Սանկտ Պետերբուրգում փլվել է «Петербургский» մարզահամերգային համալիրի տանիքը, հայտնում է «ՌԻԱ Նովոստի» գործակալությունը` հղում տալով ՌԴ Արտակարգ իրավիճակների նախարարության քաղաքային վարչության տարածած հայտարարությանը:
Արտակարգ պատահարը տեղի է ունեցել շենքի ապամոնտաժման ժամանակ: Փլատակների տակ հնարավոր է` աշխատողներ մնացած լինեն:
Փլուզման ընդհանուր տարածքը կարող է 25-28 հազար քմ լինել:
Դեպքի վայրում աշխատում է 68 փրկարար և 18 միավոր տեխնիկա:
Ավելի վաղ հաղորդվել էր, որ շենքում սկսվում են վերակառուցման աշխատանքներ:
Ի դեպ, համացանցում է հայտնվել մարզահամերգային համալիրի տանիքի փլուզման պահը:
Հունվարին կոնցեսիոն համաձայնություն է ձեռք բերվել «Петербургский» մարզահամերգային համալիրի վերակառուցման և շահագործման համար: Համաձայն նախագծի` 2023 թվականի աշխարհի հոկեյի առաջնությանն այնտեղ պետք է առնվազն 20 000 հանդիսատես տեղավորող ժամանակակից սառցադաշտ հայտնվի:
