«Ազգային ժողովի վերջին նիստերին ավելի շատ քննարկվում են ռազբորկաներ, քֆուրներ, այլանդակ պահվածքներ, ամեն ինչ, բացի նրանից, ինչն այս պահին սպառնում է Հայաստանին, կախված է Հայաստանի գլխին»,- խորհրդարանական ճեպազրույցների ժամանակ ասաց «Պատիվ ունեմ» խմբակցության պատգամավոր Տիգրան Աբրահամյանը։
Նա նշեց, որ այսօր ոչ ոք չի հիշում, թե ուր ենք հասել բանակցային գործընթացում. «Ո՞վ է քննարկում, հիշում, թե որ կետին ենք հասել, քանի որ դրանից է կախված, թե ինչ է սպառնում Հայաստանին և ինչ է առաջիկայում սպասվում Հայաստանին։ Հանրությանը հայտարարվեց, որ Ադրբեջանի հետ բանակցություններն ավարտվել են, փաստաթուղթը, որը բաղացած է 17 կետից, չի հրապարակվում, թաքցվում է հասարակությունից։
Անդրադառնալով սահմանազատման/սահմանագծման գործընթացին՝ Տ.Աբրահամյանն ասաց. «Մի քանի ամիս առաջ Հայաստանի և Ադրբեջանի կողմից համատեղ հայտարարություն տարածվեց, որտեղ նշվեցին այն ուղղությունները և հիմքերը, որոնց հիման վրա հյուսիսից՝ Հայաստան, Ադրբեջան, Վրաստան սահմանից պետք է սկսվեր սահմանազատման գործընթացը։ Հաշվի առնելով, որ դրա մի կտորն իրականացվել էր Կիրանցի, Բաղանիսի, Ոսկեպարի հատվածում՝ հարցեր են առաջանում՝ ի՞նչ խնդիր է առաջացել և ի՞նչ է թաքցնում կառավարությունը, որ սահմանազատման հետ կապված համատեղ հայտարարությունից որևէ պրոցես գոյություն չունի»։
Ինչ վերաբերում է առաջնագծում առկա իրավիճակից՝ «Պատիվ ունեմ» խմբակցության պատգամավորը նշեց, որ մեկ ամսից ավելի է՝ սահմանագծի մի քանի ուղղություններով հրադադարի ռեժիմի խախտման դեպքեր են արձանագրվում. «Չնայած այն հանգամանքին, որ իշխանությունն առաջին մեկ շաբաթվա ընթացքում փորձում էր քողարկել այդ հանգամանքը, հետագայում իրավիճակն այնպիսի կետի հասավ, որի պայմաններում անհնար էր այլևս տեղեկատվություն չսփռելը։
Ինչո՞ւ է իշխանությունը փորձում քողարկել, շրջանցել հրադադարի ռեժիմի խախտման դեպքերը։ Կարծում եմ՝ սա առաջին հերթին պայմանավորված է «կեղծ խաղաղության» փուչիկի փչմամբ։ Հատկապես 2026 թվականի նախընտրական տրամաբանության շրջանակներում իշխանություններին ձեռնտու չէ, որ այս պահին պայթի։ Դա վնասում է միֆականացված այն ողջ տեսլականը, որն իշխանությունն անընդհատ ներկայացնում և տապալում է»։