Իրականում, Միացյալ Նահանգներ-Իրան և Իրան-Իսրայել հարաբերություններում հռետորաբանության պատերազմ է և հոգեբանական պատերազմ, այս համատեքստում պետք է դիտարկել նաև տեղեկատվության և ապատեղեկատվության տարածումը՝ Իրանի օդային տարածքի փակվելու մասին։ Այս մասին «Փաստինֆոյի» հետ զրույցում ասաց իրանագետ Վարդան Ոսկանյանն՝ ընդգծելով, որ օդային տարածքի փակվելու մասին լուրն ակնհայտորեն ապատեղյատվություն էր և միտված լրացուցիչ լարվածություն առաջացնելուն։
«Եթե փորձենք դիտարկել գործընթացը առանց այս տեղեկատվական և ապատեղեկատվական աղմուկի, ապա ակնհայտ է, որ թե Իրանը, և թե Միացյալ Նահանգները, առնվազն այս պահի դրությամբ, տրամադրված են որոշակի բանակցային գործընթաց սկսելու, բայց այդ բանակցությունները չեն կարող լինել ուղղակի, իրանական կողմը մերժում է ուղղակի բանակցությունների հանգամանքը, դա Իրանի պաշտոնական դիրքորոշումն է, իսկ անուղղակի բանակցությունների դուռը բաց է մինչ այս պահը։ Դատելով արևմտյան ԶԼՄ-ների հրապարակումներից՝ Սպիտակ տանը լրջորեն քննարկում են այդ անուղղակի բանակցությունների խնդիրը և, կարծես, պատրաստակամություն կա գնալու այդ ուղիով»,- նշեց իրանագետը։
Ոսկանյանի դիտարկմամբ՝ անուղղակի բանակցությունը ենթադրում է երրորդ պետության միջոցով բանակցություններ կամ ուղերձներ փոխանցելն ու ստանալը։ «Այսինքն՝ խոսքը ոչ թե երրորդ երկրում երկու կողմերի բանակցություններն են, այլ երրորդ երկրի, այսպես կոչված խողովակի միջոցով ուղերձների և պատասխանների փոխանակումը, որի արդյունքում հնարավոր է հասնել մի փուլի, երբ հնարավոր կլինի արդեն ուղղակի բանակցություններ սկսել։
Ուղղակի բանակցությունները իրանական կողմը մերժում է՝ ելնելով սեփական կարմիր գծերից, իսկ դրանք նախանշում են, որ որևէ պարագայում ուժի սպառնալիքի տակ Իրանը չի գնա բանակցությունների»,-ընդգծեց Ոսկանյանը։
Նա նաև հիշեցրեց, որ այս պահի դրությամբ կա Օմանի միջոցով գործընթաց, երբ թե նախագահ Թրամփի նամակը և թե Իրանի հոգևոր առաջնորդի պատասխան նամակը փոխանցվեց։ «Բայց, կարծում եմ, որ Հայաստանի համար մի նման հնարավորություն կարող է ստեղծվել, եթե համապատասխան աշխատանք իրականացվի, այդ աշխատանքը չի կարող լինել հեշտ, լինելու է շատ դժվար, բայց, հաշվի առնելով հայ իրանական հարաբերությունները, նաև Հայաստան- Միացյալ Նահանգներ գործընկերային հարաբերությունները՝ Հայաստանը նման հնարավորություն ունի»։
Անդրադառնալով վերջին շրջանում Միացյալ Նահանգներից և Իսրայելից հնչող «Իրանին աննախադեպ հարվածներ հասցնելու» մասին հայտարարություններին ու նման հարվածների հավանականությանը՝ Ոսկանյանն ասաց, որ եթե դիտարկենք պատերազմի հավանականությունը, ապա լարվածության բարձր ֆոնի յուրաքանչյուր կայծից կարող են հանգեցնել որոշակի բռնկման, բայց այս պահին այդ պատերազմի միակ շահառու Իսրայելի վարչապետ Նեթնյահուն է։ «Իսրայելական կողմը պարբերաբար դրդում է Միացյալ Նահանգներին ներքաշվելու նման պատերազմի մեջ, որը կործանարար կլինի Մերձավոր Արևելյան տարածաշրջանի համար՝ հաշվի առնելով Իրանի ունեցած ռազմական պոտենցիալը և դա շատ լավ գիտակցում են Միացյալ Նահանգներում, ուստի Իրանը և Միացյալ Նահանգները, կարծում եմ այս պահի դրությամբ տրամադրված չեն նման լայնածավալ պատերազմ սկսելու և ուղղակի հնարավոր բանակցումներից առաջ կոշտ հայտարարություններով ամրպնում է սեփական դիրքերը։ Այլ խնդիր է Իսրայելը, որը անշուշտ նման պատերազմի շահառուն է։ Հիշեցնեմ, որ Թրամփն իր ընտրողներին խոստումներ է տվել և այդ խոստումները վերաբերել են բացառապես պատերազմների դադարեցմանը, ոչ թե նոր պատերազմներ սկսելուն, սա ևս չափազանց կարևոր է, բայց կրկնեմ, լարվածության բարձր ֆոնը չի նպաստում կայուն հեռուն տեսնելուն, և յուրաքանչյուր փոքր կայծ, անգամ պատահական սադրանք կարող է հանգեցնել բախումներին, բայցևայնպես պատերազմի վտանգը այնքան էլ իրատեսական չէ, թեև դա չի նշանակում, որ դա պետք է ամբողջությամբ բացառել»,-ասաց Ոսկանյանը։