Օտարերկրյա ներդրողների համար ԱՄՆ կեցության թույլտվության նոր ձեւը կարող է կոչվել Trump card: Այս մասին չորեքշաբթի Fox News հեռուստաալիքի հարցազրույցում հայտնել է ԱՄՆ նախագահ Դոնալդ Թրամփը։
Ավելի վաղ նա եւ այլ ամերիկացի պաշտոնյաներ նշել էին, որ այս ծրագիրը, որն ի վերջո հնարավորություն կտա ստանալ ԱՄՆ քաղաքացիություն, կարելի է անվանել «ոսկե քարտ»: «Խնդիրն այն է, որ «ոսկե քարտերը» շատ են։ Ես ձեզ կասեմ, թե իմ ժողովուրդն ինչպես է ուզում անվանել դա: Սա խելագարության կհասցնի ձախերին։ Նրանք ցանկանում են դա անվանել Trump card»,- ասել է ԱՄՆ վարչակազմի ղեկավարը։
Նա ընդգծել է, որ այս քարտի վաճառքից ստացված ողջ հասույթն ուղղվելու է ԱՄՆ պետական պարտքի մարմանը, որը գերազանցում է աստղաբաշխական 36 տրլն դոլարը։ «Այս ամենը կուղղվի պարտքի մարմանը»,- ասել է Թրամփը: «Մենք շատ քիչ պարտք կունենանք»։ Նախագահը հիշեցրել է, որ կեցության թույլտվությունը նախատեսվում է վաճառել 5 մլն դոլարով։ «Ենթադրենք, մենք վաճառում ենք դրանցից մեկ միլիոնը, սա 5 տրլն դոլար կկազմի»,- հայտնել է Սպիտակ տան ղեկավարը։
Թրամփն ընդգծել է նաեւ, որ եթե ԱՄՆ իշխանությունները լուրջ պահանջներ ունենան օտարերկրացիների նկատմամբ, որոնք կգնեն այդ քարտերը, գումարը կվերադարձվի նրանց, եւ այդ անձինք կարտաքսվեն արտերկիր։ Բնականաբար, նրանք, ովքեր ցանկանում են գնել այդ քարտերը, «պատշաճ կերպով կստուգվեն» ամերիկյան հետախուզական գործակալությունների կողմից, ավելացրել է նախագահը։
Նախատեսվում է, որ նոր քարտը կփոխարինի օտարերկրյա ներդրողների համար ԱՄՆ-ում կեցության թույլտվության տրամադրման ծրագրին, որը հայտնի է որպես EB-5։