Ռազմավարական գործընկերության փաստաթղթի պարագայում Փաշինյանի հանդիպումը Վենսի հետ ցույց է տալիս՝ ԱՄՆ նոր վարչակազմը զգալիորեն քիչ հետաքրքություն ունի ՀՀ-ի հանդեպ.

Միացյալ Նահանգների փոխնախագահ Ջեյմս Դեյվիդ Վենսի հետ ՀՀ վարչապետ Նիկոլ Փաշինյանի հանդիպման ընդհանուր անտուրաժի մասին խոսում է լուսանկարը, որը բավական փնթի է, միջպետական հարաբերություններին բացարձակապես ոչ բնորոշ. Aysor.am-ի հետ զրույցում, խոսելով հանդիպման նշանակության մասին, ասաց քաղաքական վերլուծաբան Հակոբ Բադալյանը։

Ըստ Բադալյանի՝ այս տեսանկյունից արդեն իսկ նկատելի է որոշակի վերաբերմունք՝ սկսած հանդիպման կազմակերպման որակից։

«Հակառակ պարագայում, գոնե տեղեկատվության մատուցման իմաստով, լուսանկարի կոկիկության և այլնի մասով կտարվեր շոշափելի աշխատանք։ Տպավորություն է, որ, իսկապես, հայկական կողմը հենց ԱՄՆ-ում է կարողացել հասնել փոխնախագահի հետ հանդիպման, և մինչև Փաշինյանի մեկնելը չի եղել որևէ պայմանավորվածություն և վստահություն այդպիսի հանդիպման վերաբերյալ»,-ասաց նա։

Քաղաքական վերլուծաբանի դիտարկմամբ՝ պաշտոնական հանդիպումը ԱՄՆ բարձրաստիճան պաշտոնյայի հետ պետք է գոնե անցներ այն փաստաթղթի տառին ու ոգուն բոնորոշ, որը ստորագրվեց ՀՀ-ի և ԱՄՆ-ի միջև մի քանի շաբաթ առաջ՝ նախկին վարչակազմի հետ։

«Այդ ստորագրված ռազմավարական գործընկերության հանձնաժողովների կանոնադրությունը, հետո արդեն Փաշինյանի այցն ընդհանրապես, այդ այցի ժամանակագրությունը և հանդիպումների աշխարհագրությունն անհամադրելի են։ Եվ սա ցույց է տալիս, որ նոր վարչակազմը, այդուհանդերձ, զգալիորեն քիչ հետաքրքրություն ունի ՀՀ-ի նկատմամբ, քան դեմոկրատների վարչակազմը։ Սա, իհարկե, պայմանավորված է ոչ թե  Հայաստանը սիրել-չսիրելով, այսինքն՝ այնպես չէ, որ նոր վարչակազմն ավելի քիչ է սիրում Հայաստանը, քան մյուսները… հասկանալի է, որ քաղաքական վերաբերմունքն այնպես չէ, որ բացարձակ նշանակություն չունի, բայց այս դեպքում, անշուշտ, արտաքին քաղաքական անելիքների վերաբերյալ իր պատկերցումներով նոր վարչակազմն ավելի քիչ տեղ է հատկացնում Հայաստանին, քան նախկին վարչակազմը»,-ասաց նա։

Անդրադառնալով հանդիպման բովանդակային մասին՝ Հակոբ Բադալյանը նշեց, որ, բնականաբար, ԱՄՆ-ն այս կամ այն կերպ առնչվելու է Կովկասին։

«Իսկ քանի որ ՀՀ-ն էլ Կովկասում է, ուրեմն առնչություն լինելու է, բայց եթե խոսենք հետաքրքրության մասին քաղաքական բովանդակության իմաստով, ապա այստեղ առանցքային է հետևյալ հարցը՝ արդյո՞ք Վենսի հետ Փաշինյանի խոսկացությունը ներառել է, այսպես կոչված, Միջին միջանցքի հարցը, որը նախորդ վարչակազմը հռչակել էր որպես իրենց համար ռազմավարական առաջնահերթություն։ Ինչպե՞ս է այդ առաջնահերթությանը վերաբերվում Թրամփի վարչակազմը, արդյո՞ք շարունակելու է նույն հետևողականությամբ, ինչ նախկինն էր․ փորձել կառուցել այդ Միջին միջանցք ասվածը, և, ընդհանրպես, ինչպես է վերբերվում Թրամփի վարչակամզը Կովկասը ՌԴ-ի և Իրանի հարաբերությունների արգելկման գոտի դիտարկելու հեռանկարին»,-նշեց նա։

Քաղաքագետը հիշեցրեց՝ նախկին վարչակամզը բաց տեքստով հայտարարում էր, որ իրենք Կովկասում փորձելու են թուլացնել ՌԴ-ի և Իրանի ազդեցությունը։

«Հիմա մենք տեսնում ենք, որ ՌԴ-ն ու Իրանը ռազմավարական համապարփակ գործընկերության վերաբերյալ միջպետական պայմանագիր են կնքում։ Ինչպիսի՞ն է լինելու ԱՄՆ նոր վարչակազմի վերաբերմունքը, այդ պայմանագիրը կարո՞ղ ենք դիտարկել Թրամփ –Պուտին մեծ գործարքի մաս, թե՞ ընդհակառակը՝ Թրամփը փորձելու է ի հակադրություն դրա Կովկասում շարունակել Իրանի և ՌԴ-ի ազդեցության դեմ։ Սրանք են էական, արդյո՞ք այս թեմաների վերաբերյալ մեսիջներ փոխանակվել են, թե՞ ոչ, թե՞ եղել է պարզապես քաղաքավարական հանդիպում։ ԱՄՆ-ն չի ուզել այսպես բացարձակ անուշադրության մատնել Փաշինյանի այցը և գոնե փոխնախագահի մակարդակով ուշադրության արժանացրել է»,-ասաց նա։

Հարցին, թե այս հանդիպումով, ինչքանով որ կար, բավարա՞ր է արդյոք, որ ՀՀ վարչապետը վերադառնա և շարունակի պնդել Խաղաղության պայմանագրի շուրջ դիրքորոշումը՝ Բադալյանը պատասխանեց, որ ՀՀ-ի այդ դիրքորոշումը, լայն իմաստով, ուղիղ կապ չունի ՀՀ-ի և այլ արտաքին գործընկերության հետ. «ՀՀ-ն այդ դիրքորոշումը որդեգրել է ուժերի հարաբերակցությունից, և ելնելով այն հանգամանքից, որ այդ ոչ նպաստավոր  ուժային հարաբերակացության պայմաններում ՀՀ-ն չունի անվերապահ ուժային աջակցություն, այդ խաղաղության մոտեցումն է որդեգրված»։