Նորմալ է, որ արցախցիները գալիս ու պահանջներ են դնում իրենց ղեկավարների առաջ, բայց դնելուն ձև կա։
Այս մասին «Փաստինֆոյի» տաղավարում ասել է Արցախի ԱԺ պատգամավոր Մետաքսե Հակոբյանը։
«Մեր հայրենակիցները այդ մարդկանց առաջին անգամ տեսան այդ անվայել պահվածքի ժամանակ, բայց այդ նույն մարդիկ անցած 1,5 տարվա ընթացքում շատ հաճախ լինում են ներկայացուցչությունում, հանդիպումներ են ունենում Արցախի պատգամավորների, պետնախարարի հետ, Արցախի նախահագի հետ։ Այսինքն, իրենք ոչ մի խնդիր չեն ունեցել ներս մտնելու, խնդիրներ բարձրաձայնելու ու պահանջներ ներկայացնելու, և դա նորմալ է։ Շատ ավելի ճիշտ է, որ արցախցիները մինչև ՀՀ կառավարության առջև գնան պահանջներ դնեն՝ նախ խոսեն Արցախի իշխանությունների հետ, ամենը հավաքագրվի Արցախի իշխանությունների մոտ, ապա պահանջը դրվի ՀՀ իշխանություններին, սա նորմալ է, բայց դա անելու ձև կա, հետևաբար, հարց է առաջանում՝ ինչու այս ճանապարհով»։
Հակոբյանը պատմեց նաև, որ երբ իրենց կուսակցությունը ստեղծվում էր 2018 թ-ին ու իրենք պայքարում էին թալանի դեմ, բազմաթիվ բացահայտումներ են արել թալանի վերաբերյալ։
«Բազմից հաղորդումներ ենք ներկայացրել թալանի վերաբերյալ, որի շրջանակներում վարույթներ են տեղի ունեցել, և պետք է ասել, որ այդտեղ դարպաս կոտրողներից շատերը անցել են այդ վարույթներով։ Ինչո՞ւ իրենք այն ժամանակ անհանգստաած չէին թալանով։ Այս հարցին պատասխան կա, որովհետև շատերը հենց այդ վարույթով անցնողների մերձավոր շրջանակից էին»։
Նա նաև տեղեկացրեց, որ այդ դեպքերից առաջ ՀՀ կառավարությունը նախագիծ էր բերել, որով պետք է Արցախի կառավարության ակտիվները՝ նույն Ներդրումային հիմնադրամը, Գյուղհիմնադրամը, այն իրավաբանական ակտիվները, որոնք գրավ են դրված ու որոնց ՀՀ իշխանությունները թույլ չեն տվել գրանցվել Հայաստանում, խոսքը միլիարդավոր դրամների մասին է, անցնեն ՀՀ իշխանությունների տնօրինմանը։ Դրանից 4 օր անց տեղի է ունենում այս ակցիան։ Ստացվում է Արցախի իշխանությունները այդ ուղղությամբ որևէ բան անել էլ չեն կարող, անգամ պահանջել չեն կարող։ Գուցե այդ ակցիան նաև շատերի ուշադրությունը շեղելու համար էր։
Շատ արցախցիների մոտ բաց է հարցը, թե արդյո՞ք սա ուղղորդված չէր, որովհետև այնտեղ շատերը բարեկամական ու ընկերական կապեր ունեն ՀՀ իշխանությունների հետ, այնպիսի մարդկանց հետ, ովքեր ուղիղ մեղադրվում են Արցախը հանձնելու մեջ»։