչներ լինեին, որ հստակ սահմանված քանակից ավելի մարդ չկարողանար ներս մտնել: Այդ քայլերը պահելու դեպքում միայն կարանտինը կլիներ կարանտին: Կամ ի՞նչ էր նշանակում՝ ժամը 10-12-ը խանութ թող գնան տարեցները: Տարբերությունը ո՞րն է, եթե խանութում կարող է միաժամանակ գտնվել, օրինակ՝ 50 մարդ: Այդ դեպքում պարզապես անհար է պահպանել սոցիալական հեռավորություն: Նրանցից մեկի՝ վարակված լինելու դեպքում էլ բոլորը կարող են վարակվել»,-ասաց բժշկուհին՝ նշելով նաև, թե պարետատան կամավորները կարող էին իրականացնել այդ հսկողությունը, և հերթերը գոյանային դրսում:
Նա ընդգծեց՝ հույսը չպետք է դրվեր նրա վրա, թե քաղաքացիները կդրսևորեին բարձր գիտակցություն, ու սահմանված կանոները հստակ կկատարեին:
«Վերհսկողություն չեղավ, բնակչության մի մասը շարունակեց դուրս գալ տնից, արդյունքում դեպքերն ավելացան, ինչի հետևանքով էլ բնակչության այն հատվածը, որը մնում էր տանն ու հետևում սահմանափակումներին, սկսեց մտածել, որ դա, միևնույն է, արդյունավետ չէ, ու ինքն էլ սկսեց դուրս գալ տնից»,-ասաց Մանուկյանը:
Նրա դիտարկմանբ՝ քաղաքացիների՝ կարանտինին անլուրջ վերաբերվելուն ինչ-որ չափով նպաստեցին նաև ՀՀ վարչապետ Նիկոլ Փաշինյանի հայտարարությունը, թե «կորոնավիրուսն ում շունն է», և առողջապահության նախարար Արսեն Թորոսյանի հայտարարությունը, թե «կորոնավիրուսը հատուկ վտանգավոր հիվանդություն չէ»: «Ես մինչ օրս հանդիպում եմ մարդկանց, որ մեջբերում են այդ հայտարարություններն ու չեն պահում սահմանափակումները»,-ասաց բժշկուհին:
Նա կարևորեց նաև բուժաշխատողների անվտանգության խնդիրը՝ նշելով, թե ՀՀ-ում նրանք պաշտպանված չեն: