Չինաստանի Shenyang Sunline պլաստիկ վիրաբուժության կենտրոնի մասնագետները վիրահատել են 15-ամյա չինուհուն, որն անբուժելի հիվանդության հետևանքով տարեց կնոջ տեսք ուներ: Նշվում է, որ դեռահասի դեմքը նախքան վիրահատությունը չուներ այս տարիքին բնորոշ թարմություն և հարթություն. այն կնճռոտ էր:
Ինչպես նշում է Daily Mail-ը, վիրահատությունը տեղի է ունեցել անցած ամիս և տևել է յոթուկես ժամ: Վիրահատությանը մասնակցել է տասը վիրաբույժ, երեք անեսթեզիոլոգ և հինգ բուժքույր: Աղջկա մաշկը ձգվել է և մոտ 7 սմ երկարությամբ ավելորդ մաշկ հեռացվել:
Ըստ մասնագետների՝ աղջկա մոտ հայտնաբերվել է Հաստինգս-Գիլֆորդ համախտանիշ: Այս գենետիկ հիվանդությունն առաջանում է մուտացիայի հետևանքով։ Բարեբախտաբար, այս դեպքում մուտացիան անդրադարձել է միայն մաշկի, այլ ոչ թե օրգանների վրա:
Չինուհին պատմել է, որ արտաքինով պայմանավորված ծաղրանքների ու ստորացումների պատճառով ստիպված է եղել լքել դպրոցը: Աղջիկը մանրամասնել է, որ մեկ տարեկանում իր դեմքն արդեն միջին տարիքի կնոջ դեմքի էր նման: Մինչդեռ 15 տարեկանում նա ուներ 60-ն անց կնոջ տեսք:
Սակայն վիրահատությունից հետո առաջին անգամ հայելու մեջ նոր արտաքինը տեսնելով՝ աղջիկն ուղղակի չի կարողացել հավատալ աչքերին: Հիվանդանոցի անձնակազմը մամուլի ասուլիս է կազմակերպել՝ հանրությանը ցույց տալով իրենց աշխատանքի արդյունքը: Բեմ ելած չինուհին, չկարողանալով զսպել արցունքները, խոստովանել է, որ դա իր կյանքի ամենաերջանիկ օրն է:
Հայտնի է, որ աղջիկը հիվանդությունը ժառանգել է մորից:
