Yerevan.Today-ը, որի խմբագրությունը տեղակայված է Էրեբունի Պլազա հյուրանոցում, բացառիկ կադրեր է հրապարակել զինված տղամարդու՝ հյուրանոց մուտք գործելու, ինչպես նաև վնասազերծումից հետո ոստիկանության պետի պաշտոնակատարի կողմից տղամարդուն դեպի իր ծառայողական մեքենան ուղեկցելու ընթացքից։
Հիշեցնենք, որ ոստիկանության տարածած պաշտոնական հաղորդագրության համաձայն, այսօր Ժամը 14.40-ին ոստիկանությունում ահազանգ է ստացվել, որ «Էրեբունի պլազա» հյուրանոցում զինված անձ կա, որը կրակում է։ Անմիջապես դեպքի վայր են մեկնել ոստիկանության ղեկավար կազմն ու օպերատիվ խմբեր։
Ոստիկանության ղեկավար կազմը՝ ոստիկանության պետի պաշտոնակատար Արման Սարգսյանի գլխավորությամբ բանակցություններ է վարել զինված տղամարդու հետ, ինչից հետո անձը հանձնել է հրազենը։
Տղամարդը ոստիկանության պետի պաշտոնակատարի ուղեկցությամբ, նրա ծառայողական մեքենայով տեղափոխվել է ոստիկանություն։ Վնասվածքներ ստացած քաղաքացիներ չկան։
Դեպքի բոլոր հանգամանքները պարզվում են։