Վենետիկը կարող է ամբողջությամբ ջրի տակ անցնել մինչեւ 2150թ.: Նման ելք է նախատեսված Երկրաֆիզիկայի եւ հրաբխագիտության ազգային ինստիտուտի միջազգային նախագծի շրջանակում մոդելավորված սցենարներից մեկով, հայտնել է RAI News 24 լրատվական ալիքը:
Հետազոտողների տվյալներով՝ Վենետիկի ծովածոցում հեղեղումներից պաշտպանվելու համար տեղադրված «Մովսես» արգելապատնեշի համակարգը քաղաքը բավարար չի լինի: Հեղեղումների մոդելավորումն իրականացվել է 2050, 2100 եւ 2150 թթ. համար։
Արդյունքում՝ հեռուստաալիքի կարծիքով, վատագույն սցենարը տեղի կունենա XXII դարի կեսերին։ Ըստ այս վարկածի՝ 139 քառակուսի կիլոմետրից մինչեւ 226 քառակուսի կիլոմետր տարածքը կարող է ջրի տակ անցնել։
«Առանց պաշտպանության լրացուցիչ միջոցների՝ դա կհանգեցնի հեղեղումների եւ զգալի վնասների ինչպես տեղի բնակչության, այնպես էլ Վենետիկի մշակութային ժառանգության համար»,- զգուշացրել են գիտնականները:
Փորձագետները նշել են, որ հնարավոր աղետի պատճառը, ի թիվս այլոց, կլիմայի փոփոխությունն է. «բարձր ջրի» էֆեկտը հանգեցնում է ցամաքի մակարդակի մշտական նվազմանը եւ ծովի կողմից դրա կլանմանը: Ներկայում այս գործընթացի արագությունը հասնում է տարեկան յոթ միլիմետրի։
«Բարձր ջրի» երեւույթը, որն առաջանում է ծովի մակընթացություններից՝ կախված լուսնային շրջափուլից, բնորոշ է Վենետիկի կղզու հատվածին։