Խաղաղության պայմանագիր չի լինելու, դա լինելու է փաստաթուղթ Փաշինյանի մասին. Ռոբերտ Քոչարյան ՀՀ երկրորդ նախագահ Ռոբերտ Քոչարյանը հայկական մի շարք լրատվամիջոցներին տված հարցազրույցում անդրադարձել է Հայաստանի և Ադրբեջանի միջև խաղաղության պայմանագրին, որը նախատեսում են ստորագրել Հայաստանի իշխանությունները։ Քոչարյանի խոսքով՝ խաղաղության պայմանագիր չի լինելու, դա լինելու է փաստաթուղթ Փաշինյանի մասին, թե ինչպես է նա շարունակելու իր քաղաքական հեռանկարը:
«Սա ներքաղաքական նպատակ հետապնդող անբովանդակ փաստաթուղթ է լինելու: Կա չկայացած առաջնորդ, որի նպատակն ամեն գնով իր աթոռը պահելն է»,-ասել է նախագահը:
Պատասխանելով հարցին, թե արդյոք Հայաստանի ներկայիս իշխանությունները բանակցային գործընթացի շրջանակներում կարող են շահարկել գերիների վերադարձի հարցը, Քոչարյանը նշել է. «Այս իշխանություններին ռազմագերիների հարցը չի հետաքրքրում: Գերության մեջ են մարդիկ, որոնք վերադառնալուն պես կարող են ինչ-որ կերպ կազմակերպել Արցախից փախստականների հարցը, ինչն այս իշխանություններին բացարձակ պետք չէ։ Ստեղծված իրավիճակն ամենահարմարն է այս իշխանությունների համար»։
Հարցազրույցում երկրորդ նախագահը պատասխանել է նաև արտաքին և ներքին քաղաքականությանը վերաբերող տարբեր հարցերի, անդրադարձել 2018 թվականի իրադարձություններին, 2021 թվականի ընտրություններին և 2026 թվականին սպասվող ընտրություններին։