Թուրքիայում րոպե առ րոպե լարվածությունն աճում է, հայտնում է «Թուրքիան այսօր» լրատվական ալիքը: Թուրքիայի իրավապահ մարմինները կոշտ միջոցներ են ձեռնարկում Մերձավոր Արևելքի տեխնիկական համալսարանի (METU) ուսանողներին վնասազերծելու համար՝ օգտագործելով ռետինե փամփուշտներ և արցունքաբեր գազ։ Իրավիճակը շարունակում է թեժանալ, բողոքի ակցիաները ընդգրկում են երկրի ավելի ու ավելի շատ շրջաններ։
Հիշեցնենք՝ Ստամբուլի ընդդիմադիր քաղաքապետ, գլխավոր ընդդիմադիր «Ժողովրդահանրապետական կուսակցության» անդամ Էքրեմ Իմամօղլուի ձերբակալումից հետո Ստամբուլում բողոքի ցույցեր են սկսվել:
Մարտի 19-ին վաղ առավոտյան Ստամբուլի ընդդիմադիր քաղաքապետ, գլխավոր ընդդիմադիր «Ժողովրդահանրապետական կուսակցության» (ԺՀԿ-CHP) անդամ Էքրեմ Իմամօղլուի ձերբակալումից հետո Ստամբուլում սկսվել են բողոքի ցույցեր։ ԺՀԿ-ի կոչից հետո հազարավոր մարդիկ հավաքվել են Ստամբուլի քաղաքապետարանի շենքի մոտ։ Ցույցն ընթացել է պաստառներով և վանկարկել են «Միայնակ փրկություն չկա՝ կա՛մ բոլորս միասին, կա՛մ մեզանից ոչ մեկը»։ Ցույցերին մասնակցել է կուսակցության նախագահ Օզգյուր Օզելը և Իմամօղլուի կինը՝ Դիլեք Իմամօղլուն։ Օզելը հայտարարել է, որ դատական հեղաշրջմամբ փորձ է արվում խլել ազգի կամքը։ Ստամբուլի համալսարանի ուսանողները ևս հավաքվել են համալսարանի դիմաց, երթ կազմակերպել և իրենց բողոքը հայտնել Էքրեմ Իմամօղլուի դիպլոմի չեղարկման և կալանավորման դեմ։ Երթից հետո ուսանողների և ոստիկանական ուժերի միջև բախումներ և ծեծկռտուք է տեղի ունեցել։ Լուսանկարներից երևում է, որ ոստիկաները կիրառել են արցունքաբեր գազ։