Ապրիլի 28- գիշերը ուկրաինական անօդաչու սարքերը զանգվածային հարձակում են գործել Բրյանսկում, հայտնել է Բրյանսկի նահանգապետ Ալեքսանդր Բոգոմազը։ «Ցավոք, զոհվել է քաղաքացիական անձ, եւս մեկ բնակչուհի վիրավորվել է, նրան արագ տեղափոխել են հիվանդանոց, որտեղ ստացել է անհրաժեշտ բժշկական օգնություն»,- գրել է Բոգոմազը թելեգրամ-ալիքում։ Նա նաեւ նշել է, որ վնասվել են քաղաքացիական օբյեկտներ եւ ենթակառուցվածքներ, սակայն չի նշել, թե որոնք։
Հարվածի է ենթարկվել Բրյանսկի Սովետսկի շրջանը, որտեղ գիշերը ժամը 2-ի մոտ որոտացել են 10-15 պայթյուններ, պատմել են տեղի բնակիչները Shot-ին։ Նրանց տվյալներով՝ Մոսկովսկայա փողոցում այրվել է բնակելի շենք, Կրասնոարմեյսկայա փողոցի ավտոկայանատեղիում այրվել են մի քանի մեքենաներ։ Միեւնույն ժամանակ, ВЧК-ОГПУ թելեգրամ-ալիքը, հղում կատարելով ականատեսներին, գրել է ուժեղ հրդեհի մասին «Կրեմնի Էլ» գործարանի մոտ, որը գտնվում է Կրասնոարմեյսկայա փողոցում։ Այն Ռուսաստանում միկրոէլեկտրոնիկայի, մասնավորապես՝ ինտեգրալային սխեմաների, դիոդների, տրանզիստորների եւ այլն արտադրող խոշորագույն արտադրողներից է։ Այն արտադրում է «Պանցիր» հակաօդային պաշտպանության համակարգերի եւ «Իսկանդեր» հրթիռային համակարգերի մասեր։ Գործարանը նախկինում մի քանի անգամ ենթարկվել է ուկրաինական անօդաչու սարքերի հարձակմանը։
Հունվարի 24-Ին ձեռնարկությունը գրոհել են վեց անօդաչու թռչող սարքեր։ Այդ ժամանակ ոչ ոք չէր տուժել, սակայն գործարանը ժամանակավորապես դադարեցրել է գործունեությունը արտադրական օբյեկտների մի մասի եւ պատրաստի արտադրանքի պահեստի վնասվելու պատճառով:
Պաշտպանության նախարարության հաղորդագրության համաձայն՝ մեկ գիշերվա ընթացքում Ռուսաստանի տարածքում որսացվել եւ ոչնչացվել է ուկրաինական 115 անօդաչու թռչող սարք։ Դրանց մեծ մասը՝ 102 միավոր, Բրյանսկի մարզում, ինը՝ բռնակցված Ղրիմում, երկուսը՝ Կուրսկի մարզում, մեկը Բելգորոդում եւ եւս մեկը Սեւ ծովում: Մինչ այդ Կուրսկը ենթարկվել էր նման զանգվածային հարձակման ապրիլի 15-ին։ Պաշտպանության նախարարությունը հայտնել էր 109 անօդաչու թռչող սարքերի ոչնչացման մասին։ Արդյունքում՝ 85-ամյա մի կին մահացել է, եւս ինը մարդ վիրավորվել։ Վնասվել է 24 բազմաբնակարան շենք, ինչպես նաեւ շտապօգնության ենթակայան։