«Հարգելի և շատ սիրելի Serj Tankian, այսօր Ձեր երկրում՝ ԱՄՆ-ում բնակվող հայտնի տնտեսագետ Դարոն Աջեմօղլուն քննադատել է Հայաստանի իշխանությանը՝ կասկած հայտնելով առ այն, որ կոռուցիայի դեմ պայքարի անվան տակ ժողվարչապետը բռնճնշումներ է իրականացնում քաղաքական մրցակիցների հանդեպ: Այս մասին իր ֆեյսբուքյան էջում գրել է քաղաքական-հասարակական գործիչ Միհրան Հակոբյանը:
Նա, մասնավորապես, նշել է. «Բազմահազար հայաստանցիներ ապշած են, թե ինչու՞ Դուք՝ որպես ակտիվ հեղափոխական, կապ չեք հաստատում պարոն Աջեմօղլուի հետ և պատիվ պահանջում: Չէ որ նման կասկածները վնասում են Ձեր իրականացրած ոչ բռնի, թավշյա, ժողովրդական հեղափոխության հեղինակությանն ու իդեալներին:
Երբ կապվեք պարոն Աջեմօղլուի հետ, անպայման նրանից տեսական մակարդակով մասնագիտական կարծիք հարցրեք՝ ի՞նչ արժեքային և վարքագծային վնասներ է կրում տնտեսական հեղափոխությունը, երբ հեղափոխական դարձած հայտնի ռոք երաժիշտը ժողվարչապետին խոստանում է բնակարան գնել և ավելի շատ ժամանակ անցկացնել Հայաստանում ու այդպես էլ խոստումը չի կատարում»:
Հիշեցնենք, որ հայտնի տնտեսագետ Դարոն Աճեմօղլուն «Ամերիկայի ձայն»-ի հետ զրույցում կոչ է արել կոռուպցիայի դեմ պայքարը չվերածել քաղաքական մրցակիցներին հետապնդելու միջոցի։
Տնտեսագետը հատկանշական է համարել Չինաստանի օրինակը, որն, ըստ նրա, հեռու է արդյունավետ հակակոռուպցիոն քաղաքականություն կոչվելուց։
Այստեղ վերահսկելի դատարանների պարագայում իշխանությունները կոռուպցիայի դեմ պայքարը հռչակել են առաջնահերթություն, սակայն իրականում ուղղել են քաղաքական հակառակորդների դեմ։
Տնտեսագետը վստահ է՝ քաղաքական այս ձևը, որ նա կոչում է «սիծինպինյան», բացասաբար է ազդում պետական կառավարման համակարգի ու կոռուպցիայի դեմ պայքարի վրա։
«Եթե որևէ ազդեցիկ առաջնորդ կամ խմբակցություն վերահսկում է պետական մարմինները և հետապնդում իր հակառակորդներին, ապա դա թուլացնում է այդ մարմինները»,-ասել է Աճեմօղլուն։
Հայաստանում ի սկզբանե առկա էր վտանգ, որ երկիրը կառաջնորդվեր այդ արատավոր ուղով, նշել է տնտեսագետը։ Նրա կարծիքով՝ այդ վտանգը դեռևս պահպանվում է։
2018 թ. մայիսին վարչապետ Նիկոլ Փաշինյանը Facebook-ի իր էջում գրել էր, որ հեռախոսազրույց է ունեցել հայազգի աշխարհահռչակ տնտեսագետ Դարոն Աճեմօղլուի հետ, որը, նրա խոսքով, պատրաստ է աջակցել Հայաստանին՝ տնտեսությունը վերականգնելու և զարգացնելու հարցում: