Ինձ մոտ տպավորություն է, որ քաղաքական մեծամասնությունը երբեմն մոռանում է՝ ԱԺ-ում ներկայացված է երեք քաղաքական ուժ, և երեքն էլ այստեղ են եկել ժողովրդի տված քվեով և արդար ընտրությունների միջոցով, հետևաբար այստեղ պիտի լինեն տարակարծություններ, բանավեճեր և սա է քաղաքականությունը։ Ազգային ժողովում այս մասին հայտարարեց «Լուսավոր Հայաստան» խմբակցության քարտուղար Գևորգ Գորգիսյանը՝ դիմելով իշխանական խմբակցության իր գործընկերներին։
«Քաղաքականապես հասուն լինելու վկայությունն ընդդիմախոս խոսքը լսել կարողալան է և այդ խոսքը լսելիս կոռեկտության սահմաններից դուրս չգալը։ Մեզ բոլորիս այստեղ բերել է ժողովուրդը, բայց, ցավոք սրտի, օրինակ Դուք մսխում եք Ձեզ այստեղ բերած մի մարդու քաղաքական ռեսուրսը։ Ցավոք չկարողացաք դրսևորել քաղաքական հասունություն և գալ քաղաքական երկխոսության դաշտ»,-նշեց Գևորգ Գորգիսյանը։
Վերջինս, դիմելով «Իմ քայլը» խմբակցության պատգամավոր Ռուբեն Ռուբինյանին, ասաց. «Դուք մեզ թույլ չեք տալիս կարոտել նախկիններին։ Երբ ամեն անգամ հայտարարում եք, որ հնին վերադարձ չի լինելու, հարգելիներս հնի վերադարձը չի նշանակում, որ հները գան ու նստեն Ձեր տեղը։ Հնին վերադարձը լինում է նաև, երբ սկսում եք Ձեզ պահել ճիշտ նույնպես, ինչ նախկինները։ Դա նույնպես հնին վերադարձ է, երբ դևին սպանողը դառնում է դև»,-ասաց Գևորգ Գորգիսյանը։