«Քաղաքային այս չարիքը կոչվում է տրանսպորտ»,-այս մասին այսօր «Տեսակետ» մամուլի ակումբում հրավիրված ասուլիսի ժամանակ ասաց Երևանի քաղաքապետարանին կից գործող՝ Տրանսպորտի հարցերով հանձնաժողովի անդամ, Սպառողների միության նախագահ Արմեն Պողոսյանը:
Նա անդրադարձավ Երևանի տրանսպորտային համակարգի ընդհանուր վիճակին՝ ահազանգ հնչեցնելով այն մասին, որ տրանսպորտի ապագան, իր խոսքով, մեղմ ասած՝ մշուշոտ է:
Պարոն Պողոսյանը նշեց, որ արդեն չորս տարի է՝ ինչ բրիտանական WYGI խորհրդատվական ընկերությունը վերոնշյալ հանձնաժողովի հետ տրանսպորտի ցանց է նախագծում Երևանի համար, քննարկումներ է անցկացնում, ներկայացրել է 400 էջանոց փաստաթուղթ՝ «Քաղաքային երթևեկության բարելավում» ծրագիրը, կազմակերպությանն իր աշխատանքների համար մեծ գումարներ են վճարվել, սակայն այդ փաստաթղթում ոչ մի հստակ կետ՝ ժամկետներ, ռեսուրսներ, պլանավորում և այլն, նշված չէ:
Սպառողների միության նախագահը համոզված է, որ, քանի որ ծրագրում դրույթ կա՝ կապված երթուղային տաքսիների վերացման հետ, ուստի տրանսպորտի սակագինը շատ կտրուկ կաճի.
«Դա միանշանակ է և անխուսափելի, ինչու՞, որովհետև ավտոբուսներն ավելի թանկ են, քան երթուղային տաքսիները»:
Խոսելով կանգառներում երկար սպասելու մասին՝ Պողոսյանն ասաց, որ նշվում է, որ երթևեկության ինտերվալը պիտի լինի 9-15 րոպե: «Ես հարցրեցի՝ ինչու՞ այդքան շատ, այդքան սպասելն անհարմար է, ինձ ասում են՝ պիկ ժամերին էլ երեք րոպե է լինելու: Այդ ինչպե՞ս է ստացվում, պիկ ժամերին ավտոբուսները պիտի օդո՞վ թռչեն»,-տարակուսեց բանախոսը:
Նա անդրադարձավ նաև ծրագրում եղած մի դրույթի, որին համաձայն է լիովին, այն է՝ անցումն էլեկտրոնային տոմսերին: Ըստ Պողոսյանի՝ մեկ օրանոց, մեկ շաբաթանոց կամ նման այլ էլեկտրոնային տոմսերը շատ ավելի մատչելի և հարմար կլինեն:
Արմեն Պողոսյանն անդրադարձավ նաև մետրոյի նոր կայարանների ստեղծմանը: Նա նշեց, որ վերջին 32 տարում մետրոյի նոր կայարան չի ստեղծվել, ինչը, բնականաբար, լավ չէ՝ հատկապես այն դեպքում, երբ օրական 613 հազար մարդ է երթևեկում տրանսպորտով, իսկ տրանսպորտ ասվածը, անշուշտ, միայն վերգետնյան չէ:
Բանախոսը վստահեցրեց, որ այս բոլոր խնդիրները լուծելի են: «Խնդրի լուծման ձևը սահմանված է՝ դա բանավեճն է՝ շարունակական, մշտական բանավեճը՝ հասարակական և պետական մարմինների միջև, իսկ եթե մի կողմի բերանը փակում են, չեն լսում, ունենում ենք այս վիճակը»,-եզրափակեց Արմեն Պողոսյանը: